សុភមង្គលនៃជីវិត គ្មានទេវតា ព្រះឥន្ទ្រ ព្រះព្រហ្មឯណាផ្តល់ឱ្យក្រៅតែអំពីខ្លួនយើងដែលប្រឹងធ្វើប្រឹងសន្សំនោះទេ។ បើយើងប្រព្រឹត្តតែអំពើល្អប្រចាំជាប់ជីវិត ចិញ្ចឹមជីវិតតាមផ្លូវសុចរិតនោះ សិរីសួស្តី សុភមង្គលនៃជីវិតប្រាកដជាកើតមានដល់អ្នកជាក់ជាមិនខាន ។
ពិតណាស់គ្រួសារណាក៏ចង់មានលុយចាយពេញៗដៃ មានទ្រព្យធនច្រើន ពិសេសចង់បានចិត្តស្មោះចំពោះគ្នាទៅវិញទៅមកដើម្បីជីវិតមានសុភមង្គល រស់នៅយូរអង្វែងដែរដូចព្រះបរមសាស្តាព្រះអង្គត្រាស់សម្តែងថា បើយើងចង់បានអាយុវែង ចង់មានទ្រព្យស្តុកស្តម្ភ ចង់ឲ្យមានសេចក្តីសុខនៅក្នុងក្រុមគ្រួសារ ចង់ឲ្យគេមានភាពស្មោះត្រង់នឹងខ្លួនត្រូវធ្វើតែអំពើសុចរិត ហើយត្រូវវៀរចាកអំពើអាក្រក់ទាំង៥ចេញឱ្យអស់ ។
អំពើអាក្រក់ទាំង៥នោះគឺ ១-មិនបៀតបៀនជីវិតអ្នកដទៃគឺមិនសម្លាប់សត្វនាំឲ្យមានធម៌មេត្តាចិត្ត ២-មិនលួចទ្រព្យគេ នាំឲ្យមានធម៌សម្មាអាជីវៈការចិញ្ចឹមជីវិតត្រូវ ៣-មិនប្រព្រឹត្តខុសក្នុងកាម នាំឲ្យយើងមានធម៌សទារសន្តោសៈ សេចក្តីសន្តោស ៤-មិននិយាយកុហក នាំឲ្យមានធម៌ សច្ចៈ ពាក្យពិតត្រង់ និង៥-មិនផឹកនូវទឹកស្រវឹង មិនសេពគ្រឿងញៀននាំឲ្យមានធម៌ សតិសម្បជញ្ជៈ ដឹងខ្លួនគ្រប់ពេលវេលា ។
បុគ្គលណាវៀរឱ្យដាច់ស្រឡះនូវអំពើអាក្រក់ទាំង៥នេះឱ្យអស់ពីចិត្តសន្តាន បុគ្គលនោះនឹងមានពន្លឺសុភមង្គលនៃជីវិតនិងបានជាមាគ៌ាសម្រាប់ជីវិតធ្វើដំណើរទៅកាន់លោកខាងមុខ ឲ្យកាន់តែប្រសើរឡើង ។
ចែករំលែកព័តមាននេះ