មន្ត្រីនគរបាលអន្តោប្រវេសន៍ និងប្តីចុះពីលើយន្តហោះប៊ិះអស់ជាង១ពាន់ដុល្លារ (មានវីដេអូ)
- ភ្នំពេញ
រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពឆក់កាបូបពីស្ត្រីជាមន្ត្រីនគរបាលអន្តោប្រវេសន៍ម្នាក់ដែលកំពុងដើរឆ្លងផ្លូវ២នាក់ប្ដីបានសម្រេច រួចបានជិះម៉ូតូគេចខ្លួន ប៉ុន្តែត្រូវស្ត្រីរងគ្រោះស្រែក«ចោរៗ»បង្កការភ្ញាក់ផ្អើលដល់អ្នករត់ម៉ូតូឌុបជាច្រើននាំគ្នាជិះម៉ូតូដេញតាម រហូតធ្វើឲ្យជនសង្ស័យផ្ដួលម៉ូតូចោល និងរត់គេចខ្លួនចូលក្នុងស្រះទឹកក្នុងវត្តតាំកសាងខាងត្បូងបាត់ស្រមោល។ ហេតុការណ៍នោះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី២៤ ខែធ្នូ ឆ្នាំ២០១៨…
ហេតុការណ៍នោះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី២៤ ខែធ្នូ ឆ្នាំ២០១៨ នៅតាមមហាវិថីសហព័ន្ធរុស្សី ត្រង់ចំណុចមុខអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិក្បាលដំរី សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះខាងលើឈ្មោះដួង រស្មី ជាមន្ត្រីនគរបាលអន្តោប្រវេសន៍ ហើយនៅក្នុងកាបូបរបស់គាត់មានលុយជាង១ពាន់ដុល្លារ និងឯកសារមួយចំនួន ព្រមទាំងទូរស័ព្ទដៃ២គ្រឿងផងដែរ ប៉ុន្តែត្រូវបានជនសង្ស័យបោះចោល និងត្រូវបាននគរបាល និងក្រុមអ្នករត់ឌុបយកប្រគល់ឲ្យគាត់វិញ ឃើញតែលុយ និងឯកសារប៉ុណ្ណោះ រីឯទូរស័ព្ទបាត់រកមិនឃើញឡើយ ។ ចំណែកជនសង្ស័យម្នាក់ខាងលើស្លៀកពាក់សុីវិលជិះម៉ូតូ១គ្រឿងម៉ាកស៊ុយហ្សុ៊យគីនិច ពណ៌ខ្មៅ ស៊េរីឆ្នាំ២០១៩ អត់ស្លាកលេខ។
តាមប្រភពព័ត៌មានបានឲ្យដឹងថា នៅមុនពេលកើតហេតុ ស្ត្រីរងគ្រោះ និងប្ដីទើបត្រឡប់មកពីប្រទេសថៃហើយក្រោយចុះពីយន្តហោះបានកាន់កាបូបដើរឆ្លងកាត់ផ្លូវ២នាក់ប្ដី ក្នុងទិសដៅពីត្បូងទៅជើង (ពីអាកាសយានដ្ឋានអន្តរជាតិភ្នំពេញចូលទៅអគ្គនាយកដ្ឋានអន្តោប្រវេសន៍) ស្រាប់តែជនសង្ស័យម្នាក់ជិះម៉ូតូធ្វើដំណើរក្នុងទិសដៅពីកើតទៅលិចបានទៅដល់ធ្វើសកម្មភាពឆក់យកកាបូបបានសម្រេច រួចបានជិះម៉ូតូគេចខ្លួនចូលតាមច្រកវត្តតាំកសាងខាងត្បូង ស្ថិតនៅក្នុងភូមិចំការឪឡឹក២ សង្កាត់កាកាប២ ខណ្ឌពោធិ៍សែនជ័យ ។
ប្រភពដដែលបានបន្តថា ពេលនោះសកម្មភាពរបស់ជនសង្ស័យត្រូវបានក្រុមអ្នករត់ម៉ូតូឌុបឃើញ គួបផ្សំជាមួយសម្រែករបស់ជនរងគ្រោះស្រែកថា«ចោរៗ»ផងនោះ ទើបអ្នករត់ម៉ូតូឌុបនាំគ្នាដេញតាមចាប់ជនសង្ស័យខាងលើ លុះទៅដល់ក្នុងវត្តតាំកសាងខាងត្បូង ជនសង្ស័យបានផ្ដួលម៉ូតូចោល ព្រមទាំងបោះចោលកាបូបដែលឆក់ពីស្ត្រីរងគ្រោះនោះ បន្ទាប់មកជនសង្ស័យបានរត់ចុះទៅក្នុងស្រះទឹកក្នុងវត្តខាងលើ។
ប្រភពខាងលើបានបញ្ជាក់ទៀតថា ពេលនោះក្រុមអ្នករត់ឌុប រួមជាមួយកម្លាំងនគរបាលប៉ុស្តិ៍កាកាប កម្លាំងនគរបាលផ្នែកព្រហ្មទណ្ឌខណ្ឌពោធិ៍សែនជ័យ និងប្រជាពលរដ្ឋបាននាំគ្នាធ្វើការឡោមព័ទ្ធចំណុចកើតហេតុនោះរយៈពេលជិត២ម៉ោង ប៉ុន្តែរកមិនឃើញជនសង្ស័យឡើយ ទើបនគរបាល និងអ្នករត់ឌុបយកកាបូបដែលជនសង្ស័យបោះចោលប្រគល់ជូនស្ត្រីរងគ្រោះវិញ ប៉ុន្តែបាត់ទូរស័ព្ទដៃ២គ្រឿង នៅសល់តែលុយជាង១ពាន់ដុល្លារ និងឯកសារមួចំនួនប៉ុណ្ណោះ ។
ក្រោយពេលកើតហេតុ សមត្ថកិច្ចបានយកម៉ូតូដែលជនសង្ស័យរត់ចោល ព្រមទាំងនាំស្ត្រីរងគ្រោះទៅកាន់ផ្នែកព្រហ្មទណ្ឌខណ្ឌពោធិ៍សែនជ័យដើម្បីសាកសួរ និងកសាងសំណុំរឿងស្រាវជ្រាវដើម្បីតាមរកចាប់ខ្លួនជនសង្ស័យខាងលើមកចាត់ការតាមច្បាប់ ៕
ចែករំលែកព័តមាននេះ