រាជធានីភ្នំពេញ ៖ បុរសម្នាក់រងរបួសដោយសារត្រូវគេវ៉ៃនឹងស្នាប់កាំភ្លើងបែកក្បាលហូរឈាមស្រោចខ្លួន ព្រោះតែខឹងសង្សារបស់គេមិនព្រមទៅដេកជាមួយ ករណីនេះបង្កឱ្យមានភ្ញាក់ផ្អើលកាលពីម៉ោង១១និង៤០នាទីយប់ ថ្ងៃទី២២ ខែធ្នូ ឆ្នាំ២០១៨ នៅតាមបណ្ដោយផ្លូវ២៧១ មុខផ្ទះសំណាក់យីហោហ្គ្រីនផាក ស្ថិតក្នុងភូមិ៦ សង្កាត់ស្ទឹងមានជ័យ២ ខណ្ឌមានជ័យ។
បើតាមសម្តីជនរងគ្រោះបានប្រាប់ឱ្យដឹងថា មុនពេលកើតហេតុ មានបុរសម្នាក់ជិះម៉ូតូម៉ាកPCX បានទាក់ទងសង្សាររបស់ខ្លួនឱ្យទៅដេកជាមួយមិត្តភក្តិដែលជាជនដៃដល់ តែនាងប្រកែកមិនព្រមទៅទេ ព្រោះតែនាងមានជនរងគ្រោះជាសង្សារទៅហើយ ។
ជនរងគ្រោះបានបន្តទៀតថា ជនដៃដល់ធ្លាប់តាមស្រលាញ់សង្សារគេជាយូរមកហើយ តែងតែបបួលនាងទៅដេក តែនាងប្រកែករហូត លុះមកដល់ម៉ោងកើតហេតុ ជនដៃដល់បានបើករថយន្តម៉ាកឡិចស៊ីស RX៣៣០ ពណ៌ស មិនចាំស្លាកលេខ មកឈប់នៅមុខផ្ទះសំណាក់ខាងលើ រួចក៏ចុះដើរសំដៅមករូបគេ ហើយបានដកកាំភ្លើងខ្លីវ៉ៃទៅលើជនរងគ្រោះ២ទៅ៣ស្នាប់កាំភ្លើង បណ្ដាលឱ្យបែកក្បាលឈាមហូរស្រោចខ្លួន ភ្លាមៗនោះជនបង្ក រួមនឹងមិតភក្តិបានឡើងបើករថយន្ត និងម៉ូតូគេចខ្លួនបាត់ស្រមោលតែម្តង។
ក្រោយពីកើតហេតុ ជនរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលស្ទឹងមាន២ដើម្បីឱ្យសមត្ថកិច្ចជួយអន្តរាគមន៍ ពេលជនរងគ្រោះទៅប៉ុស្តិ៍ជនរងគ្រោះក៏សុំសមត្ថកិច្ចទៅពេទ្យមើលរបួសសិន ព្រោះអីរូបគេវិលមុខខ្លាំងណាស់ ដោយសារតែឈាមហូរច្រើនពេក ចាំព្រឹកឡើងចាំមកដាក់បណ្ដឹងក៏បាន ៕
ចែករំលែកព័តមាននេះ