ខេត្តបន្ទាយមានជ័យ ៖ ក្រុមអាជីវករលក់ដូរក្នុងផ្សារចំការគរ(ផ្សារថ្មី)បានសម្តែងនូវក្តីសប្បាយរីករាយជាខ្លាំង នៅពេលឃើញក្រុមការងារសាលាក្រុងសិរីសោភ័ណដែលលោក ហ៊ឹល រ៉ាយ៉ា អភិបាលក្រុង រួមនឹងលោក នាង ហាវ…
ខេត្តបន្ទាយមានជ័យ ៖ ក្រុមអាជីវករលក់ដូរក្នុងផ្សារចំការគរ(ផ្សារថ្មី)បានសម្តែងនូវក្តីសប្បាយរីករាយជាខ្លាំង នៅពេលឃើញក្រុមការងារសាលាក្រុងសិរីសោភ័ណដែលលោក ហ៊ឹល រ៉ាយ៉ា អភិបាលក្រុង រួមនឹងលោក នាង ហាវ អភិបាលរងក្រុង ថ្ងៃទី២៦ ខែធ្នូ ឆ្នាំ២០១៨ ម្សិលមិញបានដឹកនាំក្រុមការងារមានសមត្ថកិចនគរបាលបានយកឡានទឹករបស់អធិការដ្ឋាននគរបាលក្រុង១គ្រឿងមកបាញ់ទឹកលាងសម្អាតទីធ្លាខាងមុខផ្សារផងដែរ និងមានកងរាជអាវុធហត្ថក្រុង ប្រជាការពារ រួមនឹងក្រុមហ៊ុនប្រមូលសំរាម ប្រមាណជាង៣០នាក់ បានធ្វើការបាញ់ទឹកលាងសម្អាតនៅមុខផ្សារ ដែលមានក្លិនស្អុយប៉ះពាល់ដល់សុខភាពអាជីវករលក់ដូរក្បែរនោះ ។
តំណាងអាជីវករមួយរូបនៅក្នុងផ្សារបានលើកឡើងថា កន្លងមកពួកគាត់មានជួបការលំបាកជាខ្លាំងដោយសារតែសំរាមបានជះក្លិនស្អុយធ្វើឲ្យពួកគាត់ពិបាកដកដង្ហើមម្យ៉ាងវិញទៀត វាអាចប៉ះពាល់ដល់សុខភាពរបស់ពួកគាត់ ។ ពេលខ្លះពួកគាត់ដែលជាអាជីវករបានប្រមូលលុយគ្នាដើម្បីទិញកំបោរមកបាចដើម្បីបំបាត់ក្លិនស្អុយក៏នៅតែមានក្លិនស្អុយដដែល ។
អាជីវករបន្តថា ពេលខ្លះសំរាមមានការស្តុបទុកយូរដោយក្រុមហ៊ុនដែលប្រមូលសំរាមមិនសូវទៀងទាត់ជាហេតុធ្វើឲ្យមានក្លិនស្អុយបែបនេះ ។ ទន្ទឹមគ្នានោះក្រុមអាជីវករក៏បានថ្លែងអំណរគុណចំពោះលោកអភិបាលក្រុងដែលតែងតែចុះមកដល់ទីតាំងផ្ទាល់ ជាក់ស្តែងលោកបានដឹកនាំក្រុមការងារចុះមកសម្អាតទីនេះដែលធ្វើឲ្យពួកគាត់លែងមានក្តីព្រួយបារម្ភពីរឿងក្លិនស្អុយទៀតហើយ ៕
ចែករំលែកព័តមាននេះ