រាជធានីភ្នំពេញ ៖ ជនសង្ស័យ៤នាក់ ត្រូវបានសមត្ថកិច្ចនគរបាលប៉ុស្តិ៍ចោមចៅទី៣ ឃាត់ខ្លួនប្រគល់អោយនគរបាលប៉ុស្តិ៍កាកាបទី២ បន្ទាប់ពីធ្វើសកម្មភាពឆក់ទូរស័ព្ទដៃស្ត្រីម្ចាស់ផ្ទះសំណាក់ ហើយរត់ទៅផ្ទះសំណាក់មួយទៀត បង្កអោយមានការភ្ញាក់ផ្អើល កាលពីវេលាម៉ោង២រំលងអធ្រាត្រឈានចូលថ្ងៃទី៣១ ខែធ្នូ ឆ្នាំ២០១៨ នៅផ្ទះសំណាក់ ផៃ សុខុម ដែលស្ថិតនៅភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ។
ស្ត្រីជនរងគ្រោះឈ្មោះ ម៉េង សេរីរ័ត្ន អាយុ២៧ឆ្នាំ មុខរបរបើកផ្ទះសំណាក់ ស្ថិតនៅភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ។ ទូរស័ព្ទដែលជនសង្ស័យឆក់បានម៉ាក អេជប្លើស (8ប្លើស) ពណ៌ស តម្លៃ៩០០ដុល្លារ ។
ជនសង្ស័យធ្វើសកម្មភាពទី១- ឈ្មោះ បុល សុខជាតិ ភេទប្រុស អាយុ១៧ឆ្នាំ មុខរបរជាងម៉ាស៊ីនត្រជាក់ ស្នាក់នៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ មានស្រុកកំណើតនៅភូមិគៀនស្វាយ ឃុំគៀនស្វាយ ស្រុកស្អាង ខេត្តកណ្ដាល ។ ជនសង្ស័យទី២ ឈ្មោះ ថន មករា ភេទប្រុស អាយុ១៨ឆ្នាំ មុខរបរជាងម៉ាស៊ីនត្រជាក់ នៅស្រុកកោះធំ ខេត្តកណ្តាល ជនសង្ស័យទាំង២នាក់ធ្វើសកម្មភាពឆក់ជិះម៉ូតូម៉ាកវ៉េវ ពណ៌ខ្មៅ ពាក់ស្លាកលេខភ្នំពេញ 1J-9553 ។ ជនសង្ស័យទី៣- ឈ្មោះ ស្រែន ស្រេង អាយុ១៨ឆ្នាំ មុខរបរអ៊ុតម៉ូតូ នៅស្រុកស្អាង ខេត្តកណ្ដាល និងជនសង្ស័យទី៤- ឈ្មោះសម្បត្តិ បូរិន ភេទប្រុស អាយុ១៨ឆ្នាំ មុខរបរកម្មកររោងចក្រ ស្នាក់ភូមិភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ ជាបក្សពួកជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខភ្នំពេញ 1BH- 4101 ។
តាមប្រភពព័ត៌មានពីស្ត្រីរងគ្រោះបាននិយាយប្រាប់ថា នៅមុនពេលកើតហេតុរូបគាត់កំពុងអង្គុយមុខផ្ទះសំណាក់របស់ខ្លួន ដែលស្ថិតនៅភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ លុះកំពុងតែមើលទូរស័ព្ទ ស្រាប់តែឃើញជនសង្ស័យ២នាក់ជិះម៉ូតូម៉ាកវ៉េវ ពណ៌ខ្មៅ ធ្វើសកម្មភាពឆក់ទូរសព្ទដៃរបស់គាត់ ហើយជិះម៉ូតូគេចខ្លួនបាត់ ។
ប្រភពព័ត៌មានបានបន្តទៀតថា ខណៈពេលឆក់ទូរស័ព្ទស្ត្រីរងគ្រោះបានភ្លាមៗ ដោយទូរស័ព្ទខាងលើជាប់អាយខ្លោះ បន្ទាប់មកជនរងគ្រោះខាងលើបានដឹងថា ទូរស័ព្ទដៃរបស់ខ្លួនអោយសញ្ញានៅផ្ទះសំណាក់ឋានសួគ៌ នៅភូមិជម្ពូវ័ន សង្កាត់ចោមចៅទី៣ខណ្ឌពោធិ៍សែនជ័យបន្ទាប់ជនរងគ្រោះបានទាក់ទងសមត្ថកិច្ចនគរបាលប៉ុស្តិ៍ចោមចៅទី៣ ពេលនាំសមត្ថកិច្ចដល់ផ្ទះសំណាក់ ដោយឃើញម៉ូតូជនសង្ស័យខាងលើ នៅក្នុងផ្ទះសំណាក់ ហើយបានឃាត់ជនសង្ស័យនៅក្នុងផ្ទះសំណាក់យីហោឋានសួគ៌បាន៤នាក់នឹងម៉ូតូចំនួន២គ្រឿងយកមកប៉ុស្តិ៍ដើម្បី ប្រគល់អោយសមត្ថកិច្ចនគរបាលប៉ុស្តិ៍កាកាបទី២ ភ្លាមៗផងដែរ ។
ក្រោយពេលកើតហេតុ បន្ទាប់ពីជនរងគ្រោះបានប្តឹងសមត្ថកិច្ច ភ្លាមៗហើយ សមត្ថកិច្ចនគរបាលប៉ុស្តិ៍កាកាបទី២បានកសាងសំណុំរឿងបញ្ជូនទៅជំនាញព្រហ្មទណ្ឌខណ្ឌពោធិ៍សែនជ័យដើម្បីចាត់ការតាមនីតិវិធី ៕
ចែករំលែកព័តមាននេះ