ខេត្តបាត់ដំបង ៖ ជនសង្ស័យម្នាក់ត្រូវបានសមត្ថកិច្ចធ្វើការស្រាវជ្រាវឃាត់ខ្លួនបាន កាលពីវេលាម៉ោង
៧ព្រឹកថ្ងៃទី២៥ ធ្នូ នៅចំណុចភូមិវត្តលៀប សង្កាត់ចំការសំរោង ក្រុងបាត់ដំបង ដោយសង្ស័យមានជាប់ពាក់ព័ន្ធករណីគាស់ទម្លុះទម្លាយតូបលក់ទូរស័ព្ទ ។
ជនសង្ស័យឈ្មោះចាន់ ផាន់រ៉ូត ភេទប្រុស អាយុ៣១ឆ្នាំ រស់នៅភូមិ-សង្កាត់ខាងលើ ។ បើតាមសមត្ថកិច្ចថា ជននេះ ត្រូវកម្លាំងអន្តរាគមន៍បង្ការបង្ក្រាបនៃការិយាល័យព្រហ្មទណ្ឌកំរិតស្រាល ធ្វើការស្រាវជ្រាវឃាត់
ខ្លូនបាន ក្រោយពីធ្វើសកម្មភាពគាស់តូបលួចទូរស័ព្ទរបស់ជនរងគ្រោះអស់ជាច្រើនគ្រឿង ។
សមត្ថកិច្ចបានឲ្យដឹងទៀតថា ជននេះត្រូវបានសង្ស័យថា បានធ្វើសកម្មភាពគាស់តូបលក់ទូរស័ព្ទដៃរបស់ជនរងគ្រោះឈ្មោះ លឹម សុធារី ភេទស្រី អាយុ៣៧ឆ្នាំ កាលពីយប់ថ្ងៃទី២៣ ធ្នូ ស្ថិតនៅភូមិដំណាក់ហ្លួង សង្កាត់វត្តគរ ក្រុងបាត់ដំបង ដោយប្រមូលយកទូរស័ព្ទម៉ាកចម្រុះអស់ចំនួន២១គ្រឿង ។ លុះ២ថ្ងៃក្រោយទើបសមត្ថកិច្ចស្រាវជ្រាវឃាត់ខ្លួនបាន ។ ជាមួយនឹងការឃាត់ខ្លួន មន្ត្រីជំនាញដកហូតបានទូរស័ព្ទបានមកវិញចំនួន១៦គ្រឿង និងសម្ភារវត្ថុតាងមួយចំនួនទៀត។
បើតាមការកត់សម្គាល់ បទល្មើសអំពើចោរកម្ម ហាក់កំពុងកម្រើកឡើងយ៉ាងសកម្មមួយរយ:ចុងក្រោយនេះ នៅក្នុងក្រុងបាត់ដំបង បើទោះជាត្រូវបានកម្លាំងសមត្ថកិច្ចបង្ក្រាបបានខ្លះៗក្ដី ។ ជាពិសេស សកម្មភាពក្រុមចោរគាស់ទម្លុះទម្លាយលំនៅឋានលួចទ្រព្យសម្បត្តិរបស់ប្រជាពលរដ្ឋនេះតែម្ដង ដែលកើតមានស្ទើររាល់យប់ និងគ្រប់ទីកន្លែងនៅក្នុងក្រុងបាត់ដំបង ។
ដោយឡែក កម្លាំងអធិការក្រុងបាត់ដំបងវិញ ហាក់នៅចន្លោះប្រហោង ចំពោះវិធានការទប់ស្កាត់ ឬការស្រាវជ្រាវបង្ក្រាបជនប្រព្រឹត្ត ។ ស្ថិតក្នុងស្ថានភាពនេះ បើតាមប្រភពពីមន្ត្រីមួយចំនួនបានទម្លាយឲ្យដឹងថា បច្ចុប្បន្ន អធិការក្រុងបាត់ដំបងហាក់ពឹងផ្អែកទាំងស្រុងទៅលើកម្លាំងការិយាល័យជំនាញ នៃស្នងការខេត្ត ព្រោះកម្លាំងអធិការក្រុង មានតិចណាស់ដដែល បាននិងកំពុងបំពេញការងាររាល់ថ្ងៃ។ ហើយបើពិនិត្យទៅលើកម្លាំងនគរបាល នៅតាមបណ្ដាសង្កាត់ទាំង១០នៅក្នុងក្រុង ពេលយប់ស្ទើរតែគ្មានកម្លាំងធ្វើការងារតែម្ដង ឬមានកម្លាំងពីម្នាក់ទៅ២នាក់ប៉ុណ្ណោះដែលធ្វើការពេលថ្ងៃ។ ដូច្នេះហើយទើបជនល្មើសធ្វើសកម្មភាពម៉ាសេរីស្ទើររាល់យប់៕
ចែករំលែកព័តមាននេះ