គ្រោះមហន្តរាយធំធេងដែលធ្វើឲ្យប្តីប្រពន្ធខ្វែងគំនិត បែកបាក់គ្នា ឬនៅជាមួយគ្នាមិនបានសុខ ក៏គឺអស្មិមានះ ទទឹង រឹងរូស មានគំនិតទុទិដ្ឋិនិយមឃើញតែពីខ្លួនឯងពេករហូតខ្វះមេត្តា អស់ក្តីស្រឡាញ់ ចាំតែចាប់កំហុសគ្នា ។
ពិតណាស់ការមិនចេះទទួលកំហុស ចងចិត្តយកត្រូវតែម្យ៉ាង ហើយច្រើនតែបន្ទោសអ្នកដទៃដែលខុសនោះមិនដាច់ពីមាត់ និយាយជ្រាំដែល តែបើខ្លួនឯងធ្វើខុសវិញគេចវេះមិនព្រមទទួលកំហុសនោះឡើយ រហូតបិទបាំងបញ្ហាទៀតផង មនុស្សប្រភេទនេះកុំយកខ្លួនបៀតឱ្យសោះ ។
មែនហើយបុថុជ្ជនថាធ្វើអ្វីមិនចេះខុសនោះគ្មានទេ លើកលែងតែមិនធ្វើអ្វីសោះ តែត្រូវដឹងថា ការមិនធ្វើអ្វីសោះនោះ វាជាកំហុសធំជាងធ្វើទៅទៀត គឺខុសត្រង់មិនធ្វើនោះឯង។ បណ្ឌិតលោកពោលថា វិស័យមនុស្សល្អ កាលបើធ្វើខុសហើយ រមែងទទួលកំហុស និងព្រមកែប្រែ មិនឲ្យខុសដដែលៗ ឡើយ ។
ចំពោះបុគ្គលដែលធ្វើខុសហើយ មិនព្រមទទួលកំហុស ជាមនុស្សពិបាកបំផុត។ មនុស្សធុននេះទោះជានៅទីណា ជាមួយអ្នកណា ក៏បង្កការក្តៅក្រហាយទីនោះ ព្រោះបើមានបញ្ហាអ្វីមួយកើតឡើង គេចេះត្រឹមតែបន្ទោសអ្នកដទៃប៉ុណ្ណោះ តែអ្វីដែលល្អក៏ស្រវាយកមកទុកខ្លួនឯង មនុស្សប្រភេទនេះមាននៅក្នុងគ្រួសារណា គ្រួសារនោះ រកសេចក្តីសុខបានដោយកម្រ ។
ដូច្នេះដើម្បីទទួលបានមង្គលជីវិត គូស្វាមីភរិយារួមគ្នាបណ្តុះគុណធម៌ក្នុងការគ្រប់គ្រងផ្ទះ ឲ្យមានទៅវិញទៅមក ដែលជាតម្រូវការចាំបាច់បំផុតនៃគ្រួសារនីមួយៗ ។
ចែករំលែកព័តមាននេះ