ខេត្តបាត់ដំបង ៖ តាមសេចក្តីរាយការណ៍បឋមបានឲ្យដឹងថា អ្នកភូមិបានប្រទះឃើញសពបុរសម្នាក់ នៅកណ្ដាលវាលស្រែមួយកន្លែង កាលពីវេលាម៉ោង៨ព្រឹក ថ្ងៃទី២៩ ធ្នូនេះ ដែលស្ថិតក្នុងភូមិគោកក្ដួច ឃុំតាពូង…
ខេត្តបាត់ដំបង ៖ តាមសេចក្តីរាយការណ៍បឋមបានឲ្យដឹងថា អ្នកភូមិបានប្រទះឃើញសពបុរសម្នាក់ នៅកណ្ដាលវាលស្រែមួយកន្លែង កាលពីវេលាម៉ោង៨ព្រឹក ថ្ងៃទី២៩ ធ្នូនេះ ដែលស្ថិតក្នុងភូមិគោកក្ដួច ឃុំតាពូង ស្រុកថ្មគោល ។
សេចក្តីរាយការណ៍បានបន្តថា សមត្ថកិច្ចបានឲ្យដឹងថា សពដែលមានស្ថានភាពហើមស្អុយរលួយទៅហើយនោះ ត្រូវគេស្គាល់ឈ្មោះ គង់ ស៊យ អាយុ៥៤ឆ្នាំ រស់នៅភូមិគោកក្ដួច ឃុំតាពូង ស្រុកថ្មគោល ។ អ្នកភូមិទៅច្រូតស្រូវហើយបានប្រទះឃើញសាកសពបុរសវ័យចំណាស់នេះ ។ បុរសនេះដេកស្លាប់នៅកណ្ដាលស្រែដែលមានស្រូវទុំ។
ជាមួយគ្នានោះមន្ត្រីមូលដ្ឋានបានចុះទៅកាន់កន្លែងកើតហេតុ និងរាយការណ៍ទៅមន្ត្រីបច្ចេក នៃស្នងការខេត្ត ដើម្បីចុះពិនិត្យផងដែរ ។
បើតាមពិនិត្យសាកសពបុរសនេះអាចស្លាប់ច្រើនថ្ងៃកន្លងមកហើយទើបរហូតហើមស្អុយរលួយបែបនេះ ។ ជុំវិញការស្លាប់របស់បុរសខាងលើនេះបើតាមប្រភពពីអ្នកភូមិបានប្រាប់សមត្ថកិច្ចថា ជនរងគ្រោះមានសតិមិនប្រក្រតី ហើយតែងតែដើរគ្មានគោលដៅបែបនេះជាប្រចាំ ។
តាមរយៈការបំភ្លឺនេះមន្ត្រីជំនាញក៏ដូចជា អ្នកភូមិបានធ្វើការសន្ធិដ្ឋានជាបឋមថា ជនរងគ្រោះអាចស្លាប់ដោយសារដើរដាច់បាយ ដាច់ទឹក ទើបបណ្ដាលដួលស្លាប់កណ្ដាលវាលស្រែបែបនេះ ។ ទោះយ៉ាងណាក្រោយពីពិនិត្យសមត្ថកិច្ចបានធ្វើកំណត់ហេតុប្រគល់សាកសពឲ្យទៅអាជ្ញាធរដែនដីយកទៅបូជាតាមប្រពៃណីហើយ ៕
ចែករំលែកព័តមាននេះ