រាជធានីភ្នំពេញ ៖ ជនសង្ស័យ២នាក់ត្រូវប្រជាពលរដ្ឋរួមទាំងសមត្ថកិច្ចប៉ុស្តិ៍គីឡូម៉ែត្រលេខ៦ ចាប់ខ្លួនកាលពីវេលាម៉ោង៥ល្ងាច ថ្ងៃទី១៣ កុម្ភៈ បន្ទាប់ពីជិះម៉ូតូម៉ាកហុងដា C125 ស៊េរី២០០៨ ពណ៌ខ្មៅ ពាក់ស្លាកលេខភ្នំពេញ 1U-5053 មួយគ្រឿងធ្វើសកម្មភាពឆក់ខ្សែ.កប្លាទីនទំងន់៣ជី ពីអ្នកដំណើរនៅតាមផ្លូវជាតិលេខ៥ ក្នុងភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ ។ នៅពេលឃាត់ខ្លួនសមត្ថកិច្ចដកហូតបានខ្សែ.កត្រឡប់មកវិញ ហើយប្រជាពលរដ្ឋនាំគ្នាព្រួតវាយឡើងទ្រមខ្លួនផងដែរ ។ ជនសង្ស័យដែលត្រូវចាប់ខ្លួននោះ១-ឈ្មោះសេត ហាស្សាន់ ភេទប្រុស អាយុ១៦ឆ្នាំ ២-ឈ្មោះឡោះ សាវី ភេទប្រុស អាយុ១៧ឆ្នាំ អ្នកទាំងពីរមានលំនៅភូមិ២ សង្កាត់ច្រាំងចំរេះទី១ ខណ្ឌឫស្សីកែវ ។
តាមប្រភពពីមន្ត្រីប៉ូលិសខណ្ឌឫស្សីកែវ បានឱ្យដឹងថា ជនសង្ស័យទាំងពីរនាក់ត្រូវសមត្ថកិច្ចចាប់ខ្លួនបានជាក់ស្តែង បន្ទាប់ពីជិះម៉ូតូម៉ាកហុងដា មួយគ្រឿងធ្វើសកម្មភាពឆក់ខ្សែ.កប្លាទីន ទំងន់៣ជី ពីស្ត្រីម្នាក់ឈ្មោះខន ដាលិស អាយុ២២ឆ្នាំ ជាកម្មករកាត់ដេរ មានទីលំនៅភូមិខ្វាង ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។
ប្រភពដដែលបន្តថា នៅមុនពេលកើតហេតុស្ត្រីរងគ្រោះបានជិះម៉ូតូម៉ាកហុងដា C125 ស៊េរី២០០៨ ពណ៌ខ្មៅ ឌុបមិត្តភក្តិធ្វើដំណើរតាមផ្លូវជាតិលេខ៥ ក្នុងទិសដៅពីត្បូងទៅជើង ដោយគោលបំណងទៅផ្ទះនៅខេត្តកំពង់ឆ្នាំង។ នៅពេលធ្វើដំណើរមកដល់ចំណុចកើតហេតុ ស្រាប់តែជនសង្ស័យចំនួន២នាក់ ធ្វើដំណើរមកស្របគ្នា ហើយធ្វើសកម្មភាពឆក់ខ្សែ.កពីស្ត្រីរងគ្រោះដែលជាអ្នកឌុបតែម្តង ។
តាមព័ត៌មានឱ្យដឹងទៀតថា នៅពេលឆក់ខ្សែ.កបានសំរេចហើយជនល្មើសព្យាយាមជិះគេចខ្លួនតែម្ចាស់ខ្សែ.កបានស្រែកឱ្យគេជួយ ហើយបើកម៉ូតូដេញតាម ។ ភ្លាមនោះដោយមានការអន្តរាគមន៍ពីកំលាំងប៉ូលិសល្បាតផងនោះ ក៏នាំគ្នាដេញចាប់បាននៅក្នុងភូមិបឹងឈូក សង្កាត់គីឡូម៉ែត្រលេខ៦ ព្រមទាំងដកហូតបានខ្សែ.កត្រឡប់មកវិញ ។ បន្ទាប់ពីចាប់ខ្លួនបានជនសង្ស័យត្រូវប្រជាពលរដ្ឋនាំគ្នាស្វាគមន៍១ដៃ ១ជើងម្នាក់យ៉ាងដំណំផងដែរ ៕
ចែករំលែកព័តមាននេះ