ប្រទេសអេហ្ស៊ីប ៖ កងកម្លាំងសន្តិសុខអេហ្ស៊ីបកាលពីថ្ងៃទី២៩ធ្នូ ២០១៨ បានសម្លាប់ពួកជីហាដ៤០នាក់ ក្នុងការវាយឆ្មក់នានា ក្រោយការវាយប្រហារភេរវកម្មបង្ហូរឈាមប្រឆាំងពួកអ្នកទេសចរវៀតណាម ជាការវាយប្រហារលើកដំបូង ចាប់តាំងពីជាង១ឆ្នាំមកហើយ ក្នុងប្រទេសមួយដែលចាត់ទុកការប្រឆាំងភេរវកម្មថា ជាអាទិភាពដាច់ខាតរបស់ខ្លួន។
កាលពីថ្ងៃទី២៨ធ្នូអ្នកទេសចរវៀតណាម៣នាក់បានត្រូវស្លាប់ព្រមទាំងមគ្គុទេសក៍៍ជនជាតិអេហ្ស៊ីបម្នាក់ ដោយសារការផ្ទុះគ្រាប់បែកច្នៃមួយ ត្រូវចំរថយន្តបឺសដែលពួកគេជិះនៅជិតទីតាំងពីរ៉ាមីត GUIZEHជាយភាគនិរតីរដ្ឋធានីអេហ្ស៊ីប។
យោងតាមអគ្គរដ្ឋអាជ្ញាអេហ្សុីបថា ការសើុបអង្កេតមួយត្រូវបានបើកធ្វើ លើការវាយប្រហារនោះដែលក៏បណ្ដាលឲ្យអ្នកទេសចរ១១នាក់និងអ្នកបើករថយន្តរងរបួសផងដែរ។ អ្នកនាំពាក្យក្រសួងការបរទេសវៀតណាមលោកស្រីTHI THU HANG ថ្លែងថា វៀតណាមមានកំហឹងយ៉ាងខ្លាំងហើយថ្កោលទោសយ៉ាងម៉ឺងម៉ាត់ ចំពោះអំពើភេរវកម្មដែលសម្លាប់និងធ្វើឲ្យរបួសជនជាតិវៀតណាមស្លូតត្រង់ច្រើននាក់។ លោកស្រីស្នើដល់អេហ្ស៊ីបឲ្យដាក់ទោសធ្ងន់ធ្ងរបំផុតដល់ពួកអ្នកប្រព្រឹត្តអំពើនោះ។
ប្រទេសជាច្រើនបានសម្ដែងការគាំទ្រចំពោះអេហ្ស៊ីប ក្នុងនោះមានសហរដ្ឋអាមេរិកព្រមទាំងសហភាពអឹរ៉ុប។ សម្ដេចប៉ាបហ្វ្រង់ស្វ័រសម្ដែងក្ដីក្រៀមក្រំយ៉ាងខ្លាំងរបស់ព្រះអង្គ ហើយមានការជឿទុកចិត្តថា គ្រប់គ្នានឹងធ្វើអ្វីៗដើម្បីយកឈ្នះលើអំពើហិង្សាតាមរយៈសាមគ្គីភាព។
ក្រសួងមហាផ្ទៃអេហ្ស៊ីបប្រកាសកាលពីថ្ងៃទី២៩ថ្នូថា ការវាយឆ្មក់នានាក្នុងតំបន់GUIZEHនិងនៅស៊ីណៃអីុខាងជើង ដែលមានសកម្មភាពរបស់ពួកភេរវកម្មក្រុមរដ្ឋអ៊ិស្លាម សម្លាប់ភេរវករ៤០នាក់់ក្នុងនោះ៣០នាក់នៅតំបន់GUIZEHនិង១០នាក់នៅស៊ីណៃអីុខាងជើង។ ពួកនោះបានរៀបចំការវាយប្រហារមួយចំនួន ប្រឆាំងបណ្ដាស្ថាប័នរដ្ឋ រួមទាំងផ្នែកទេសចរណ៍ ប្រឆាំងទីតាំងសាសនាគ្រឹស្តនិងប្រឆាំងកងកម្លាំងសន្តិសុខ។
ការវាយប្រហារនោះកើតមានខណៈអាជ្ញាធរនាពេលថ្មីៗនេះ បានពង្រឹងសន្តិសុខនាឱកាសបុណ្យណូអែល។ យោងតាមកងទ័ពអេហ្ស៊ីបថា ចាប់តាំងពីខែកុម្ភៈមកកងកម្លាំងសន្តិសុខបានធ្វើការវាយលុកមួយ ប្រឆាំងក្រុមរដ្ឋអ៊ិស្លាម ពិសេសនៅតំបន់ស៊ីណៃអីុខាងជើង ដែលនៅទីនោះពួកជីហាដប្រមាណជា៥០០នាក់បានត្រូវស្លាប់។ ការវាយប្រហារភេរវកម្ម មានការកើនឡើងនៅអេហ្ស៊ីប ចាប់តាំងពីកងទ័ពទម្លាក់ប្រធានាធិបតីអ៊ិស្លាមនិយម លោកMOHAMED MORSIកាលពីឆ្នាំ២០១៣មក៕
ចែករំលែកព័តមាននេះ