អង្គការអូតង់ពេលនេះបានយល់ព្រមទទួលយកការបញ្ជាទាំងស្រុងលើប្រតិបត្តិការសឹកនៅប្រទេសលីប៊ី ពីប្រទេសសម្ព័ន្ធមិត្ត ដែលដឹកនាំដោយសហរដ្ឋអាមេរិក ដើម្បីបង្កើនការវាយប្រហារប្រឆាំងកងទ័ពរបស់លោកកាដាហ្វី ប្រសិនបើពួកគេនៅតែបន្តគំរាមកំហែងជនស៊ីវិលទៀត ។ ត្រូវជំរុញដោយបណ្តាប្រទេសមហាអំណាចពិភពលោក ពិសេសសហរដ្ឋអាមេរិក និងអ៊ីតាលី ដើម្បីបញ្ជាប្រតិបត្តិការយោធានៅលីប៊ី ឯកអគ្គរដ្ឋទូតមកពីក្រុមសម្ព័ន្ធមិត្ត ដែលមាន២៨ប្រទេសជាសមាជិកបានសម្រេចអនុម័តផ្ទេរការបញ្ជាប្រតិបត្តិការសឹកនៅលីប៊ី ។
អគ្គលេខាធិការអង្គការអូតង់លោក Anders Fogh Rasumussen ថ្លែងថា «បំណងរបស់យើងគឺដើម្បីការពារជនស៊ីវិល ដែលកំពុងស្ថិតក្រោមការគំរាមកំហែងវាយប្រហារដោយកងទ័ពរបស់លោកកាដាហ្វី ។ អង្គការអូតង់នឹងអនុវត្តពេញលេញនូវទស្សនវិស័យទាំងអស់នៃដំណោះស្រាយរបស់ក្រុមប្រឹក្សាសន្តិសុខ អង្គការសហប្រជាជាតិ» ។ ប៉ុន្តែទោះបីជាបែបណា មន្ត្រីអង្គការអូតង់និយាយថា ការផ្ទេរការបញ្ជានេះនឹងត្រូវការពេលពី៤៨ម៉ោងទៅ៧២ម៉ោងមានន័យថា កងទ័ពប្រទេសសម្ព័ន្ធមិត្តនឹងនៅចូលរួមក្នុងប្រតិបត្តិការជាមួយទាហានអង្គការអូតង់រយៈពេល២ ឬ៣ថ្ងៃទៀតសិន ។
អង្គការអូតង់បានយល់ព្រមទទួលយកការបញ្ជាទាំងស្រុងនូវប្រតិបត្តិការសឹកនៅលីប៊ី ក្រោយពីទទួលយកការបញ្ជាលើតំបន់ហាមហោះហើរនៅលីប៊ី កាលពីពេលថ្មីៗកន្លងមក ។
ក្រោមកិច្ចព្រមព្រៀងដែលសម្រេចបានកាលពីថ្ងៃទី២៧ មីនា កន្លងមក តួនាទីរបស់អង្គការអូតង់នឹងធំទូលាយជាងមុន ដោយនឹងបើកការវាយប្រហារតាមផ្លូវគោក ក្នុងករណីដែលជនស៊ីវិលត្រូវគំរាមកំហែង ។
ក្រោយពីអង្គការអូតង់យល់ព្រមទទួលយកការបញ្ជាទាំងស្រុងលើប្រតិបត្តិការសឹក ប្រទេសអង់គ្លេស នឹងបើកធ្វើសន្និសីទជាលក្ខណៈអន្តរជាតិ មួយនៅក្នុងទីក្រុងឡុងដ៍ថ្ងៃទី២៩ មីនា ដើម្បីកំណត់គោលនយោបាយសម្រាប់ប្រតិបត្តិការសឹកនៅលីប៊ី ប្រឆាំងមេដឹកនាំផ្តាច់ការរបស់ប្រទេសនេះលោកមូអាម៉ា កាដាហ្វី ៕
ចែករំលែកព័តមាននេះ