រាជធានីភ្នំពេញ ៖ បុរស២នាក់មិនដឹងថា ប្រញាប់ទៅណានោះទេ គឺបានជិះម៉ូតូម៉ាកស្កុបពីក្នុងល្បឿនលឿនបានជ្រុលទៅទាក់ដៃចង្កូតជាមួយនឹងបង្កាន់ដៃស្ពានអាកាសស្ទឹងមានជ័យ បណ្តាលអោយដួលម៉ូតូអូសជិត៣០ម៉ែត្រ ព្រមទាំងធ្វើអោយបុរសម្នាក់ដែលអង្គុយខាងក្រោយស្លាប់ ពេលបញ្ជូនទៅសង្គ្រោះនៅមន្ទីពេទ្យ ។ ចំណែកម្នាក់ទៀតជាអ្នកឌុបរងរបួសធ្ងន់ ។
ហេតុការណ៍នេះបានកើតឡើងនៅវេលាម៉ោង១០និង៥០នាទីយប់ថ្ងៃទី២៥ ខែធ្នូ ឆ្នាំ២០១៨ លើស្ពានអាកាសស្ទឹងមានជ័យ ផ្លូវ២១៧ សង្កាត់ស្ទឹងមានជ័យ១ ខណ្ឌមានជ័យ ។
សពជនរងគ្រោះត្រូវបានគេស្គាល់ថា ឈ្មោះ ជិន រតនា ភេទប្រុស អាយុ៣២ឆ្នាំ មានស្រុកកំណើត និងស្នាក់នៅផ្ទះលេខ៤៦០អឺ១ ផ្លូវ១៨៦ សង្កាត់មិត្តភាព ខណ្ឌ៧មករា ជាអ្នកអង្គុយខាងក្រោយ ។ ចំណែកបុរសម្នាក់ទៀតដែលរងរបួសធ្ងន់មិនទាន់ស្គាល់អត្តសញ្ញាណនៅឡើយទេ គ្រាន់តែដឹងថា ជិះម៉ូតូម៉ាកស្កុបពី សេរីឆ្នាំ២០១៨ ពណ៌ស ពាក់ស្លាកលេខ ភ្នំពេញ 1GN – 9405 ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេបានឃើញបុរសទាំងពីរនាក់មិនដឹងថា ប្រញាប់ទៅណានោះទេ គឺបានជិះម៉ូតូម៉ាកស្កុបពី សេរីឆ្នាំ២០១៨ ពណ៌ស បានធ្វើដំណើរតាមផ្លូវ២៧១ ក្នុងទិសដៅពីជើងទៅត្បូងឆ្លងកាត់ស្ពានអាកាសស្ទឹងមានជ័យលុះមកដល់ចំណុចកើតហេតុដែលជាផ្លូវកោង ហើយណាមួយអ្នកបើកម៉ូតូមិនបន្ថយល្បឿនទើបធ្វើអោយម៉ូតូជ្រុលទៅទាក់ជាមួយ និងបង្កាន់ដៃស្ពានអាកាសស្ទឹងមានជ័យ បណ្តាលអោយដួលម៉ូតូអូសជិត៣០ម៉ែត្រ ព្រមទាំងធ្វើអោយបុរសអង្គុយខាងក្រោយបោកក្បាលទៅនិងបង្កាន់ដៃស្ពានរយះ ហូរឈាមពេញផ្លូវ ។
ចំណែកអ្នកបើកម៉ូតូរងរបួសបែកក្បាលក្រោយហូរឈាមសន្លប់ស្តូកដូចគ្នា ហើយភ្លាមៗនោះដែរជនរងគ្រោះទាំង២នាក់ត្រូវបានរថយន្តសង្គ្រោះបានមកដឹកយកទៅសង្គ្រោះនៅមន្ទីពេទ្យព្រះកុសុមៈហៅពេទ្យលោកសង្ឃ តែពេលទៅដល់មន្ទីពេទ្យជនរងគ្រោះដែលអង្គុយខាងក្រោយបានដាច់ខ្យល់ស្លាប់ ចំណែកបុរសជាអ្នកឌុបត្រូវបានសង្គ្រោះបន្ទាន់ ។
ក្រោយពេលកើតហេតុឃើញមានកម្លាំងសមត្ថកិច្ចមូលដ្ឋាន និងជំនាញចរាចរណ៍ខណ្ឌមានជ័យបានចុះទៅកន្លែងកើតហេតុ រួចហើយបានធ្វើលិខិតប្រគល់សពជនរងគ្រោះអោយ រថយន្តដឹកយកតម្កល់ទុកនៅវត្តទឹកថ្លា ខណ្ឌសែនសុខ ដើម្បីស្វែងរកសាច់ញាតិបងប្អូន មកទទួលយកទៅធ្វើបុណ្យតាមប្រពៃណី ។ ចំនែកម៉ូតូរបស់ជនរងគ្រោះត្រូវសមត្ថកិច្ចយកទៅរក្សាទុកនៅ អធិការដ្ឋានខណ្ឌមានជ័យ ដើម្បីទុកប្រគល់អោយសាច់ញាតិមកទទួលយកទៅវិញ ៕
ចែករំលែកព័តមាននេះ