ខេត្តកណ្តាល ៖ អាជីវករដែលមានមុខរបរលក់សាច់ជ្រូក និងសាច់គោ នៅតាមផ្សារនានាក្នុងស្រុកកៀនស្វាយ ស្រុកល្វាឯម ស្រុកលើកដែក ស្រុកមុខកំពូល ស្រុកខ្សាច់កណ្តាល ខេត្តកណ្តាល បាននាំគ្នាសម្តែងការរអ៊ូរទាំថា ឥឡូវនេះការលក់សាច់មិនសូវដាច់ហើយ ! ហើយការបន្តធ្វើអាជីវកម្មក៏នៅតែបង់លុយអស់ច្រើនដដែល ។
ជាក់ស្តែងជួបជាមួយបងប្អូនអាជីវករលក់សាច់ជ្រូក និងសាច់គោនៅក្នុងផ្សារអ្នកលឿងត្រើយខាងលិចផ្សារព្រែកថ្មី«ហៅផ្សារគគីរធំ»ផ្សារសំរោងធំ ផ្សារផ្លូវថ្មី ផ្សារគគីរ ក៏ដូចជា នៅតាមនានាជាច្រើនទៀត នៃស្រុកខាងលើបានរៀបរាប់សម្តែងការត្អូញត្អែរថា ឆ្នាំនេះទាំងសាច់ជ្រូកក៏ដូចជា សាច់គោលក់មិនសូវដាច់ទេ ! ជូនកាលធ្វើមួយក្បាលលក់រយៈពេល២ថ្ងៃក៏មានដែរ !បើប្រៀបធៀបទៅនឹងឆ្នាំមុនៗខុសគ្នាឆ្ងាយណាស់ កាប់មួយថ្ងៃ២ទៅ៣ក្បាលក៏លក់អស់ដែរ !ព្រោះពួកគាត់ខ្លះមានរបរលក់សាច់ជ្រូកសាច់គោ៧.៨ទៅ១០ក៏មានដែរ ។ ហើយបញ្ហាឆ្នាំនេះលក់សាច់មិនសូវដាច់នោះពួកគាត់ក៏មិនបានដឹងពីមូលហេតុ បណ្តាលមកពីអ្វីដែរ ។
ក្រុមអាជីវករបន្តទៀតថា ការលក់សាច់មិនសូវដាច់នេះធ្វើឲ្យពួកគាត់ជួបការលំបាកយ៉ាងខ្លាំងទី១-រកប្រាក់មិនបានសម្រាប់ផ្គត់ផ្គង់ជីវភាពគ្រួសារ ជួយកូនឲ្យបានរៀនសូត្រនឹងគេ ទី២-ការធ្វើ ឫបន្តអាជីវកម្មត្រូវចំណាយលុយបង់អស់ច្រើនក្នុងម្នាក់ចាប់ពី២៥០ដុល្លាររហូតដល់ទៅ៥០០ដុល្លារក៏មានដែរ តាមអ្នកធ្វើតិច ឫច្រើនក្នុងមួយឆ្នាំ ។ ហើយក្រៅពីនោះនៅមានបង់ឲ្យទៅខាងឡសត្តឃាតមាន១០ម៉ឺន ២០ម៉ឺន ៣០ម៉ឺន ៤០ម៉ឺន ៥០ម៉ឺន ទៅ៦០ម៉ឺនរៀលទៀត ក្នុងមួយខែ ។
ទោះយ៉ាងណាក្រុមអាជីវករទាំងនោះមិនបានបញ្ជាក់ប្រាប់ឲ្យច្បាស់ថា ការបង់លុយនេះឲ្យទៅខាងណា ! ហើយអ្នកទទួលឈ្មោះអ្វីនោះទេ ។ ដោយខ្លះថា ប្តីជាអ្នកទៅបង់ និងខ្លះទៀតប្រាប់ថា មានគេរត់ការឲ្យ ។ ការឆ្លើយរបស់ពួកគាត់ហាក់បីដូចជាមានការលាក់លៀមខ្លាចមុខខ្លាចក្រោយអញ្ចឹង ។ តែយ៉ាងណាក៏ដោយដែលអាជីវករបង់លុយចំនួនខាងលើនេះ គឺពិតជាជញ្ជក់ឈាមពួកគាត់ (អាជីវករ) ទាំងស្រស់១គុណរហូតដល់ទៅទ្វេជាង១០ដងឯណោះ ។ ហើយទង្វើរនេះមិនត្រឹមតែពាក់ព័ន្ធទៅនឹងការប្រព្រឹត្តអំពើពុករលួយជាប្រពន្ធ័របស់មន្ទីរកសិកម្មខេត្តណ្តាល ជាពិសេសកំពុងតែផ្គើនទៅនឹងសេចក្ដីសម្រេចរបស់ប្រមុខរាជរដ្ឋាភិបាល និងចរាចរណែនាំរបស់ក្រសួងកសិកម្មរុក្ខាប្រមាញ់ និងនេសាទ និងសៀវភៅបន្ទុករបស់ក្រសួងសេដ្ឋកិច្ចនិងហិរញ្ញវត្ថុ ។
ការផ្តល់សេវាសាធារណៈរបស់ក្រសួងកសិកម្មរុក្ខាប្រមាញ់ និងនេសាទម្ចាស់អាជីវកម្មម្នាក់ត្រូវបង់ប្រាក់ចំនួន៨០០០រៀល (ប្រាំបីម៉ឺនរៀល) តែប៉ុណ្ណោះចូលជាថវិការដ្ធសម្រាប់រយៈពេលមួយឆ្នាំ ។ ពាក់ព័ន្ធបញ្ហាខាងលើនេះលោក អ៊ុល ដូរិន ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តកណ្តាល បានប្រាប់ភ្នាក់ងារកោះសន្តិភាព តាមទូរស័ព្ទឲ្យដឹងកាលពីថ្ងៃទី២៨ ខែធ្នូនេះថា រូបលោកពុំបានដឹងទេ ព្រោះឥឡូវការធ្វើ ឫបន្តអាជីវកម្ម គឺគេប្រកាសតម្រូវឲ្យទៅទំនាក់ទំនងច្រកចេញចូលតែមួយនៃរដ្ធបាលខេត្តកណ្តាល ។
ចំពោះអាជីវករដែលគាត់និយាយថា បង់លុយអស់៣០០ដុល្លារទៅ៥០០ដុល្លារនោះមិនដឹងជាគាត់ឲ្យគេរត់ការ ឫបង់ឲ្យខាងណា រូបលោកមិនដឹងទេ! តែបើពាក់ព័ន្ធកូនចៅរបស់លោកនៅតាមបណ្តាស្រុកអ្នកប្រព្រឹត្ត ! បុគ្គលណាធ្វើបុគ្គលនោះអ្នកទទួលខុសត្រូវខ្លួនឯងទៅ ! ចំពោះការិយាល័យអត់មានទទួលកិច្ចការងារនេះទេ ! គឺគ្រាន់តែបានបញ្ជាក់ប៉ុណ្ណោះ ។ លោកអ៊ុល ដូរិន ក៏បានទទួលស្គាល់ថា ច្បាប់ពិតជាតម្រូវឲ្យអាជីវករធ្វើអាជីវកម្មលក់សាច់ត្រូវបង់ត្រឹមតែ៨០០០០រៀលដែរ ៕
ចែករំលែកព័តមាននេះ