រាជធានីភ្នំពេញ ៖ បើទោះជារាជរដ្ឋាភិបាលមានគោលនយោបាយគាំទ្រលើការអភិវឌ្ឍលំនៅឋានតម្លៃសមរម្យក្ដី ប៉ុន្ដែគិតមកដល់ដំណាច់ឆ្នាំនេះ មានក្រុមហ៊ុនតិចតួចប៉ុណ្ណោះ ដែលបានប្រកាសបោះទុនវិនិយោគសាងសង់លំនៅឋានបែបនេះ លក់ជូនប្រជាពលរដ្ឋ ខណៈក្រុមហ៊ុនមួយចំនួនទៀតនៅរារែក ហាក់មិនទុកចិត្តលើទីផ្សារលំនៅឋានបែបនេះ ។
បើតាមលោក ហ៊ី ចិន្តា អគ្គនាយករងលំនៅឋាននៃក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា មកដល់ពេលនេះ អត់ទាន់មានក្រុមហ៊ុនថ្មីណាផ្សេងមកចុះអនុស្សរណៈប្រកាសសាងសង់លំនៅឋានតម្លៃសមរម្យ ក្រៅពីក្រុមហ៊ុនចំនួន៣ដែលបានធ្វើជាមួយអគ្គនាយកដ្ឋានលំនៅឋានរបស់ក្រសួងឡើយ ។ ទោះបីយ៉ាងណា កន្លងមកក៏មានក្រុមហ៊ុនថ្មីៗមួយចំនួនបានមកពិភាក្សាដែរ តែហាក់ពុំទាន់សម្រេចចិត្តវិនិយោគលើគម្រោងបែបនេះនៅឡើយ។ ការរារែកនេះ លោកយល់ថា អាចមកពីកត្តាមិនទទួលបានប្រាក់ចំណេញ គួបផ្សំនឹងដីឡើងថ្លៃ ។
លោក ហ៊ី ចិន្តា បន្ដថា ៖« ជាធម្មតា ក្រុមហ៊ុនវិនិយោគធំៗគេតែងតែសិក្សាលម្អិត និងវាយតម្លៃជាមុន បើរកឃើញថាទទួលបានផលចំណេញ ទើបគេធ្វើ ពួកគេមិនគិតដូចយើងច្បោលៗនោះទេ »។ លោកថា ៖« ក្រុមហ៊ុនធំៗ គេគិតខ្លាំងណាស់ពេលដាក់ទុនវិនិយោគទៅ វាផ្តល់ផលប៉ះពាល់អ្វីទៅដល់ចំណូលរបស់ក្រុមហ៊ុន ។ ម្យ៉ាងទៀត នៅប្រទេសយើង តម្លៃដីឡើងថ្លៃដែលធ្វើឱ្យគាត់មានការពិបាកក្នុងការទិញដីសម្រាប់សាងសង់ »។
តាមការបញ្ជាក់ពីមន្ត្រីជំនាញរូបនេះ កន្លងមកក្រុមហ៊ុនលី ហួរ និងក្រុមហ៊ុន ម៉ុង ឫទ្ធី មានគម្រោងមកពិភាក្សា ធ្វើផ្ទះតម្លៃថោកសមរម្យលក់ជូនប្រជាពលរដ្ឋ ប៉ុន្ដែរហូតមកដល់ពេលនេះ ក៏ស្ងាត់ទៅវិញ ។
លោកអគ្គនាយករងលំនៅឋាន យល់ថា ការកើនឡើងនៃតម្លៃដីធ្លីក៏ជាការរាំងស្ទះដល់ផែនការរបស់ក្រុមហ៊ុនដែរ បើទោះបីជាពួកគាត់មានបំណងចង់ជួយអភិវឌ្ឍន៍លំនៅឋានតម្លៃសមរម្យនេះក៏ដោយ ។ ម្យ៉ាងវិញទៀត សព្វថ្ងៃមានក្រុមហ៊ុនវិនិយោគខ្លះ បើទោះបីជាពួកគេមិនប្រកាសពីការអភិវឌ្ឍគម្រោងលំនៅឋានតម្លៃសមរម្យក្ដី ប៉ុន្ដែពួកគេកំពុងសាងសង់លំនៅឋានដែលមានតម្លៃមួយអាចឲ្យពលរដ្ឋទទួលយកបាន និងមានលក្ខខណ្ឌបង់រំលស់ផ្ទះងាយស្រួលទៀត ។
នាយកក្រុមហ៊ុន Century 21 Fortuna Investment និងជាអ្នកជំនាញអចលនទ្រព្យដែលទទួលស្គាល់លំដាប់អន្តរជាតិដំបូងគេនៅកម្ពុជា លោក វ៉ា វីរៈ យល់ឃើញថា ចំណុចប្រឈមដែលក្រុមហ៊ុនថ្មីមិនទាន់ចង់ចូលរួមប្រកាសសាងសង់លំនៅឋានតម្លៃសមរម្យបន្ថែម អាចទាក់ទងលើប្រាក់ចំណេញ ។
លោកបន្ដថា ជាធម្មតា ការវិនិយោគ គេគិតលើប្រាក់ចំណេញ ហើយការវិនិយោគលើលំនៅឋានបែបនេះ មិនសូវទទួលបានប្រាក់ចំណេញប៉ុន្មានទេ តែពួកគាត់ចង់ចូលរួមជួយដល់អភិវឌ្ឍន៍សង្គម ព្រោះប្រជាពលរដ្ឋមានជីវភាពមធ្យម ឬក្រោមមធ្យមកំពុងកើនឡើង និងកំពុងមានតម្រូវការលំនៅឋាន ប៉ុន្ដែបើវិនិយោគទៅមានការខាតបង់ គេមិនធ្វើទេ ។
លោក វ៉ា វីរៈ បានបញ្ជាក់ថា ៖« បើប្រាក់ចំណេញទទួលបានច្រើន អ្នកណាៗក៏សម្រុកវិនិយោគដែរ តែបើមិនចំណេញ គេនឹងងាគទៅវិនិយោគលើវិស័យផ្សេង »។ « ក្រៅពីនេះ នៅមានបញ្ហាផ្សេងៗទៀតដែលត្រូវការរាជរដ្ឋាភិបាលជួយគាំទ្រ ដូចជាការសម្រួលដល់ការបង់ពន្ធ, ការអភិវឌ្ឍទៅក្នុងតំបន់, ការធ្វើកម្មសិទ្ធិ ដើម្បីឱ្យលំនៅឋាននោះមានតម្លៃដែលអាចឱ្យប្រជាពលរដ្ឋទូទៅអាចទទួលយកបាន ពិសេសពលរដ្ឋដែលមានចំណូលមធ្យមនិងក្រោមមធ្យម អាចមានលទ្ធភាពទិញបានច្រើន »។ នេះជាការបញ្ជាក់បន្ថែមពីលោក វ៉ា វីរៈ ។
យ៉ាងណាក៏ដោយ លោកយល់ថា គម្រោងបែបនេះ នឹងមានក្រុមហ៊ុនចូលរួមអភិវឌ្ឍន៍ បន្ថែមទៀត នៅក្នុងរយៈពេល២ឬ៣ឆ្នាំខាងមុខ ព្រោះផ្ទះដែលមានតម្លៃមធ្យម ឬក្រោមមធ្យមនេះ វាជាតម្រូវការទីផ្សារធំ ៕
ចែករំលែកព័តមាននេះ