ខេត្តបន្ទាយមានជ័យ ៖ ផ្ទះមួយខ្នងមានទំហំ៨ម៉ែត្រគុណនឹង១៤ម៉ែត្រ កម្ពស់៨ម៉ែត្រ ប្រក់ស័ង្កសីខាងលើឈើនិងខាងក្រោមរៀបឥដ្ឋ បានត្រូវអគ្គិភ័យលេបត្របាក់អស់ទាំងស្រុងដោយសារភ្លើងធូបអុជបែបន់ជីដូនជីតាមុនពេលប្តីវះកាត់ខ្នែងពោះវៀន ។ ហេតុការណ៍អគ្គិភ័យនេះ កើតឡើងនៅវេលាម៉ោង៨យប់ថ្ងៃទី២៥ ខែធ្នូ…
ខេត្តបន្ទាយមានជ័យ ៖ ផ្ទះមួយខ្នងមានទំហំ៨ម៉ែត្រគុណនឹង១៤ម៉ែត្រ កម្ពស់៨ម៉ែត្រ ប្រក់ស័ង្កសីខាងលើឈើនិងខាងក្រោមរៀបឥដ្ឋ បានត្រូវអគ្គិភ័យលេបត្របាក់អស់ទាំងស្រុងដោយសារភ្លើងធូបអុជបែបន់ជីដូនជីតាមុនពេលប្តីវះកាត់ខ្នែងពោះវៀន ។ ហេតុការណ៍អគ្គិភ័យនេះ កើតឡើងនៅវេលាម៉ោង៨យប់ថ្ងៃទី២៥ ខែធ្នូ នៅភូមិពន្លៃថ្មី ឃុំទ្រាស ស្រុកស្វាយចេក ។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានឲ្យដឹងថា ម្ចាស់ផ្ទះខាងលើ ប្តីឈ្មោះ សុខ សុផល អាយុ៦៤ឆ្នាំ ប្រពន្ធឈ្មោះ ដាត់ រៀម អាយុ៥៩ឆ្នាំ មានកូន៤នាក់(ស្រី២នាក់) ។ លោកអធិការបានឲ្យដឹងតាមការរៀបរាប់របស់ម្ចាស់ផ្ទះថា នៅយប់ថ្ងៃកើតហេតុនោះ ស្ត្រីជាប្រពន្ធនៅផ្ទះម្នាក់ឯង ឯកូនៗទាំង៤នាក់ទៅធ្វើការនៅប្រទេសថៃអស់ ចំណែកប្តីរបស់គាត់ទៅព្យាបាលជំងឺពោះវៀនដុះខ្នែងនៅឯភ្នំពេញ ហើយនៅថ្ងៃទី២៦ ខែធ្នូ គ្រូពេទ្យនឹងធ្វើការវះកាត់ ។ ពេលនោះគាត់ជាប្រពន្ធបានឡើងទៅលើផ្ទះអុជធូបបន់ស្រន់ជីដូនជីតាឲ្យជួយពេលវះកាត់ប្តីគាត់ កុំឲ្យមានគ្រោះថ្នាក់អ្វីឲ្យសោះ ។
ក្រោយពីអុជរួចគាត់បានចុះមកដេកនៅក្រោមផ្ទះវិញ ហើយខណៈកំពុងដេកលង់លក់មួយភ្លែត ស្រាប់តែឮអ្នកជិតខាងស្រែកប្រាប់ថាភ្លើងឆេះផ្ទះ លុះពេលគាត់ក្រោកមើល គឺភ្លើងបានឆេះសន្ធោសន្ធៅទៅហើយ ។
លោកអធិការបានបញ្ជាក់ថា ក្រោយពីទទួលបានព័ត៌មាននេះ កងកម្លាំងនគរបាលប៉ុស្តិ៍ និងអ្នកភូមិព្រមទាំងរថយន្តពន្លត់អគ្គិភ័យរបស់អធិការដ្ឋាននគរបាលស្រុក បានជួយធ្វើអន្តរាគមន៍បាញ់ទឹកនពន្លត់តែមិនអាចជួយបាន ព្រោះភ្លើងឆេះសន្ធោសន្ធៅទៅហើយ ។ ម្យ៉ាងទៀត ផ្លូវឆ្ងាយទម្រាំរថយន្តពន្លត់អគ្គិភ័យទៅដល់គឺយឺតពេល តែបានបាញ់ទឹកអស់ចំនួន៤រថយន្ត ដើម្បីទប់ស្កាត់ភ្លើងកុំឲ្យឆេះរាលដាលទៅផ្ទះអ្នកជិតខាង ។
ជាមួយគ្នានេះ បានរកឃើញគ្រឿងអលង្ការមួយចំនួនទាំងយប់មាន ចិញ្ចៀនមាស៣វង់ក្រវិលមាស១គូ ខ្សែដៃមាស១ខ្សែ ខ្សែកមាស១ខ្សែ និងរបស់របរមួយចំនួនទៀតប្រគល់ជូនម្ចាស់ផ្ទះវិញ ។ លោកអធិការ ជា ស្លូញ បានផ្តាំផ្ញើដល់បងប្អូនប្រជាពលរដ្ឋទាំងអស់ សូមមេត្តាប្រុងប្រយ័ត្នចំពោះបញ្ហាអគ្គិភ័យ ព្រោះពេលនេះជារដូវក្តៅហួតហែង ងាយនឹងកើតមានអគ្គិភ័យណាស់ ៕
ចែករំលែកព័តមាននេះ