រាជធានីភ្នំពេញ ៖ ជនសង្ស័យម្នាក់ត្រូវបានអ្នកភូមិចាប់ខ្លួនបានរួចប្រគល់ជូននគរបាល ចំណែកបក្សពួកម្នាក់ទៀតរត់គេចខ្លួនរួច ខណៈពេលជនសង្ស័យទាំង២នាក់នេះ ដើរស្វែងរកសងសឹកគូទំនាស់ដែលបានកាប់ឲ្យរបួសខ្នង ក្នុងកន្លែងផឹកស៊ីមួយកន្លែង ។
ប៉ុន្តែពេលនោះរកមិនឃើញសោះបែរជាឃើញម៉ូតូ១គ្រឿងដែលម្ចាស់ចតទុកចោលអត់ដកសោចេញទៅវិញ ហើយជនសង្ស័យក៏បាននាំគ្នាលួចយកជិះចេញតែត្រូវម្ចាស់ទាន់ទើបស្រែកបង្កការភ្ញាក់ផ្អើល និងចាប់ខ្លួនតែម្ដង ។ ហេតុការណ៍នោះបានកើតឡើងកាលពីវេលាម៉ោង៥ល្ងាចថ្ងៃទី២២ ខែធ្នូ ឆ្នាំ២០១៨ ស្ថិតនៅតាមផ្លូវបេតុង កែងផ្លូវជាតិលេខ៣ ស្ថិតនៅក្នុងភូមិស្រែជម្រៅ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យដែលត្រូវជាប់អន្ទាក់នោះ ឈ្មោះ ពៅ សម្បត្តិ ហៅធី អាយុ២៩ឆ្នាំ មុខរបរ កម្មករសិប្បកម្មផលិតនំបុ័ង ស្នាក់នៅម្ដុំផ្សារតូច សង្កាត់ទួលសង្កែ១ ខណ្ឌឫស្សកែវ រាជធានីភ្នំពេញ ។មានស្រុកកំណើតនៅក្នុងភូមិក្រោលគោ ឃុំទួលក្រសាំង ស្រុកស្វាយជ្រុំ ខេត្តស្វាយរៀង ។ ចំណែកបក្សពួកដែលរត់គេចខ្លួនឈ្មោះ ខ្មៅ អ្នកទាំង២នាក់នេះបានធ្វើសកម្មភាពលួចម៉ូតូ១គ្រឿង ម៉ាកហុងដា ឌ្រីមសេ១២៥ សេរី២០០៩ ពណ៌ខ្មៅ ពាក់ស្លាកលេខ ភ្នំពេញ 1AF-0939 ។ ដែលជាកម្មសិទ្ធិរបស់បុរសម្នាក់ឈ្មោះ ផូ គឹមហាក់ អាយុ៣៥ឆ្នាំ មុខរបរលក់ទឹកកក ស្នាក់នៅក្នុងភូមិស្រែជម្រៅ សង្កាត់ចោមចៅ២ ខណ្ឌពោធិសែនជ័យ និងមានស្រុកកំណើត នៅក្នុងភូមិព្រែកតូច ឃុំព្រែកដាច់ ស្រុកលើកដែក ខេត្តកណ្តាល ។
ជនរងគ្រោះបានប្រាប់ឲ្យនគរបាលឲ្យដឹងថា នៅមុនពេលកើតហេតុបន្ទាប់ពីដឹកទឹកកកដាក់ឲ្យម៉ូយរួច គាត់បានយកម៉ូតូទៅចតទុកនៅមុខផ្ទះ ហើយភ្លេចដកសោចេញបន្ទាប់បានដេកសម្រាក និងមើលទូរស័ព្ទ ។ លុះមួយសន្ទុះក្រោយមកស្រាប់តែឮសម្លេងម៉ូតូជិះចេញដោយមានការសង្ស័យថា ជាម៉ូតូរបស់ខ្លួនគាត់ក៏បានក្រោកស្ទុះរត់ចេញទៅមើល និងដេញតាមធាក់ផ្តួលព្រមទាំងស្រែកថា«ចោរៗ» បង្កឲ្យមានការភ្ញាក់ផ្អើលដល់ប្រជាពលរដ្ឋជួយដេញតាមធ្វើឲ្យជនសង្ស័យមានការភ័យស្លន់ស្លោរ និងព្យាយាមរត់គេចខ្លួន ប៉ុន្តែត្រូវប្រជាពលរដ្ឋចាប់បានម្នាក់ ចំណែកម្នាក់ទៀតគេចខ្លួនទៅបាត់ដោយសុវត្ថិភាព ។
ក្រោយចាប់ខ្លួនជនសង្ស័យបានឲ្យដឹងថា កាលពីជាង២អាទិត្យមុន ពួកខ្លួនបានមានទំនាស់ជាមួយយុវជន១ក្រុម នៅនឹងកន្លែងផឹកស៊ីមួយកន្លែង ស្ថិតនៅក្នុងភូមិស្រែជម្រៅ សង្កាត់ចោមចៅ២ ។ ខណៈនោះទំនាស់បានឈានដល់ការវាយតប់គ្នា ហើយខ្លួនបានចាញ់ដៃភាគីម្ខាងទៀតត្រូវគូទំនាស់កាប់ បណ្ដាលឲ្យរបួសខ្នងដេរជាច្រើនថ្នេរ ។ លុះរហូតដល់វេលាល្ងាចថ្ងៃទី២២ ខែធ្នូ ក៏បានបបួលគ្នាតាមស្វែងរកសងសឹកជនទាំងនោះវិញ ប៉ុន្តែរកមិនឃើញសោះ លុះទៅដល់ត្រង់ចំណុចកើតហេតុ បែរជាប្រទះឃើញម៉ូតូរបស់អ្នកភូមិ១គ្រឿងចតទុកចោលមិនដកសោទាញចេញជិះរត់រត់គេចខ្លួន តែត្រូវបានម្ចាស់ចេញមកទាន់ និងចាប់ខ្លួនបានតែម្ដង៕
ចែករំលែកព័តមាននេះ