ខេត្តមណ្ឌលគិរី ៖ អាជ្ញាធរបានចុះហាមឃាត់និងស្នើឱ្យបងប្អូនខ្មែរ និងអ៊ិស្លាមចំនួន២១៦គ្រួសារ ចាកចេញពីដីសម្បទានសេដ្ឋកិច្ចប៉ាស៊ីហ្វិកហ្គ្រែន ក្រោយពីរកឃើញថា ពួកគាត់ទាំងនោះបានរំលោភយកដីក្រុមហ៊ុនដោយខុសច្បាប់ចំនួន៨០០ហិកតា ។ ប្រតិបត្តិការនេះ បានធ្វើឡើងកាលពីថ្ងៃទី២៣…
ខេត្តមណ្ឌលគិរី ៖ អាជ្ញាធរបានចុះហាមឃាត់និងស្នើឱ្យបងប្អូនខ្មែរ និងអ៊ិស្លាមចំនួន២១៦គ្រួសារ ចាកចេញពីដីសម្បទានសេដ្ឋកិច្ចប៉ាស៊ីហ្វិកហ្គ្រែន ក្រោយពីរកឃើញថា ពួកគាត់ទាំងនោះបានរំលោភយកដីក្រុមហ៊ុនដោយខុសច្បាប់ចំនួន៨០០ហិកតា ។ ប្រតិបត្តិការនេះ បានធ្វើឡើងកាលពីថ្ងៃទី២៣ ខែធ្នូ នៅភូមិសាស្ត្រឃុំរយ៉ ស្រុកកោះញែក ។
លោក ថាវ អឿង អភិបាលរងស្រុកកោះញែក ថ្លែងថា «ក្រុមការងារស្រុកបានចុះទៅផ្សព្វផ្សាយដល់ពួកគាត់ជុំវិញបញ្ហាចូលទៅកាន់កាប់ដីចំណុចខាងលើនោះ ជាដីរបស់ក្រុមហ៊ុនដីសម្បទានសេដ្ឋកិច្ច ដូច្នេះតម្រូវឲ្យពួកគាត់នាំគ្នាចាកចេញពីទីតាំងនោះ វិលត្រឡប់ទៅលំនៅឋានដើមវិញ ចៀសវាងប្រឈមនឹងផ្លូវច្បាប់»។
លោកអភិបាលរងស្រុកបន្តថា «ក្រុមប្រជាពលរដ្ឋទាំងនោះ មិនបានសុំការអនុញ្ញាតណាមួយពីអាជ្ញាធរមូលដ្ឋាន ដើម្បីមានសិទ្ធិចូលទៅរស់នៅលើដីតំបន់ខាងលើឡើយ…ដោយពួកគាត់អះអាងថា ដីនោះមិនមានពាក់ព័ន្ធនឹងអ្នកណាឡើយ ជាដីព្រៃ ទើបសម្រេចនាំគ្នាកាប់រុករានរស់នៅតែម្តង» ។
បើតាមការបញ្ជាក់របស់លោក ថាវ អឿង ប្រជាពលរដ្ឋដែលចូលទៅចាប់ដីនោះភាគច្រើនមកពីខេត្តកំពង់ចាម មានខ្មែរអ៊ិស្លាមចំនួន១២៧គ្រួសារ ខ្មែរចំនួន៨៩គ្រួសារ កំពុងកាន់កាប់ដីចំនួន៨០០ហិកតាក្នុងទំហំផ្ទៃដីរបស់ក្រុមហ៊ុនចំនួន១ម៉ឺនហិកតា ។
ដោយឡែក ក្រុមប្រជាពលរដ្ឋបានលើកឡើងថា «ពួកគាត់មិនអាចចាកចេញពីទីនេះបានឡើយ ស៊ូស្លាប់រស់នៅទីនេះ ព្រោះតាំងពីពេលពួកគាត់ចូលរស់នៅដំបូងរហូតមកដល់ពេលនេះអស់រយៈពេល៣ឆ្នាំហើយ មិនដែលឃើញក្រុមហ៊ុនចុះទៅបោះព្រំដីថាជាកម្មសិទ្ធិឡើយ ហើយក៏មិនដែលមានទំនាស់ជាមួយក្រុមហ៊ុនដែរ…អុីចឹងពួកគាត់នឹងបន្តរស់នៅតំបន់នេះ» ។
ចំណែកអាជ្ញាធរបានប្រាប់ប្រជាពលរដ្ឋឲ្យរុះរើចេញពីទីតាំងនេះ ដោយទុកពេលរយៈពេល៣ថ្ងៃដើម្បីធ្វើការរុះរើផ្ទះដែលបានសង់ខុសច្បាប់ដោយខ្លួនឯង មុននឹងអាជ្ញាធរចាត់វិធានការតាមផ្លូវច្បាប់ ។លោក សុង ឃាង ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានឲ្យដឹងថា «ជាគោលការណ៍គឺអនុវត្តតាមច្បាប់ ដោយសារថាដីនៅក្រុមហ៊ុនប៉ាស៊ីហ្វិកហ្គ្រែននេះបានចុះបញ្ជីរួចរាល់ហើយ ។
បើតាមប្រសាសន៍របស់លោកអភិបាលខេត្ត ត្រូវតែអនុវត្តទៅតាមផ្លូវច្បាប់ ដោយទុកពេលឱ្យប្រជាពលរដ្ឋរយៈពេល៣ថ្ងៃដើម្បីធ្វើការរុះរើផ្ទះសម្បែងហើយចាកចេញពីទីតាំងដីរបស់ក្រុមហ៊ុននេះ» ។ លោកបន្តថា ពលរដ្ឋដែលកំពុងរស់នៅទីនេះពុំមែនជាប្រជាពលរដ្ឋដែលរស់នៅក្នុងខេត្តមណ្ឌលគិរីឡើយ ដូច្នេះក្រុមការងារនឹងបន្តការអនុវត្តបទបញ្ជា ក្រោយរយៈពេល៣ថ្ងៃទៀត ។
ក្រុមអ្នកតាមដានលើបញ្ហាបរិស្ថាននិយាយថា បញ្ហាកាប់រានដីព្រៃយកធ្វើជាកម្មសិទ្ធិបានកើតមានយ៉ាងអនាធិបតេយ្យបំផុតនៅខេត្តមណ្ឌលគិរី ដោយដីព្រៃខ្លះត្រូវគេកាប់រង្គាលរាប់ពាន់ហិកតា ក្នុងដែនជម្រកការពារសត្វព្រៃទាំង៥ក្នុងខេត្ត ។ ដោយសារសកម្មភាពកាប់ឈូសឆាយគ្មានលស់មួយថ្ងៃនេះហើយ ទើបធ្វើឲ្យធនធានធម្មជាតិរងការប៉ះពាល់យ៉ាងធ្ងន់ធ្ងរ ៕
ចែករំលែកព័តមាននេះ