ខេត្តកំពត ៖ តាមសេចក្តីរាយការណ៍ពីការិយាល័យចរាចរផ្លូវគោកនៃស្នងការដ្ឋាន នគរបាលខេត្តបានឲ្យដឹងថា កាលពីរសៀលថ្ងៃទី២៦ ខែធ្នូ ឆ្នាំ ២០១៨ កំលាំងនគរបាលចរាចរចំនួន៥នាក់ ដឹកនាំដោយលោកអនុសេនីយ៍ឯក កៅ ជា នាយផ្នែកសណ្តាប់ធ្នាប់ បានដាក់គោលដៅត្រួតពិនិត្យបទល្មើសចរាចរណ៍ផ្លូវគោកនៅត្រង់ចំណុចចន្លោះបង្គោលគីឡូម៉ែត្រលេខ៣៣-៣៤ លើផ្លូវជាតិលេខ៣១ ស្ថិតក្នុងភូមិត្រពាំងមន្ត្រី ឃុំសំរោងក្រោម ស្រុកបន្ទាយមាស ខេត្តកំពត។
លុះដល់វេលាម៉ោង៤និង១០នាទីរសៀលថ្ងៃដដែល ពេលកំលាំងសមត្ថកិច្ចកំពុងធ្វើការត្រួតពិនិត្យនោះ ក៏មានការសង្ស័យទៅលើម៉ូតូសិស្សសាលាមួយគ្រឿងដែលជិះឌុបគ្នា៣នាក់ ហើយនៅពេលកំលាំងសមត្ថកិច្ចកំពុងឃាត់ម៉ូតូដើម្បីត្រួតពិនិត្យ ស្រាប់តែមានសិស្សម្នាក់បានចុះរត់ ដោយកំលាំងសមត្ថកិច្ចរត់តាមមិនទាន់ក៏បានគេចខ្លួនបាត់ នៅសល់តែសិស្សពីរនាក់ និងម៉ូតូមួយគ្រឿងតែប៉ុណ្ណោះ។
ប្រភពបានបន្តថា ឃើញសភាពបែបនេះសមត្ថកិច្ចមានការសង្ស័យក៏ឆែកឆេរម៉ូតូបានប្រទះ ឃើញម្សៅក្រាមពណ៌សថ្លាសង្ស័យជាសារធាតុញៀននៅក្រោមកែបម៉ូតូចំនួន៣កញ្ចប់តូច ។
ពេលនោះកំលាំងសមត្ថកិច្ចក៏បានឃាត់ខ្លួនជនសង្ស័យជាសិស្សទាំងពីរនាក់ រួមនឹងវត្ថុតាងតែម្តង។
ប្រភពព័ត៌មានបានបន្តទៀតថា ជនសង្ស័យខ្លួនទាំង២នាក់ដែលកំលាំងសមត្ថកិច្ចឃាត់ខ្លួនខាងលើ ម្នាក់ឈ្មោះគិន កែវ ភេទប្រុស អាយុ១៦ឆ្នាំ ជាសិស្ស និងម្នាក់ទៀតឈ្មោះ ច្រឹង ប៉ាវ ភេទប្រុស អាយុ១៦ឆ្នាំ ជាសិស្ស ។ ជនសង្ស័យទាំង២នាក់រស់នៅភូមិឃ្លាំងខាងត្បូង ឃុំភ្នំប្រាសាទ ស្រុកកំពុងត្រាច ខេត្តកំពត ។
ជនសង្ស័យរួមនឹងវត្ថុតាងកំលាំងត្រូវបានសមត្ថកិច្ចបានធ្វើកំណត់ហេតុប្រគល់ជូនផ្នែកសមត្ថកិច្ចជំនាញ ការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តដើម្បី ចាត់ការបន្តតាមនីតិវិធី ៕
ចែករំលែកព័តមាននេះ