ខេត្តរតនគិរី ៖ យុវតីជាសិស្សសាលាថ្នាក់ទី១១ទើបនឹងទិញម៉ូតូជិះបាន១ថ្ងៃត្រូវរថយន្តមួយគ្រឿងបុក បណ្តាលឱ្យស្លាប់នៅនឹងកន្លែងកើតហេតុ ។ ហេតុការណ៍ដ៏រន្ធត់នេះបានកើតឡើងកាលពីវេលាម៉ោង៧និង៣៥នាទីយប់ថ្ងៃទី២៨ ខែធ្នូ ឆ្នាំ២០១៨ ត្រង់ចំណុចសួនច្បារទល់មុខសាលាខេត្ត ស្ថិតនៅក្នុងភូមិអូរកន្សែង…
ខេត្តរតនគិរី ៖ យុវតីជាសិស្សសាលាថ្នាក់ទី១១ទើបនឹងទិញម៉ូតូជិះបាន១ថ្ងៃត្រូវរថយន្តមួយគ្រឿងបុក បណ្តាលឱ្យស្លាប់នៅនឹងកន្លែងកើតហេតុ ។
ហេតុការណ៍ដ៏រន្ធត់នេះបានកើតឡើងកាលពីវេលាម៉ោង៧និង៣៥នាទីយប់ថ្ងៃទី២៨ ខែធ្នូ ឆ្នាំ២០១៨ ត្រង់ចំណុចសួនច្បារទល់មុខសាលាខេត្ត ស្ថិតនៅក្នុងភូមិអូរកន្សែង សង្កាត់បឹងកន្សែង ក្រុងបានលុង ។
សមត្ថកិច្ចប៉ូលិសជំនាញបានអោយដឹងថា ជនរងគ្រោះដែលស្លាប់ឈ្មោះ សា៑ន សេងលាវ ភេទស្រី អាយុ១៩ឆ្នាំ ជាសិស្សថ្នាក់ទី១១នៃសាលាឯកជនអាស៊ានប្រ៊ីតក្រុងបានលុង រស់នៅភូមិថ្មី សង្កាត់ឡាបានសៀក ក្រុងបានលុង ជាបើកបរម៉ូតូ១គ្រឿង ម៉ាកស្គូពី ពណ៌ក្រហម ពាក់ស្លាកលេខ រតនគិរី ១B-៤៥៣០ ។
ចំណែកភាគីខាងរថយន្តម៉ាកតាកូម៉ា ប្រភេទមួយបាំងកន្លះ ពណ៌ស្លែ ពាក់ស្លាកលេខភ្នំពេញ ២N-២៥៧៩ បើកបរដោយឈ្មោះ ឈុំ សុផា ភេទប្រុស អាយុ២៤ឆ្នាំ មុខរបរជាងជួសជុលផ្នែកខាងភ្លើង រស់នៅភូមិ៤ សង្កាត់កាចាញ ក្រុងបានលុង ត្រូវបានសមត្ថកិច្ចឃាត់ខ្លួន ។ រីឯអ្នករួមដំណើម្នាក់ឈ្មោះ ជាង វណ្ណា ភេទប្រុស អាយុ៣៦ឆ្នាំ ជាម្ចាស់រថយន្ត និងជាម្ចាស់ការ៉ាស់ជួសជុលរថយន្ត) រស់នៅភូមិភ្នំស្វាយ សង្កាត់បឹងកន្សែង ក្រុងបានលុង។
សមត្ថកិច្ចបានឱ្យដឹងថា មុនពេលកើតហេតុ អ្នកបើកបររថយន្តខាងលើបានបើកចេញពីហាងផឹកស៊ីមួយកន្លែងនៅក្បែរកន្លែងកើតហេតុ ស្រាប់តែរថយន្តបានរេចង្កូតមកឆ្វេងដៃឡើងលើខឿនសួនច្បារជ្រុលទៅបុកជនរងគ្រោះ បណ្តាលឱ្យស្លាប់ភ្លាមៗនៅកន្លែងកើតហេតុ។
បើតាមការរៀបរាប់ពីសាច់ញាតិរបស់ជនរងគ្រោះបានអោយដឹងថា ម៉ូតូដែលយុវតីរងគ្រោះជិះ គឺបងប្រុសរបស់នាងបានអោយលុយទិញកាលពីពេលព្រឹក លុះពេលល្ងាចក៏ជួបគ្រោះថ្នាក់ចរាចរណ៍ស្លាប់តែម្តង ។
ដោយឡែកប្រភពពីមិត្តភក្តិជាច្រើននាក់ដែលរៀនជាមួយយុវតីរងគ្រោះបាននិយាយដូចគ្នាថា មុននឹងយុវតីរងគ្រោះជួបគ្រោះថ្នាក់ចរាចរណ៍បណ្តាលស្លាប់បែបនេះ គឺកាលពី២ទៅ៣ថ្ងៃមុន យុវតីរងគ្រោះបានឆាតទៅមិត្តភក្តិថា «នាងចង់តែស្លាប់» តែការចង់ស្លាប់របស់យុវតីរងគ្រោះមិនបានបញ្ជាក់ប្រាប់មិត្តភក្តិថាបណ្តាលមកពីមូលហេតុអ្វីនោះទេ ។ ទោះបីជាបែបណា មិត្តភក្តិរបស់យុវតីរងគ្រោះមានការសោកស្តាយ មិននឹកស្មានថា ការនិយាយលេងក្លាយទៅជារឿងពិតគួរឱ្យរន្ធត់បែបនេះសោះ។
មន្ត្រីចរាចរណ៍ខេត្តបានញ្ជាក់នៅថ្ងៃ៣០ ខែធ្នូ ឆ្នាំ២០១៨ ថា ម្ចាស់រថយន្តបានព្រមព្រៀងគ្នាសងទៅក្រុមគ្រួសាររបស់យុវតីរងគ្រោះចំនួន៧០០០ដុល្លារ និងផាកពិន័យផ្នែកខាងច្បាប់ចរាចរណ៍ជើងគោកចំនួន៤លានរៀលផងដែរ ។
បច្ចុប្បន្នអ្នកបើកបរថយន្តមិនអាចដោះលែងបានទេ ត្រូវបានបញ្ជូនទៅតុលាការដើម្បីចាត់ការតាមនីតិវិធី ចំណែកម៉ូតូ និងរថយន្តត្រូវបានសមត្ថកិច្ចយកមករក្សាទុកនៅស្នងការនគរបាលខេត្តរង់ចាំដោះស្រាយតាមផ្លូវច្បាប់៕
ចែករំលែកព័តមាននេះ