បានឮមកថា មានភិក្ខុមួយអង្គបានចូលទៅក្នុងព្រៃឧទ្យានចាស់មួយកន្លែងដើម្បីធ្វើសមណធម៌ ។ លំដាប់នោះមានស្ត្រីម្នាក់រូបស្រស់ឆើតឆាយបានណាត់ពេលនឹងបុរសជាគូស្នេហ៍ឲ្យទៅជួបគ្នានៅក្នុងសួននោះដើម្បីនឹងបានសប្បាយក្នុងមេត្រីភាពដោយនាងទៅចាំមុន ។
តែគួរឱ្យសោកស្តាយបុរសជាគូស្នេហ៍នោះបែរជាមិនបានទៅជួបក្នុងពេលដែលណាត់គ្នា ។ កាលបើនាងរង់ចាំមើលផ្លូវគូកំណាន់យូរពេក កាមរោគក៏ដុតរោលរាលក្នុងសាព៌ាង្គកាយ កើតសេចក្តីអផ្សុកជាអស្ចារ្យ ព្រោះមិនបានគូគាប់មកប្រឡែងលេង ក៏ដើរច្រាសច្រាលៗដូចមាន់រកពង ទើបចូលទៅក្នុងឧទ្យានឃើញព្រះថេរៈកំពុងពែនភ្នែនធ្វើសមណធម៌ ក៏ក្រឡេកមើលនាយអាយក្រែងគេឃើញ។ លុះមិនមានអ្នកដទៃនៅក្បែរក៏គិតថា ភិក្ខុនេះក៏បុរសដែរ អញនឹងប្រឡោមលោកឲ្យភាន់ភាំងដោយសារកាមទេពម្តងមើល។
នាងក្រមុំគិតហើយក៏ទៅឈរចំពីមុខព្រះថេរៈដោយអាក្រាតកាយបញ្ចេញស្ត្រីភាពឲ្យឃើញច្បាស់នឹងភ្នែក ធ្វើអាការៈញ៉េះញ៉ោះជាសញ្ញាបែបឱ្យដៃ រួចទើបស្លៀកពាក់វិញ និងរំសាយសក់ផ្អៀងផ្អងធ្វើកទន់ចុះទន់ឡើងហុចថ្ពាល់ឲ្យលោក រួចក៏ញញឹមប្រិមប្រិយតែម្នាក់ឯង ដើម្បីឲ្យព្រះថេរមានតម្រេកតាមបំណងរបស់ខ្លួនជាស្ត្រីដែលកំពុងស្រវឹងដោយកាមរាគៈ ។
តែជាការឥតប្រយោជន៍សោះ ព្រះថេរៈរឹងរឹតតែកើតសង្វេគមានចិត្តនឿយណាយក្នុងកាមគុណទាំង៥មានរូបជាដើមជាពន់ពេក ទើបលោកគិតថាហេតុនេះដូចម្តេចហ្ន ហើយក៏និមន្តចេញទៅ ។ ឯស្រីស្រស់នោះអស់សង្ឃឹមនឹងបានរួមរ័កមេត្រីស្នេហាក៏វិលត្រឡប់ទៅផ្ទះវិញទាំងក្រៀមក្រំ ។
ចែករំលែកព័តមាននេះ