កំពុងតែផ្ចង់អារម្មណ៍ទន្ទេញប៉ារ៉ូលសាច់រឿងតាមការផ្តល់ជូនពីផលិតករ និងអ្នកដឹកនាំ ហើយក្នុងដៃកាន់ជាប់នូវក្រដាសមួយសន្លឹកអមជាមួយកាយវិការដើរចុះឡើង មុនចូលដល់ប្លង់សម្តែង ដែលទាំងនេះជាការទម្លាប់មួយរបស់កញ្ញាសាឡាត់ ស្រីឡាង ក្នុងនាមជាតួសម្តែងដ៏ល្បីមួយរូប ។ ប៉ុន្តែ តើតារារូបនេះរះចេញពីណាមកហើយ…
កំពុងតែផ្ចង់អារម្មណ៍ទន្ទេញប៉ារ៉ូលសាច់រឿងតាមការផ្តល់ជូនពីផលិតករ និងអ្នកដឹកនាំ ហើយក្នុងដៃកាន់ជាប់នូវក្រដាសមួយសន្លឹកអមជាមួយកាយវិការដើរចុះឡើង មុនចូលដល់ប្លង់សម្តែង ដែលទាំងនេះជាការទម្លាប់មួយរបស់កញ្ញាសាឡាត់ ស្រីឡាង ក្នុងនាមជាតួសម្តែងដ៏ល្បីមួយរូប ។
ប៉ុន្តែ តើតារារូបនេះរះចេញពីណាមកហើយ ធ្វើដូចម្តេចបានជាអាចល្បីដូចសព្វថ្ងៃនេះ ? ស្រីឡាងដែលបច្ចុប្បន្នមានអាយុ២៣ឆ្នាំ បាននិយាយថា កញ្ញាមានការចូលចិត្តនិស្ស័យជាមួយសិល្បៈណាស់ តែងតែទំនេរនៅផ្ទះហាត់រៀនធ្វើទឹកមុខកាយវិការគ្រប់ទម្រង់ តួអង្គជាប្រចាំដោយមិនអោយអ្នកផ្ទះដឹងនោះទេ ។ នាងគ្មានឱកាសចូលមកសម្តែងសិល្បៈពេញលេញឡើយ កាលពី៧ទៅ៨ឆ្នាំមុន ព្រោះខ្លាចអ្នកផ្ទះ ។
កាលនៅវ័យកុមារនាងមិនខុសពីកុមារផ្សេងទៀតក្រៅពីទៅរៀនត្រឡប់មកវិញធ្វើការជួយម្តាយឪពុកមួយចំនួនដែរ ។ តារាវ័យ២៣ឆ្នាំ បើនិយាយពីសម្រស់វិញស្អាតប្លែកខុសពីមុនបានអះអាងទៀតថា រយៈពេល៤ឆ្នាំមកហើយ ដែលនាងប្រឡូកក្នុងសិល្បៈដោយបោះជំហ៊ានដំបូងសម្តែងក្នុងផលិតកម្មភូមិពេជ្រជាមួយនាយចឺម ក្នុងរឿង «ខ្មោចអាសង្ហា» ។ ក្រោយមកក៏ចូលមកថតក្នុងផលិតកម្មអិលឌីមានទាំងរឿងភាគ និងរឿងដុំ ។
នាងថា«នេះអាចនិយាយបានថា ជាព្រេងវាសនា និងជាឱកាសសម្រាប់ចូលសិល្បៈហើយបើមិនទាន់ល្បីណាស់ណាត្រឹមមានគេស្គាល់កុំអោយតែដូចអំឡុងឈានជើងចូលសិល្បៈដំបូងៗគឺលំបាកណាស់រកតែលុយទិញក្រេមម្ស៉ៅរបស់ល្អប្រើមិនចង់បានផង…» ។ សាឡាត់ ស្រីឡាងដែលធ្វើអោយទស្សនិកជនទទួលស្គាល់តាមរយៈសាច់រឿងបែបតួអង្គក្រមិចក្រមើមបានអោយដឹងថា ភារៈកិច្ចដែលនាងត្រូវតបស្នងមកវិញ គឺឪពុកម្តាយបងប្អូនបង្កើតដ្បិតតែពីមុនបងប្អូនក្រុមគ្រួសារមិនសូវគាំទ្រក៏នាងត្រូវតែជួយទ្រទ្រង់កម្រិតជីវភាពប្រចាំថ្ងៃដែរ ដោយសារតែផ្ទះរបស់នាងធ្លាប់ឆេះរងគ្រោះដោយអគ្គិភ័យ ។ អ៊ីចឹងហើយ រឹតតែធ្វើអោយនាងត្រូវខំខ្វែងដៃជើងជួយគ្នានៅក្នុងគ្រួសារ ដើម្បីអោយធូរ ។
ជាក់ស្តែងរាល់ថ្ងៃនេះនាងត្រូវចំណាយជាប្រចាំថ្ងៃជួយដល់ប្អូនៗ៣ទៅ៤នាក់ផ្តល់លុយកាក់ឲ្យរៀនជាប្រចាំ ព្រោះសុទ្ធតែអ្នកនៅរៀនត្រឹមឌីប្លូម ។ បើសិនជារកលុយមិនទាន់ទេ ខ្វះខាតមិនខាន ។ ដូចនេះហើយនាងនៅតែគិតថា ចូលសិល្បៈ គឺសំណាងអាចធ្វើអោយគេស្គាល់បើមិនដូចនេះទេ ពិតជាប្រឈមជីវភាពហើយនាងនឹងស៊ូលំបាកគ្រប់យ៉ាង ដើម្បីអនាគតក្រុមគ្រួសារប្អូនៗ ។
អតីតសិស្សវិទ្យាល័យ «ជាស៊ីមសាមគ្គី» អំឡុងឆ្នាំ២០១៤រូបនេះថ្លែងទៀតថា ការបោះជំហ៊ានចូលសិល្បៈពីមុនមានអ្នកហាមដោយសារ តែប៉ាម៉ាក់នាងខ្លាចមានពាក្យមិនល្អមកលើតារាស្រីព្រោះមហាជនច្រើនតែយល់ថា នារីសិល្បៈចូលសិល្បៈដំបូងអត់លុយតែងខ្លួនអត់ឡានជិះ បើផ្លាស់ប្តូរឡូយឆាយច្បាស់ជាយកប្តីគេ ឬមានថៅកែចិញ្ចឹម ឬស្រីកំណាន់របស់លោកធំណាម្នាក់ ។
ស្រីឡាងនិយាយថា នាងបានព្យាយាមគិតហើយកាន់តែគេចពីចំណុចទាំងនេះ ដើម្បីជំនះពាក្យមាក់ងាយ ហើយរឿងពាក់ព័ន្ធស្នេហានោះក៏នាងមិនបណ្តោយខ្លួនទៅប្រឡាក់ប្រឡូកជាមួយបុរសណាឡើយ ទោះជាសព្វថ្ងៃនេះចូលដល់វ័យ២៣ឆ្នាំល្មមពិចារណារឿងជីវិតផ្ទាល់ខ្លួនបានក៏ដោយ ។ ជាកូនទី២ ក្នុងចំណោមបងប្អូន៦នាក់ កញ្ញាតារាសម្តែងរូបនេះបានតាំងជំហរថា សេ្នហានាងបានចាត់ទុកលើពេលវេលាកំណត់ បើអោយយកពេលនេះ គឺច្រានចោលព្រោះក្នុងចិត្តមានតែគិតបែបណាជួយអ្នកផ្ទះសិនរឿងប្តីទុកមួយដុំបើដល់គូនាងបាក់ចិត្តដែរនោះ គឺនាងនឹងពិចារណាក្នុងចិត្តមិនខាន ។
ទៅពេលខាងមុខនេះស្រីឡាងគ្រោងចូលសិក្សានាសាកលវិទ្យាល័យណាមួយនៃក្រុងភ្នំពេញព្រោះចាប់តាំងពីចប់ថ្នាក់បាក់ឌុបមកនាងបានផ្អាកការរៀនបន្ត ដើម្បីចុះមកជួយរកការងារសម្រួលដល់គ្រួសារដោយចាប់យកសិល្បៈ ។ តាមផែនការក្រៅពីប៉ងលើផ្នែកសិក្សាថ្នាក់បរិញ្ញាបត្រស្រីឡាងក៏ចង់បង្កើតមុខរបរតាមលទ្ធភាព ដូចជា ចង់បើកហាងលក់ខោអាវបែបយុវវ័យ និងគ្រឿងលម្អកាយផ្សេងៗ ។ នាងកំពុងតែបង្កើនការសម្តែងឲ្យកាន់តែខ្លាំង ព្រមទាំងរំពឹងថា ទីផ្សារសិល្បៈនឹងលូតស្ទុះជាបន្តទៀត ៕
ចែករំលែកព័តមាននេះ