រាជធានីភ្នំពេញ ៖ បុរសម្នាក់បានស្លាប់ និង២នាក់ទៀតរងរបួសធ្ងន់ ក្រោយពីរថយន្តឡង់គ្រីស័រស៊េរីចាស់មួយគ្រឿងបានបុកឱ្យដួល ហើយមានរថយន្តយីឌុបមួយគ្រឿងទៀតមកពីក្រោយកិនបន្ថែមពីលើ ទៀត បង្កឱ្យភ្ញាក់ផ្អើលកាលពីម៉ោង២០និង១៥នាទីយប់ថ្ងៃទី២២ ធ្នូ ២០១៨នៅលើផ្លូវហាណូយ ស្ថិតក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ។
សពជនរងគ្រោះឈ្មោះ ប៊ុន សេរីរិទ្ធ អាយុ៣០ឆ្នាំ មុខរបរជាងដែក ស្នាក់នៅភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ ចំណែកអ្នករងរបួសធ្ងន់ឈ្មោះ រឿន ភារៈ អាយុ១៨ឆ្នាំ មុខរបរជាងដែក ស្នាក់នៅភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ របួសបែកប្រអប់ដៃឆ្វេងធ្ងន់។
រីឯអ្នកបើករថយន្តយីឌុបមកកិនជនរងគ្រោះរហូតដល់ស្លាប់នោះឈ្មោះ រិន ជឿន អាយុ២៨ឆ្នាំ ស្នាក់នៅភូមិព្រៃស្វាយ ឃុំរាសី ស្រុកសង្កែ ខេត្តបាត់ដំបង។ ចំណែកអ្នកបើករថយន្តឡង់គ្រីស័រ បង្កហេតុមិនស្គាល់អត្តសញ្ញាណ បានបើករថយន្តរត់រហូតដល់ចំណុចដីឡូតិ៍មួយកន្លែងផ្លូវបេតុង ស្ថិតក្នុងភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ ទើបចាប់បាន បន្ទាប់ពីទៅបុកម៉ូតូមួយគ្រឿងទៀត បណ្តាលឱ្យបុរសម្នាក់ឈ្មោះ ធឹម ឈាន អាយុ៣៧ឆ្នាំ មុខរត់ម៉ូតូឌុប រងរបួសធ្ងន់។
ប្រភពឲ្យដឹងថា មុខកើតហេតុ សមត្ថកិច្ចបានប្រកាសតាមវិទ្យុទាក់ទងថា មានរថយន្តមួយគ្រឿងម៉ាកឡង់គ្រីស័រ ពណ៌ខ្មៅ ពាក់ស្លាកលេខ ភ្នំពេញ 2K-0995 បានបើកបុករះអ្នកដំណើរតាមផ្លូវ ហើយមិនព្រមឈប់ព្យាយាមបើកគេចដោយឆ្លងកាត់ខណ្ឌចំនួន៥ ក្នុងនោះមានខណ្ឌ(ទួលគោក សែនសុខ ពោធិ៍សែនជ័យ ព្រែកព្នៅ និងខណ្ឌឫស្សីកែវ) ដោយមានកម្លាំងសមត្ថកិច្ច និងប្រជាពលរដ្ឋដេញតាមពីក្រោយ។
សមត្ថកិច្ចប្រាប់ថា ក្រោយពីដេញឆ្លងកាត់ខណ្ឌសែនសុខ រថយន្តឡង់គ្រីស័រខាងលើបានទៅបុកម៉ូតូឌ្រីមសង់មួយគ្រឿង បណ្តាលឱ្យដួល គាប់ជួនមានរថយន្តយីឌុបម៉ាក FUSO ពណ៌ស ពាក់ស្លាកលេខ ភ្នំពេញ3A-2673 ដឹកទំនិញបើកមកពីក្រោយក៏កិនបន្ថែម បណ្តាលឱ្យអ្នកជិះម៉ូតូអង្គុយក្រោយស្លាប់នៅនឹងកន្លែង ចំណែកអ្នកបើកម៉ូតូរបួសបែកប្រអប់ដៃឆ្វេងធ្ងន់។
សមត្ថកិច្ចបន្តទៀតថា ក្រោយបង្កហេតុប៉ុណ្ណឹង ហើយរថយន្តឡង់គ្រីស័រដែលបង្កគ្រោះថ្នាក់ខាងលើ មិនបានឈប់ទេ ព្យាយាមបើករត់ដោយមានសមត្ថកិច្ចដេញតាមចាប់ពីក្រោយរហូតទៅបុកអ្នកជិះម៉ូតូមួយគ្រឿងទៀត បណ្តាលឱ្យបុរសម្នាក់រងរបួសធ្ងន់នៅភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ ទើបរថយន្តខាងលើរត់លែងរួច ហើយសមត្ថកិច្ចក៏ចាប់អ្នកបើករថយន្តបង្កខាងលើ បញ្ជូនយកទៅការិយាល័យនគរបាលចរសចរណ៍ជើងគោកតែម្តង។ចំណែកសពជនរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសារយកទៅធ្វើបុណ្យនៅវត្តតាំងកសាងខាងត្បូង៕
ចែករំលែកព័តមាននេះ