ខេត្តតាកែវ ៖ នារីបម្រើការងារនៅហាងដូងមាស ២រូប បានសុំឱ្យសមត្ថកិច្ចជួយចាប់ប្រុសព្រាន ដែលបន្លំដាក់ថ្នាំលើពួកនាងដោះយកគ្រឿងអលង្ការ ខណៈដែលពួកនាងទាំង២ ត្រូវបានជនពីររូបចូលមកផឹកស៊ី ហើយល្បួងពួកនាងទាំងពីរយកទៅនេបនិត្យ ដោយជិះរថយន្តរបស់ប្រុសព្រានម៉ាកកាមរីពណ៌ទឹកប្រាក់…
ខេត្តតាកែវ ៖ នារីបម្រើការងារនៅហាងដូងមាស ២រូប បានសុំឱ្យសមត្ថកិច្ចជួយចាប់ប្រុសព្រាន ដែលបន្លំដាក់ថ្នាំលើពួកនាងដោះយកគ្រឿងអលង្ការ ខណៈដែលពួកនាងទាំង២ ត្រូវបានជនពីររូបចូលមកផឹកស៊ី ហើយល្បួងពួកនាងទាំងពីរយកទៅនេបនិត្យ ដោយជិះរថយន្តរបស់ប្រុសព្រានម៉ាកកាមរីពណ៌ទឹកប្រាក់ ពាក់ស្លាកលេខភ្នំពេញ ២T-០៥០៧ ដោយនាំពួកនាងចេញពីហាងផឹកស៊ីដូងមាស ស្ថិតនៅសង្កាត់រកាក្រៅ ក្រុងដូនកែវ ខេត្តតាកែវ ឆ្ពោះទៅផ្ទះសំណាក់យីហោ អង្គរជ័យ នៅក្នុងស្រុកឧដុង្គ ខេត្តកំពង់ស្ពឺ កាលពីថ្ងៃទី២៦ ធ្នូ ។
បើតាមសម្តីរបស់នារីរងគ្រោះទាំងពីរនាក់បានរៀបរាប់ថា មុនពេលកើតហេតុ នៅយប់ថ្ងៃទី២៥ ធ្នូ មានបុរស២នាក់ បានចូលមកផឹកស៊ីក្នុងហាងខាងលើ ។ លុះដល់ម៉ោង១២យប់ ពួកនាងទាំង២នាក់ ក៏បានព្រមទៅជាមួយបុរសខាងលើ តែមិននឹកស្មានថា ពួកគេទាំងពីរនាក់នោះនាំពួកនាងទៅដល់ខេត្តកំពង់ស្ពឺឡើយ នាងថាទម្រាំទៅដល់ខេត្តកំពុងស្ពឺនោះ គឺម៉ោងប្រហែលជា៤ទៀបភ្លឺ ថ្ងៃទី២៦ ធ្នូ ទៅហើយទើបរកបានផ្ទះសំណាក់ដេក ។ លុះដល់ម៉ោង១១ថ្ងៃត្រង់ បុរសទាំង២នោះ បាននាំពួកនាងទៅញុាំបាយ ហើយបាននាំត្រឡប់មកផ្ទះសំណាក់វិញ ក៏ត្រូវប្រុសព្រានលួចដាក់ថ្នាំពួកនាងទាំង២នាក់ ឱ្យដោះគ្រឿងអលង្ការចេញពីខ្លួនអោយពួកគេ រួចក៏បាននាំរូបនាងទាំងពីរមកទុកចោលនៅក្បែរស្ពានព្រែកព្នៅ ឯរាជធានីភ្នំពេញ ដោយប្រាប់ថា ឱ្យចាំបន្តិច រូបគេមានការងារបន្ទាន់មួយ ពេលធ្វើការងាររួច រូបគេនឹងមកយកវិញ ។
នាងរៀបរាប់ទៀតថា និយាយរួចបុរសប្រុសព្រានទាំង២ក៏បើករថយន្តចេញបាត់ទៅ រហូតដល់ទៅម៉ោង៣រសៀល។ ដោយចាំយូរពេករូបនាងទាំងពីរបាននាំគ្នាជិះរថយន្តតាក់ស៊ីត្រឡប់មកហាងវិញ នៅឯខេត្តតាកែវ ហើយម្ចាស់ហាងបាននាំរូបនាងទាំងពីរទៅដាក់ពាក្យបណ្តឹងនៅកងរាជអាវុធហត្ថខេត្ត ដើម្បីជួយតាមចាប់ប្រុសព្រានអប្រិយ ដែលប្រើល្បិចល្បួងនារីតាមហាងទៅដោះយកគ្រឿងអលង្ការអស់ពីខ្លួន ។
នារីរងគ្រោះខាងលើ ម្នាក់អាយុ២២ឆ្នាំ រស់នៅស្រុកឈូក ខេត្តកំពត និងនារីម្នាក់ទៀត អាយុ២១ឆ្នាំ រស់នៅស្រុកបូរីជលសារ ខេត្តតាកែវ សព្វថ្ងៃនារីទាំងពីរនាក់បម្រើការងារក្នុងហាងដូងមាស ។ ចំពោះសម្ភារៈ និងគ្រឿងអលង្ការដែលបាត់នោះរួមមាន កងដៃ២ឈុត ចិញ្ជៀនប្លាទីន១វង់ មាស១វង់ និងទូរស័ព្ទ iPhone មួយគ្រឿង ៕
ចែករំលែកព័តមាននេះ