បន្ទាយមានជ័យ ៖ លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ រួមដំណើរដោយលោក លោកស្រី ឧត្តមសេនីយ៍ វរសេនីយ៍ជាស្នងការរងនៅថ្ងៃទី២៣ ខែធ្នូ ឆ្នាំ២០១៨ បានអញ្ជើញចុះសាកសួរសុខទុក្ខ និងនាំយកថវិកាមួយចំនួនរួមទាំងផ្លែឈើ១កន្ត្រក ភេសជ្ជ១កន្ត្រក ទៅជូនលោក ស្រី ប៉ុក ណាឌី អភិបាលបារងខេត្តបន្ទាយមានជ័យដែលកំពុងសម្រាកព្យាបាលរបួសនៅគ្លីនិកឯកជនមួយ ក្នុងស្រុកមង្គលបូរី ។
ដោយជួបគ្រោះថ្នាក់ចរាចរណ៍នៅផ្លូវជាតិលេខ៥ ស្ថិតក្នុងភូមិសាស្ត្រ ភូមិថ្មកែវ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង កាលពីថ្ងៃទី២០ ខែធ្នូ ឆ្នាំ២០១៨ កន្លងទៅនេះក្នុងដំណើរបេសសកម្មភាពទៅប្រជុំនៅទីក្រុងភ្នំពេញ ។ ដែលក្នុងហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់នេះបណ្តាលឲ្យលោកស្រីអភិបាលរងខេត្តប៉ៃលិនទទួលមរណភាព ខណៈបញ្ជូនទៅសង្គ្រោះដល់មន្ទីរពេទ្យខេត្តកំពុងឆ្នាំង ចំណែកលោកស្រី ប៉ុក ណាឌី អភិបាលរងខេត្តបន្ទាយមានជ័យ រងរបួសធ្ងន់ បច្ចុប្បន្នកំពុងសម្រាកព្យាបាលរបួស នៅគ្លីនិកឯកជន នៅក្នុងស្រុកមង្គលបូរី ។
លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យថ្លែងនាឱកាសនោះ ក៏បានចូលរួមសោកស្តាយនូវហេតុការណ៍ដែលកើតឡើងបណ្តាលឲ្យលោកស្រី សោម មុន្នីរ័ត្ន អភិបាលរងខេត្តប៉ៃលិនទទួលមរណភាព និងលោកស្រីប៉ុក ណាឌី អភិបាលរងខេត្តបន្ទាយមានជ័យទទួលរងរបួសធ្ងន់ដែលនេះ គឺជាឧប្បត្តិវហេតុមួយដែលយើងមើលមិនឃើញ ។
នៅក្នុងឱកាសចុះសាកសួរសុខទុក្ខនេះដែរលោកឧត្តមសេនីយ៍ទោអាត់ ខែម បានមានប្រសាសន៍ថា ពាំនាំនូវការផ្តាំផ្ញើសាកសួរសុខទុក្ខពីសំណាក់ឯកឧត្តមឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជាប្រធានការងារថ្នាក់ជាតិចុះជួយខេត្តបន្ទាយមានជ័យ និងលោកជំទាវ ។ ជាមួយគ្នានោះដែរ ដើម្បីចូលរួមកាត់បន្ថយនូវការចំណាយថវិកាលើកាព្យាបាលនេះដែរ ឯកឧត្តមឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវក៏បានជួយឧបត្ថម្ភថវិកាតាមរយៈលោកចំនួន១.០០០.០០០រៀល (មួយលាន)រៀល ។
លោកឧត្តមសេនីយ៍ស្នងការបានជូនពរសុំឲ្យលោកស្រីអភិបាលរងខេត្តឆាប់ជាសះស្បើយពីជម្ងឺ និងឆាប់មានកម្លាំងពលំមាំមួនឡើងវិញ ដើម្បីបន្តកិច្ចការងារក្នុងខេត្ត ។ នាឱកាសនោះដែរ លោកស្រីក៏បានថ្លែងនូវអំណរគុណដល់លោកឧត្តមសេនីយ៍ស្នងការស្នងការរងដែលឆ្លៀតពេលវេលាដ៏មានតម្លៃមកសួរសុខទុក្ខ និងបាននាំយកថវិកាផ្ទាល់ខ្លួនមកឧបត្ថម្ភដល់លោកស្រី ៕
ចែករំលែកព័តមាននេះ