រាជធានីភ្នំពេញ ៖ បុរសវ័យចំណាស់ម្នាក់ ជាអ្នកបើកបររថយន្តឱ្យក្រុមហ៊ុនលក់ថ្នាំពេទ្យមួយកន្លែង ត្រូវបានម្ចាស់ចាប់ឃាត់ខ្លួនយកមកប្រគល់ឱ្យនគរបាលប៉ុស្តិ៍ទន្លេបាសាក់ ដើម្បីចាត់ការតាមច្បាប់ ក្រោយពីគាត់បានយករថយន្តរបស់ក្រុមហ៊ុនម៉ាកហាយឡិនឌ័រមួយគ្រឿង ទៅបញ្ចាំបានលុយចំនួន៤ពាន់ដុល្លារយកទៅចូលលេងល្បែងក្នុងកាស៊ីណូ ហើយចាញ់អស់គ្មានសល់ ។
ហេតុការណ៍នេះ បានកើតឡើងកាលពីវេលាម៉ោង៤ និង៣០នាទីរសៀលថ្ងៃទី២៦ ធ្នូ ស្ថិតនៅនគរបាល ប៉ុស្តិ៍ទន្លេបាសាក់ សង្កាត់ទន្លេបាសាក់ ខណ្ឌចំការមន ។ តាមប្រភពពីនគរបាលបានប្រាប់ឱ្យដឹងថា បុរសជាជនសង្ស័យបានឃាត់ខ្លួន មានឈ្មោះ ង៉ាន់ អ៊ុយ អាយុ ៦០ឆ្នាំ ជាអ្នកបើកបររថយន្តឱ្យក្រុមហ៊ុនលក់ឱសថមួយកន្លែង ស្នាក់នៅផ្ទះគ្មានលេខ ផ្លូវលេខ ៣៦៩ ភូមិដើមចាន់១ ក្នុងសង្កាត់ច្បារអំពៅ២ ខណ្ឌច្បារអំពៅ។ចំណែកឯជនរងគ្រោះជាម្ចាស់រថយន្ត មានឈ្មោះជា ពុទ្ធារិន ភេទប្រុស អាយុ៣៦ឆ្នាំ ជាម្ចាស់ក្រុមហ៊ុនឱសថ ។
តាមប្រភពដដែលបានប្រាប់បន្តទៀតថា កាលពីអំឡុងខែវិច្ឆិកា ឆ្នាំ២០១៨ កន្លងមកនេះ បុរសជាជនសង្ស័យ បានបើករថយន្តម៉ាកហាយឡិនឌ័រ ពណ៌ខ្មៅ ពាក់ស្លាកលេខភ្នំពេញ២H-៨៤៦៨ មួយគ្រឿង យកចេញពីក្រុមហ៊ុនយកទៅបញ្ចាំបានលុយចំនួន៤ពាន់ដុល្លារ និងយកចូលកាស៊ីណូណាហ្គាលេងល្បែងចាញ់អស់គ្មានសល់។
ក្រោយពីយករថយន្តយកទៅបញ្ចាំ និងលេងល្បែងចាញ់លុយអស់រលីងរួចហើយ គាត់បានចូលទៅធ្វើការក្នុងក្រុមហ៊ុនជាធម្មតាវិញ ដោយប្រាប់ម្ចាស់ថា «ឡានខូច និងកំពុងធ្វើការជួសជុលនៅក្នុងការ៉ាស់» ។ ដោយមានការសង្ស័យ រហូតដល់ថ្ងៃទី២៦ ធ្នូ នេះ មិនឃើញគាត់យករថយន្តមកវិញ និងកុងស៊ីបញ្ចាំទូរស័ព្ទមកឱ្យយកលុយទៅបង់ការប្រាក់នោះ ទើបបែកការណ៍ ទៅដល់ម្ចាស់ក្រុមហ៊ុន យកលុយចំនួន៤ពាន់ដុល្លារទៅលោះ យករថយន្តរមកវិញ និងចាប់ឃាត់ខ្លួនយកមកធ្វើការប្រគល់ឱ្យកម្លាំងមានសមត្ថកិច្ចតែម្តង។
ក្រោយពីធ្វើការលោះយកពីកុងស៊ីបញ្ចាំមកវិញរួចហើយ រថយន្តម៉ាកហាយឡិនឌ័រនោះ ត្រូវបានកម្លាំងមានសម្ថកិច្ចធ្វើការប្រគល់ទៅឱ្យជនរងគ្រោះជាម្ចាស់រថយន្តវិញ ។ ចំណែកបុរសវ័យចំណាស់ជាអ្នកបើកម្នាក់ខាងលើ ក៏ត្រូវបានបញ្ជូនទៅកាន់អធិការនគរបាលខណ្ឌចំការមន ដើម្បីចាត់ការទៅតាមផ្លូវច្បាប់បន្ត។
ចែករំលែកព័តមាននេះ