រាជធានីភ្នំពេញ ៖ ប្រៃសណីយ៍កម្ពុជា ដែលជាស្ថាប័នស្វយ័តមួយស្ថិតនៅក្រោមការគ្រប់គ្រងរបស់ក្រសួងប្រៃសណីយ៍ និងទូរគមនាគមន៍ បានបង្ហាញពីប្រាក់ចំណូលរបស់ខ្លួនសម្រាប់ឆ្នាំ២០១៨នេះ ក្នុងនោះគិតត្រឹមរយៈពេល១១ខែដើមឆ្នាំនេះ ទទួលបានចំណូលប្រមាណ១០,៥លានដុល្លារអាមេរិក នឹងរំពឹងថា ពេញមួយឆ្នាំ២០១៨នេះ នឹងទទួលបានប្រាក់ប្រមាណ១២លានដុល្លារអាមេរិក ។
ប្រតិភូរាជរដ្ឋាភិបាល ទទួលបន្ទុកជាអគ្គនាយកប្រៃសណីយ៍កម្ពុជា លោក អោក បូរ៉ា បានថ្លែងនៅក្នុងពិធីសម្ពោធសាខាប្រៃសណីយ៍កម្ពុជា មានទីតាំងនៅផ្សារទំនើបអុីអន សែនសុខ កាលពីថ្ងៃទី២៥ ខែធ្នូ ម្សិលមិញថា បន្ទាប់ពីប្រៃសណីយ៍កម្ពុជាបានកែទម្រង់ជាថ្មីកាលពីដើមឆ្នាំ២០១១ រហូតមកដល់ពេលនេះ ប្រៃសណីយ៍កម្ពុជា មានប្រាក់ចំណេញជារៀងរាល់ឆ្នាំ និងមានប្រាក់បន្ថែមសម្រាប់ផ្ដល់ជូនបុគ្គលិកជារៀងរាល់ឆ្នាំផងដែរ ។
លោកបន្ដថា ៖« បុគ្គលិកនិយោជិតរបស់យើង តែងតែទទួលបាននូវប្រាក់ខែទី១៣ ឬទី១៤ ទៅតាមទំហំទឹកប្រាក់ដែលស្ថាប័នរកបានចំណេញក្នុងមួយឆ្នាំៗ តែសម្រាប់ឆ្នាំ២០១៨នេះ អាចឈានទៅដល់ការលើកទឹកចិត្តប្រាក់ខែទី១៥ »។
លោកបន្តថា សម្រាប់ប្រាក់ចំណូលរបស់ប្រៃសណីយ៍កម្ពុជា កាលពីឆ្នាំ២០១០ មានត្រឹមតែជាង២លានដុល្លារអាមេរិកប៉ុណ្ណោះ តែបន្ទាប់ពីកែទម្រង់រួចបានកើនឡើងជាបន្តបន្ទាប់។ ជាក់ស្ដែងក្នុងរយៈពេល១១ខែឆ្នាំ២០១៨នេះ ប្រាក់ចំណូលពីសេវាកម្មរបស់ប្រៃសណីយ៍កម្ពុជា មានជាង១០,៥លានដុល្លារអាមេរិក និងរំពឹងថា ពេញមួយឆ្នាំ២០១៨ នឹងរកចំណូលបានប្រមាណ១២លានដុល្លារអាមេរិក ខណៈឆ្នាំ២០១៧កន្លងទៅ ចំណូលពីសេវាកម្មផ្សេងៗរបស់ប្រៃសណីយ៍កម្ពុជាបានតែ៨,៥លានដុល្លារអាមេរិកប៉ុណ្ណោះ ។
លោកបញ្ជាក់ថា ៖« ប្រាក់ចំណូលរបស់ប្រៃសណីយ៍កម្ពុជា កើនឡើងក្នុងឆ្នាំនេះ បានមកពីកំណើននៃសេវាកម្មបញ្ញើតាមរយៈ E-Commerce ។ មានន័យថា ប្រជាពលរដ្ឋកម្ពុជាមួយចំនួនធំបានបញ្ជាទិញទំនិញតាមអនឡាញច្រើន ដូច្នេះហើយទើបមានការផ្ញើអីវ៉ាន់ពីក្រៅប្រទេស មកកាន់កម្ពុជាកាន់តែច្រើន ធ្វើឲ្យចំណូលក៏កាន់តែច្រើនឡើងដែរ » ។
លោកបានលើកឡើងថា ដោយសារតែប្រជាពលរដ្ឋកម្ពុជាមួយចំនួនបានងាកមកប្រើសេវាកម្មសាធារណៈកាន់តែច្រើនផងនោះ បច្ចុប្បន្ននេះ ប្រៃសណីយ៍កម្ពុជាបានពង្រីកសាខានៅទូទាំងប្រទេសរហូតដល់៥៤សាខា ក្នុងនោះនៅភ្នំពេញ មានចំនួន១១សាខា និងនៅតាមបណ្ដាខេត្ត៤៣សាខា ។
លោក អោក បូរ៉ា បានបញ្ជាក់បន្ថែមថា សម្រាប់គោលដៅក្រៅប្រទេសវិញ ប្រៃសណីយ៍កម្ពុជា មានកិច្ចសហប្រតិបត្តិការចំនួន១៩២ប្រទេសនៅលើពិភពលោក ដែលធ្វើឲ្យវិសាលភាពសេវាកម្មរបស់ប្រៃសណីយ៍កម្ពុជា កាន់តែមានភាពទូលាយជាងមុន ។
លោកបន្ថែមទៀតថា ក្រៅពីសេវាកម្មប្រៃសណីយ៍ ស្ថាប័នមួយនេះក៏មានសេវាកម្មដឹកអ្នកដំណើរទៅកាន់បណ្ដាខេត្តមួយចំនួន នៅតាមបណ្ដាខេត្ត និងបង្កើតធនាគារមួយទៀតសហការជាមួយធនាគារ កាណាឌីយ៉ា និងក្រុមហ៊ុនហ្វ៊ូលើតុន ផ្ដល់សេវាធនាគារដល់ពលរដ្ឋកម្ពុជា ដែលរហូតមកដល់ពេលនេះ ធនាគារប្រៃសណីយ៍កម្ពុជា មានដើមទុនសរុបប្រមាណ៨៦លានដុល្លារអាមេរិក និងអាចរកប្រាក់ចំណេញបានជាង១០លានដុល្លារអាមេរិកក្នុងមួយឆ្នាំ និងមានផែនការរកចំណេញឲ្យបាន១៥០លានដុល្លារក្នុងរយៈពេល៥ឆ្នាំខាងមុខ ។
លោកបញ្ជាក់ថា នាពេលបច្ចុប្បន្ននេះ ប្រៃសណីយ៍កម្ពុជាមានដៃគូប្រកួតប្រជែងច្រើន ។ ជាក់ស្ដែងគ្រាន់តែក្រុមហ៊ុនរកស៊ីផ្ដល់សេវាកម្មបញ្ញើទូទាំងប្រទេសមានរហូតដល់ជាង៣០ក្រុមហ៊ុន ដែលធ្វើឲ្យទីផ្សារសេវាកម្មរបស់ប្រៃសណីយ៍កម្ពុជាមានភាពចង្អៀត ក៏ប៉ុន្តែប្រៃសណីយ៍កម្ពុជា នឹងខិតខំកែប្រែពីដៃគូប្រកួតប្រជែងទៅជាដៃគូសហការ និងចូលរួមធ្វើការសហការជាមួយគ្នា ផ្ដល់សេវាកម្មជូនប្រជាពលរដ្ឋកម្ពុជា ឲ្យមានតម្លាភាព និងភាពជឿជាក់ ។ លោកថា ៖« ក្នុងន័យនេះ យើងនឹងសហការជាមួយក្រុមហ៊ុនឯកជន ផ្ដល់សេវាឲ្យកាន់តែលឿន និងរហ័ស ហើយយើងនឹងបំពេញបន្ថែមឲ្យគ្នាទៅវិញទៅមក ។
មួយវិញទៀត ពេលនេះដែរ ប្រៃសណីយ៍កម្ពុជា ក៏បានបំពាក់ប្រព័ន្ធតាមដានទំនិញរបស់អតិថិជន ដើម្បីឲ្យអតិថិជនមានភាពងាយស្រួលតាមដានទំនិញរបស់ខ្លួន ដែលផ្ញើទៅកាន់ដៃគូម្ខាងទៀត ដែលអាចឲ្យដៃគូម្ខាងទៀតមកទទួលទំនិញ តាមពេលវេលាជាក់លាក់ ដោយមិនចាំបាច់រង់ចាំយូរនោះឡើយ » ៕ ដោយសហការ
ចែករំលែកព័តមាននេះ