ខេត្តក្រចេះ ៖ បន្ទាប់ពីធ្វើការហ្វឹកហ្វឺនរយៈពេលខ្លីដល់នាយ-នាយរង និងពលនគរបាលនៃបញ្ជាការដ្ឋានវរសេនាតូចការពារព្រំដែនគោកលេខ៦១៩ រួចមក ពិធីបិទវគ្គត្រូវបានធ្វើឡើងកាលពីល្ងាចថ្ងៃទី១៤ មីនា ឆ្នាំ២០១១ ក្រោមអធិបតីភាពលោកឧត្ដមសេនីយ៍ត្រី ជួង ស៊ាងហាក់ ស្នងការនគរបាលខេត្ដ ចូលរួមក្នុងពិធីនោះមាន លោកវរសេនីយ៍ឯក យិន ចំណាន ស្នងការរងទទួលបន្ទុកព្រំដែន លោកអ៊ុំ ភី ស្នងការរងទទួលបន្ទុកកណ្ដាលយុត្ដិធម៌ ព្រមទាំងនាយការិយាល័យ និងមន្ដ្រីនគរបាលជាច្រើនរូបទៀត។
លោកវរសេនីយ៍ទោ ឃ្លាំង ណារឹទ្ធ នាយការិយាល័យបណ្ដុះបណ្ដាលនៃស្នងការរដ្ឋាននគរបាលខេត្ដ បានអានរបាយការណ៍ឱ្យដឹងថា វគ្គហ្វឹកហ្វឺនដែលបានបញ្ចប់ជាស្ថាពរនេះ មានរយៈពេល១៥ថ្ងៃ ក្នុងនោះមានមុខជំនាញសរុបចំនួន៧វិញ្ញាសាជំនាញ រួមមានជំនាញផ្នែកសេនាធិការ បទវិន័យរបស់កងកម្លាំងនគរបាលជាតិ និងលំហាត់របៀប ផែនការការពារព្រំដែន ដើរល្បាតព្រំដែន កាងាររដ្ឋបាលនិងសេនាធិការ ជំនាញក្រមព្រហ្មទណ្ឌ ជំនាញអន្ដោប្រវេសន៍ ជំនាញការងារប្រឆាំងការជួញដូរមនុស្សនិងការពារអនីតិជន ព្រមទាំងជំនាញការងារប្រឆាំងគ្រឿងញៀន ។
លោកឧត្ដមសេនីយ៍ត្រី ជួង ស៊ាងហាក់ បានថ្លែងថា តបទៅតាមគោលនយោបាយរបស់អគ្គស្នងការដ្ឋាននគរបាលជាតិ និងក្រោមការយកចិត្ដទុកដាក់ពីលោកនាយឧត្ដមសេនីយ៍អគ្គស្នងការនគរបាលជាតិ មន្ដ្រីនគរបាលជាសិក្ខាកាម គឺទទួលបាននូវវិជ្ជាជីវៈជំនាញពិតប្រាកដប្រកបទៅដោយបច្ចេកវិទ្យាទំនើប និងមានសមត្ថភាពគ្រប់គ្រាន់បំពេញភារកិច្ចក្នុងស្មារតីទទួលខុសត្រូវ ការគោរពប្រតិបត្ដិច្បាប់ រក្សាសន្ដិសុខសណ្ដាប់ធ្នាប់សង្គម រក្សាការពារអាយុជីវិតទ្រព្យសម្បត្ដិ និងបំរើសេវាជូនប្រជាពលរដ្ឋ ដោយភាពស្មោះត្រង់ឱ្យបានប្រសើរនៅក្នុងទីតាំងឈរជើង ពិសេសលើកិច្ចប្រតិបត្ដិការការពារសន្ដិសុខជាតិ និងសន្ដិសុខនយោបាយ ជាមួយនឹងការអនុវត្ដតាមទិសដៅផែនការយុទ្ធសាស្ដ្ររបស់ស្នងការដ្ឋាននគរបាលខេត្ដសម្រាប់ឆ្នាំ២០១១។
លោកឧត្ដមសេនីយ៍ស្នងការ បានសំដែងនូវការកោតសសើរថា នាយ នាយរង និងពលនគរបាលដែលបានទទួលការបណ្ដុះបណ្ដាលហ្វឹកហ្វឺននៅនឹងកន្លែងរយៈពេលខ្លីនេះ នឹងបានយល់ជ្រួតជ្រាបកាន់តែច្បាស់អំពីភារកិច្ច និងតួនាទីរបស់នគរបាលជាតិ បន្ថែមពីលើចំណេះវិជ្ជាដែលមាន បង្កើននូវគុណភាពត្រឹមត្រូវច្បាស់លាស់ឱ្យសមស្រប និងក្លាយជាមន្ដ្រីនគរបាលយុត្ដិធម៌ដែលមានជំនាញពិតប្រាកដ៕
ចែករំលែកព័តមាននេះ