ខេត្តសៀមរាប ៖ កម្លាំងការិយាល័យប្រឆាំងគ្រឿងញៀនបានចូលរួមសហការជាមួយកម្លាំងការិយាល័យការពារនិងអន្តរាគមន៍ និងកម្លាំងមូលដ្ឋានទាំង៣សង្កាត់ផ្សេងគ្នា ក្នុងរយៈពេល៣ថ្ងៃ នោះ គឺសង្កាត់សាលាកំរើក សង្កាត់ជ្រាវ និងសង្កាត់ស្លក្រាម ក្រុងសៀមរាប បានចុះបង្ក្រាបករណីរក្សាទុក និងជួញដូរដោយខុសច្បាប់នូវសារធាតុញៀន រហូតឃាត់ខ្លួនជនសង្ស័យជាបន្តបន្ទាប់ចំនួន១២នាក់យកមកសួរនាំនៅការិយា
ល័យជំនាញ ដើម្បីរៀបចំកសាងសំណុំរឿងបញ្ជូនទៅតុលាការចាត់ការបន្តតាមនីតិវិធីច្បាប់។
ប្រតិបត្តិការបង្ក្រាបករណីជួញដូរ និងប្រើប្រាស់គ្រឿងញៀននោះធ្វើឡើងក្នុងសង្កាត់ចំនួន៣ផ្សេងគ្នា ក្នុងក្រុងសៀមរាប ខេត្តសៀមរាប កាលពីថ្ងៃទី២២-២៣ និង២៤ ខែធ្នូ ឆ្នាំ ២០១៨ ។
តាមប្រភពពីសមត្ថកិច្ចជំនាញបានប្រាប់ថា ក្នុងប្រតិបត្តិការចុះបង្ក្រាបករណីជួញដូរ ចាត់ចែង និងប្រើប្រាស់គ្រឿងញៀនខាងលើនោះ ដោយមានការសហការគ្នាពីកម្លាំងការិយាល័យការពារនិងអន្តរាគមន៍ ក៏ដូចជា កម្លាំងមូលដ្ឋានទាំង៣សង្កាត់ គឺសង្កាត់សាលាកំរើក សង្កាត់ជ្រាវ និងសង្កាត់ស្លក្រាម ក្រុងសៀមរាប ទើបកម្លាំងជំនាញឈានដល់ធ្វើការឃាត់ខ្លួនជនសង្ស័យប្រុស ស្រីចំនួន១២នាក់ ។
ក្រោយពេលឃាត់ខ្លួន កម្លាំងជំនាញបានធ្វើការដកហូតវត្ថុតាងរួមមាន ម្សៅមេតំហ្វេតាមីនប្រភេទទឹកកក ចំនួន២៤កញ្ចប់ ស្មើនឹងទំងន់២៧,៨ក្រាម (ថ្លឹងទាំងសំបក) ទូរស័ព្ទដៃចំនួន១៣គ្រឿង ដាវដែកចំនួន៤ដើម និងជញ្ជីងថ្លឹង១ ព្រមទាំងឧបករណ៍ប្រើប្រាស់និងសម្ភារៈមួយចំនួនធំ។
បច្ចុប្បន្ន ជនសង្ស័យប្រុសស្រីទាំង១២នាក់ និងវត្ថុតាង ត្រូវបានកម្លាំងជំនាញរៀបចំកសាងសំណុំរឿង
បញ្ជូនទៅសាលាដំបូង នៅថ្ងៃទី២៥ខែធ្នូ ឆ្នាំ ២០១៨ ដើម្បីចាត់ការទៅតាមផ្លូវច្បាប់ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ