រាជធានីភ្នំពេញ ៖ អាជ្ញាធរមូលដ្ឋាននៅតាមបណ្តាលខណ្ឌមួយចំនួននៅក្នុងរាជធានីភ្នំពេញ បានចុះប្រមូលសំរាមនៅតាមដងផ្លូវ ខណៈពេលដែលកម្មករក្រុមហ៊ុនស៊ីនទ្រី បាននាំគ្នាធ្វើកូដកម្ម ដើម្បីទាមទារតំឡើងប្រាក់ខែ ជាហេតុធ្វើឲ្យសំរាមនៅតាមដងផ្លូវមួយចំនួនគរដូចកូនភ្នំ ជះក្លិនស្អុយអាសាចនៅកណ្តាលរាជធានីភ្នំពេញ ។…
រាជធានីភ្នំពេញ ៖ អាជ្ញាធរមូលដ្ឋាននៅតាមបណ្តាលខណ្ឌមួយចំនួននៅក្នុងរាជធានីភ្នំពេញ បានចុះប្រមូលសំរាមនៅតាមដងផ្លូវ ខណៈពេលដែលកម្មករក្រុមហ៊ុនស៊ីនទ្រី បាននាំគ្នាធ្វើកូដកម្ម ដើម្បីទាមទារតំឡើងប្រាក់ខែ ជាហេតុធ្វើឲ្យសំរាមនៅតាមដងផ្លូវមួយចំនួនគរដូចកូនភ្នំ ជះក្លិនស្អុយអាសាចនៅកណ្តាលរាជធានីភ្នំពេញ ។
នៅព្រឹកថ្ងៃទី២៧ ខែធ្នូនេះ គេឃើញកម្លាំងសណ្តាប់ធ្លាប់ខណ្ឌឬស្សីកែវ និងប្រជាការពារនៅតាមសង្កាត់នានា នៅក្នុងខណ្ឌឬស្សីកែវបានដើរតួរជំនួសកម្មករស៊ិនទ្រីបានចុះប្រមូលសំរាមនៅតាមដងផ្លូវយកទៅដាក់ដីឡូតិ៍មួយកន្លែង នៅតាមមាត់ទន្លេ នៅភូមិផ្សារតូច សង្កាត់ទួលសង្កែ១ ខណ្ឌឬស្សីកែវ ។
ការចុះប្រមូលសំរាមនេះ គឺជាការយកចិត្តទុកដាក់របស់អាជ្ញាធរទៅលើបរិស្ថាននៅក្នងមូលដ្ឋានរបស់ខ្លួន និងក៏ជាការលើកកម្ពស់សោភ័ណ្ឌភាពរាជធានីភ្នំពេញ នៅក្នុងឱកាសដែលរាជរដ្ឋាភិបាលកម្ពុជាបានបើកសម្ពោធវិមានឈ្នះ-ឈ្នះ និងមានរៀបចំកម្មវិធិសប្បាយៗមានការប្រគុំតន្ត្រី បាញ់កាំជ្រួចពេលថ្ងៃស្របពេលបុណ្យចូលឆ្នាំសកលដែលនឹងឈានចូលមកដល់នៅក្នុងរយៈពេល៤ថ្ងៃទៀតនេះ ។ ទោះបីជាយ៉ាងណានៅមានអាជ្ញាធរ និងខណ្ឌមួយចំនួនហាក់ដូចជា មិនបានអើពើចំពោះបរិស្ថាននៅក្នុងមូលដ្ឋានរបស់ខ្លួនឡើយ ខណៈពេលដែលខណ្ឌមួយចំនួនកំពុងតែយកចិត្តទុកដាក់ពីបញ្ហាសំរាមនោះ ។
លោកនុត សាវី ប្រធានសណ្តាប់ធ្លាប់ខណ្ឌឬស្សីកែវបានអោយដឹងថា តាមការណែនាំរបស់លោកជា ពិសី អភិបាលខណ្ឌ និងមានការចុះបញ្ជាផ្ទាល់ពីលោកប្រាជ សីហា អភិបាលរងខណ្ឌ លោកបានដឹកនាំ កម្លាំង សណ្តាប់ធ្លាប់ខណ្ឌឬស្សីកែវបានចុះមកប្រមូលសំរាមនៅតាមផ្លូវជាតិលេខ៥ តាំងពីវេលាម៉ោងប្រមាណព្រឹកថ្ងៃទី២៧ ខែធ្នូនេះ ធ្វើយ៉ាងណាអោយអស់ក្នុងរយៈពេលមួយថ្ងៃ ។
លោកប្រធានសណ្តាប់ធ្នាប់បានអោយដឹងទៀតថា ក្នុងការចុះប្រមូលសំរាមលោកបានប្រើប្រាស់កម្លាំងសណ្តាប់ធ្លាប់ចំនួន៣០នាក់ទៅសហការណ៍ជាមួយប្រជាការពារនៅតាមបណ្តាលសង្កាត់ទាំង៧ ដោយប្រើប្រាស់រថយន្តបែនចំនួន២គ្រឿង រថយន្តសណ្តាប់ធ្នាប់មួយគ្រឿងគ្រឿងចក្រសម្រាប់ចូករបស់សាលាមួយគ្រឿង និងម៉ូតូរ៉ឺម៉ករបស់សាលាខណ្ឌមួយគ្រឿង ។ ក្រៅពីនោះមានរថយន្ត និងម៉ូតូរ៉ឺម៉កនៅតាមសង្កាត់នានាផងដែរ ។ លោក នុត សាវី ប្រធានសណ្តាប់ធ្លាប់ខណ្ឌឬស្សីកែវបានបន្តទៀត ថាបើសិនជាក្រុមហ៊ុនស៊ិនទ្រីគ្មានដំណោះស្រាយ ហើយបុគ្គលិកកម្មករស៊ិនទ្រីទាំងអស់នៅតែបន្តធ្វើកូដកម្ម លោកនឹងក្លាយខ្លួនជាអ្នកប្រមូលសំរាមជំនួសកម្មករស៊ីនទ្រីធ្វើកូដកម្ម ។
គួរបញ្ជាក់ថា កម្មករប្រមូលសំរាមរបស់ក្រុមហ៊ុនស៊ីនទ្រីជាង២ពាន់នាក់បាននាំគ្នាធ្វើកូដកម្មមិនព្រមចេញទៅប្រមូលសំរាមដោយនាំគ្នាធ្វើកូដកម្មទាមទារតំឡើងប្រាក់ខែចំនួន១២ដុល្លារ និងប្រាក់បំណាច់ផ្សេងៗដូចកម្មកររោងចក្រផងដែរ ។ ការធ្វើកូដកម្មបានផ្ទុះឡើង កាលពីវេលាម៉ោង៧យប់ ថ្ងៃទី២៦ ខែធ្នូ នៅទីតាំងចំណតរថយន្តស៊ីនទ្រី ស្ថិតនៅតាមផ្លូវបេតុង បឹងតាម៉ាត ក្នុងភូមិម័ល សង្កាត់ដង្កោ ខណ្ឌដង្កោ ។ បន្ទាប់ពីមានការតវ៉ាធ្វើអោយសំរាមនៅតាមដងផ្លូវ គរដូចភ្នំ និងមានក្លិនស្អុយអាសោចហើយអាជ្ញាធរបានក្លាយជាបន្ទុកមួយក្នុងការប្រមូលសំរាមនេះ ៕
ចែករំលែកព័តមាននេះ