ខេត្តព្រះសីហនុ ៖ ហេតុការណ៍ភ្ញាក់ផ្អើលមួយ បានកើតឡើងបន្ទាប់ពីមានដំណឹងថា មានចោរឡើងតាមដំបូលផ្ទះសំណាក់ចំប៉ីផ្សារលើ ចូលលួចលុយក្នុងធនាគារABA ដែលនៅជាប់គ្នានោះ តែការពិតជននោះព្យាយាមរត់គេចខ្លួនពីផ្ទះសំណាក់ចំប៉ីផ្សារលើ ដែលខ្លួនបានបន្លំលួចសម្ភារភ្ញៀវ ដែលដេកបន្ទប់ក្បែរគ្នា…
ខេត្តព្រះសីហនុ ៖ ហេតុការណ៍ភ្ញាក់ផ្អើលមួយ បានកើតឡើងបន្ទាប់ពីមានដំណឹងថា មានចោរឡើងតាមដំបូលផ្ទះសំណាក់ចំប៉ីផ្សារលើ ចូលលួចលុយក្នុងធនាគារABA ដែលនៅជាប់គ្នានោះ តែការពិតជននោះព្យាយាមរត់គេចខ្លួនពីផ្ទះសំណាក់ចំប៉ីផ្សារលើ ដែលខ្លួនបានបន្លំលួចសម្ភារភ្ញៀវ ដែលដេកបន្ទប់ក្បែរគ្នា ហើយបែកការណ៍ ។
ដោយសារតែកើតហេតុបែបនេះ ទើបសមត្ថកិច្ចមាននគរបាលខេត្ត រួមជាមួយកម្លាំងកងរាជអាវុធហត្ថខេត្តសរុបប្រមាណជិត៣០នាក់ បានមកឡោមព័ទ្ធជុំវិញ ធនាគារABA និងមួយចំនួនចូលធ្វើការឆែកឆេរ ទើបឈានដល់ការឃាត់ខ្លួនជនសង្ស័យបានភ្លាមៗ ។
ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង១១ និង២០នាទីព្រឹកថ្ងៃទី២៤ ខែធ្នូ នៅធនាគារABA ស្ថិតនៅតាមវិថីឯករាជ្យ ត្រង់ចំណុចផ្លូវបំបែកជា៤ ក្នុងភូមិ២ សង្កាត់លេខ២ ក្រុងព្រះសីហនុ ។មន្ត្រីសមត្ថកិច្ចឲ្យដឹងថា មុនពេលត្រូវចាប់ខ្លួន ជននេះបានក្លែងខ្លួនជាសមត្ថកិច្ចចូលសម្រាកក្នុងផ្ទះសំណាក់ចំប៉ីផ្សារលើ ហើយបន្លំលួចសម្ភារភ្ញៀវ ដែលសម្រាកបន្ទប់ក្បែរគ្នា ។
បន្ទាប់មក ជននេះបានលួចចូលទៅធនាគារABA សាខាក្រុងព្រះសីហនុ ដែលនៅជាប់គ្នា ស្ថិតក្នុងភូមិ សង្កាត់ខាងលើ តែក៏ត្រូវកម្លាំងនគរបាលព្រហ្មទណ្ឌកម្រិតស្រាល ដឹកនាំដោយលោកវរសេនីយ៍ទោ លី សុខហ៊ី នាយការិយាល័យ សហការជា មួយនគរបាលប៉ុសិ៍្តសង្កាត់លេខ២ ធ្វើការឃាត់ខ្លួនបាន ។
លោកវរសេនីយ៍ទោ លី សុខហ៊ី ថ្លែងថា ការឡោមព័ទ្ធចាប់ខ្លួនជនសង្ស័យខាងលើនេះ គឺបន្ទាប់ពីម្ចាស់ផ្ទះសំណាក់យីហោចំប៉ីផ្សារលើបានរាយការណ៍មកថា មានជនម្នាក់ស្លៀកពាក់ឯកសណ្ឋានជានគរបាល បានចូលមកស្នាក់នៅក្នុងផ្ទះសំណាក់ ហើយធ្វើសកម្មភាពបន្លំចូលក្នុងបន្ទប់ភ្ញៀវ ដែលស្នាក់នៅក្នុងផ្ទះសំណាក់ដែរនោះ លួចយកសម្ភារមួយចំនួន ។ បន្ទាប់ពីមានការភ្ញាក់ផ្អើលថា ភ្ញៀវនៅក្នុងផ្ទះសំណាក់បាត់សម្ភារ ទើបម្ចាស់ផ្ទះសំណាក់ឆែកកាមេរ៉ាសុវត្ថិភាពដឹងថា គឺភ្ញៀវដែលស្នាក់នៅបន្ទប់លេខ១១ជាន់ទី២ជាអ្នក
លួច ។
នៅពេលនោះ បុគ្គលិកក៏បានទៅគោះទ្វារបន្ទប់ជនសង្ស័យស្នាក់ ប៉ុន្តែត្រូវជននេះ ប្រវាយប្រតប់រត់គេចខ្លួន ដោយលោតផ្លោះដំបូលឆ្លង មកដំបូលរបស់ធនាគារ ABA ធ្វើឲ្យមហាជនជាច្រើនមានការភ័ន្តច្រឡំថាមានចោរចូលក្នុងធនាគារ ABA ។
លោកនាយការិយាល័យបន្តថា ក្រោយពីមានបទបញ្ជាបន្ទាន់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត និងលោកឧត្តមសេនីយ៍ត្រី កុល ផាលី ស្នងការរងទទួលផែនព្រហ្មទណ្ឌ កម្លាំងការិយាល័យព្រហ្មទណ្ឌកម្រិតស្រាលដឹកនាំដោយរូបលោកផ្ទាល់ បានសហការជាមួយនគរបាលប៉ុស្តិ៍សង្កាត់លេខ២ បានធ្វើការឡោមព័ទ្ឋទីតាំងកើតហេតុ ដោយធ្វើការឆែកឆេររហូតរកឃើញជនសង្ស័យដែលចូលទៅសម្ងំលាក់ខ្លួនក្នុងស៊ីទែនទឹក ។
ក្នុងការឆែកឆេរនេះ សមត្ថកិច្ចបានប្រទះឃើញជនម្នាក់និងស្ត្រីម្នាក់ផងដែរ កំពុងសេពគ្រឿងញៀនក្នុងផ្ទះសំណាក់ និងបានឃាត់ខ្លួនបញ្ជូនមកកាន់ស្នងការដ្ឋាននគរបាលខេត្តជាមួយគ្នា ។ ជនសង្ស័យក្នុងអំពើចោរ កម្មនេះឈ្មោះ សេង វិឆ័យ ភេទប្រុស អាយុ២៧ឆ្នាំ មានទីលំនៅឯរាជធានីភ្នំពេញ រួមជាមួយវត្ថុតាងដែលសមត្ថកិច្ចរកឃើញរួមមាន អាវធំពណ៌ខ្មៅ មានចារឹកអក្សរ POLICE ម៉ូតូពណ៌ខ្លាញ់ក្តាមមួយគ្រឿង គ្មានផ្លាកលេខ អាយកូម១គ្រឿង ស្បែកជើងកវែងចំនួន១ អាវឯកសណ្ឋាននគរបាលគ្មានស្លាកឈ្មោះមួយសម្រាប់ ។
យោងតាមចម្លើយសារភាពរបស់ជនសង្ស័យបានឲ្យដឹងថា រូបគេពិតជាបានចូលលួចយកសម្ភាររបស់ភ្ញៀវក្នុងផ្ទះសំណាក់ប្រាកដមែន ដោយសារតែឃើញទ្វារបន្ទប់របស់ភ្ញៀវនោះបើកចំហ ។ឯចំពោះឯកសណ្ឋាននគរបាលគឺរូបគេបានសុំពីមន្ត្រីនគរបាលចូលនិវត្តន៍ដែលគេទុកចោល ហើយដោយខ្លួនស្រឡាញ់មុខងារជានគរបាល ទើបយកមកពាក់បែបនេះទៅ ប៉ុន្តែពុំបានពាក់ស្លាកឈ្មោះទេ ។
ចំណែកជនប្រុសស្រី២នាក់ ដែលត្រូវបានសមត្ថកិច្ចឃាត់ខ្លួនក្នុងហេតុការណ៍នេះដែរគឺជាមុខសញ្ញាសេពនិងចែកចាយគ្រឿងញៀន ដែលម្នាក់ឈ្មោះ លន់ ផាន់នី ភេទប្រុស អាយុ៣៦ ឆ្នាំ មុខរបរមិនពិតប្រាកដ មានស្រុកកំណើតនៅខេត្តអាងយ៉ាង ប្រទេសវៀតណាម និងម្នាក់ទៀតឈ្មោះ លី ធីទៀង ភេទស្រី អាយុ២៥ឆ្នាំ មុខរបរមិនពិតប្រាកដ មានស្រុកកំណើតជាមួយគ្នា និងជាជនជាតិវៀតណាម ។ ជនទាំង២នាក់ ក៏ជាមុខសញ្ញាដែលសមត្ថកិច្ចកំពុងតាមប្រមាញ់ផងដែរ ៕
ចែករំលែកព័តមាននេះ