រាជធានីភ្នំពេញ ៖ អាចជាសារមួយ សម្រាប់បុរសទាំងឡាយ ដែលឆ្ងាញ់អារឿងត្រេកត្រអាលរកសេវាផ្លូវភេទ ទីបំផុតវិះអស់ម៉ូតូ១គ្រឿង តែចាត់ទុកជាគ្រោះល្អរកឃើញវិញ ។ ជនសង្ស័យម្នាក់ក្នុងចំណោមបក្ខពួក៣នាក់ ត្រូវបានសមត្ថកិច្ចឃាត់ខ្លួន…
រាជធានីភ្នំពេញ ៖ អាចជាសារមួយ សម្រាប់បុរសទាំងឡាយ ដែលឆ្ងាញ់អារឿងត្រេកត្រអាលរកសេវាផ្លូវភេទ ទីបំផុតវិះអស់ម៉ូតូ១គ្រឿង តែចាត់ទុកជាគ្រោះល្អរកឃើញវិញ ។ ជនសង្ស័យម្នាក់ក្នុងចំណោមបក្ខពួក៣នាក់ ត្រូវបានសមត្ថកិច្ចឃាត់ខ្លួន បន្ទាប់ពីឆបោកយកម៉ូតូរបស់អ្នកស្គាល់គ្នាមួយរយៈខ្លីដែលពឹងឲ្យឌុបជូនដើររកសេវាផ្លូវភេទ ហើយជនសង្ស័យជិះយកទៅបាត់មួយយប់ ។
ដោយសារម៉ូតូមាន GPS ស្អែកឡើងរសៀលថ្ងៃទី១៧ ខែធ្នូ ក៏តាមរកឃើញនៅក្រុងដូនកែវ ខេត្តតាកែវ និងឃាត់ខ្លួនបានម្នាក់ រួចនាំមកប្រគល់ឲ្យនគរបាលប៉ុស្តិ៍កាកាប២ ខណ្ឌពោធិ៍សែនជ័យ ចំណែកបក្សពួក២នាក់ទៀតគេចខ្លួនបាត់ ។
ជនសង្ស័យម្នាក់ដែលឃាត់ខ្លួនបាននេះឈ្មោះសាយ នេត អាយុ១៨ឆ្នាំ ជាកម្មករសំណង់ ស្នាក់នៅផ្ទះជួលក្នុងភូមិគោកបញ្ជាន់ សង្កាត់ចោមចៅ២ ខណ្ឌពោធិ៍សែនជ័យ ។ ចំណែកជនសង្ស័យ២នាក់ទៀតដែលគេចខ្លួនបាត់ ១-ឈ្មោះ ង៉ោលភេទប្រុស អាយុ២០ឆ្នាំ មុខរបរនិងស្នាក់នៅមិនពិតប្រាកដ ២-ឈ្មោះ ត្រា ភេទប្រុស អាយុ២៤ឆ្នាំ ស្នាក់នៅមិនពិតប្រាកដ ។
រីឯជនរងគ្រោះឈ្មោះ សូ គោ ភេទប្រុស អាយុ២៥ឆ្នាំ ជាកម្មករស៊ីឈ្នួលលក់អីវ៉ាន់ឲ្យម្ដាយមីង ស្នាក់នៅផ្ទះលេខ១២E0 ផ្លូវលំ ភូមិព្រៃព្រីងត្បូង២ សង្កាត់ចោមចៅ៣ ជិះម៉ូតូម៉ាកហ្សូ៊ម័រអុិច ពណ៌សលាយបៃតងខ្ចី ស៊េរីឆ្នាំ២០១៨ ពាក់ផ្លាកលេខ ភ្នំពេញ ១GN-៧៩៧២ ។តាមម្ចាស់ម៉ូតូឲ្យដឹងថា ុកាលពីវេលាម៉ោង២
រំលងអធ្រាត្រចូលថ្ងៃទី១៧ ខែធ្នូ ក្រោយពីបញ្ចប់បែកវង់ផឹកសុីនៅផ្ទះបងប្អូនក្នុងភូមិព្រៃព្រីងត្បូង២ ក៏បានជិះម៉ូតូទៅរកសេវាផ្លូវភេទ នៅភូមិត្រពាំងជ្រៃ សង្កាត់កាកាប២ ។ ពេលទៅដល់ជួបជនទាំង៣នាក់ខាងលើ ក៏ឈប់សាកសួររកផ្ទះណាមានស្រីបម្រើសេវាផ្លូវភេទ ហើយជនសង្ស័យក៏ប្រាប ់និងទាមទារបើកម៉ូតូឌុបគ្នាទាំង៤នាក់ចេញទៅដល់កន្លែងមានស្រីបម្រើសេវាផ្លូវភេទនោះ ។
នៅពេលទៅដល់ ម្ចាស់ម៉ូតូក៏ចុះភ្លែតចូលទៅដែលហាក់ដូចជាស្រេកឃ្លានសម្បើមណាស់ ទើបបានឱកាសជនសង្ស័យបើកម៉ូតូគេចទៅបាត់លុះស្វាងស្រាភ្លឺភ្លែកក៏បែកញើសប៉ុនៗគ្រាប់ពោតទៅប្តឹងនគរបាលទាំងយប់ ។ តាមប្រភពព័ត៌មានឲ្យដឹងទៀតថា ដោយសារម៉ូតូមានភ្ជាប់ប្រព័ន្ធ GPS ក្រោយពីជនសង្ស័យជិះរត់គេចទៅ ព្រឹកឡើងថ្ងៃទី១៧ ខែធ្នូ ដឹងពីទីកន្លែងនៅក្រុងដូនកែវ ខេត្តតាកែវ ទើបជនរងគ្រោះតាមស្វែងរកឃើញនិងស្រែកឆោឡោផ្អើលដល់សមត្ថកិច្ចខេត្តតាកែវ ជួយចាប់ឃាត់ខ្លួនបានជនសង្ស័យម្នាក់ ៕
ចែករំលែកព័តមាននេះ