ខេត្តកំពង់ស្ពឺ ៖ មនុស្សមួយក្រុមដែលអះអាងថា ខ្លួនជាអ្នកកាសែតនិងអ្នកថតទូរទស្សន៍បានដឹកនាំប្រជាពលរដ្ឋទៅចាប់ដីដែលកំពុងឈូសឆាយសម្រាប់កសាងពន្ធនាគារថ្មី ក្រោមជំនួយរបស់ប្រទេសអូស្ត្រាលី តែបាននាំគ្នារត់បាតជើងសព្រាតបន្ទាប់ពីដឹងថា ថ្នាក់ដឹកនាំខេត្តបញ្ជាឱ្យឃាត់ខ្លួនពួកគេដើម្បីសួរនាំពីរឿងចាប់ដីរដ្ឋចែកគ្នា ។
បើតាមមន្ត្រីសាលាក្រុងច្បារមនបានបង្ហើបថាកាលពីរសៀលថ្ងៃទី១៧ ខែធ្នូ ខណៈគ្រឿងចក្រកំពុងឈូសឆាយដីរដ្ឋមួយកន្លែងមានទំហំ៦ហិកតា នៅក្នុងសង្កាត់ច្បារមន ក្រុងច្បារមនដើម្បីសាងសង់ពន្ធនាគារថ្មីនោះ ស្រាប់តែមានមនុស្សមួយក្រុមជិះសុទ្ធតែរថយន្តទំនើបនិងប្រជាពលរដ្ឋមួយចំនួនមកដល់ ហើយយកកាមេរ៉ាថតចុះថតឡើង ។ ពេលឃើញដូច្នោះមន្ត្រីពន្ធនាគាមួយរូបដែលប្រចាំការនៅទីនោះបានសួរនាំ ហើយមនុស្សទាំងនោះបានបង្ហាញកាតថាខ្លួនជាអ្នកកាសែត ហើយមកនេះគឺមកបែងចែកដីដល់ប្រជាពលរដ្ឋដែលបានចែកគ្នារួចហើយ ។
បន្ទាប់ពីឮថាពួកគេមកបែងចែកដីគ្នានៅដីសម្រាប់សាងសង់ពន្ធនាគារបែបនេះ មន្ត្រីរូបនោះក៏បានរាយការណ៍ទៅថ្នាក់លើ ស្រាប់តែក្រុមមនុស្សទាំងនោះនាំគ្នារត់ចែកជើងគ្នាតែម្តង ។ឃើញដូច្នេះ មន្ត្រីរូបនោះក៏ដណ្តើមយកបានសោរថយន្តដែលពួកគេជិះមក ស្រាប់តែក្រុមអ្នកកាសែតនិងអ្នកថតទូរទស្សន៍ដែលនាំមនុស្សមកចាប់និងបែងចែកដីទាំងនោះ រត់ចោលរថយន្តរបស់ខ្លួន ។
មន្ត្រីដដែលបន្តថា មួយសន្ទុះក្រោយមកលោក ហុក ម៉ារឌី អភិបាលក្រុងច្បារមន ក៏អញ្ជើញទៅដល់និងរាយការណ៍ជូនលោកអភិបាលខេត្ត ដើម្បីសុំគោលការណ៍ ។ ក្រោយពីមានសេចក្តីរាយការណ៍ភ្លាម លោកអភិបាលខេត្តក៏បញ្ជាឱ្យឃាត់ខ្លួនក្រុមអ្នកកាសែតទាំងនោះដើម្បីសួរនាំ តែពួកគេរត់បាត់អស់ទៅហើយដោយបន្សល់តែរថយន្តនៅទីនោះចំនួន២គ្រឿង ។
មានការលើកឡើងថា តាំងពីដីឡើងថ្លៃមកមនុស្សមិនសូវគិតពីផលប្រយោជន៍រួម និងកិត្តិយស សេចក្តីថ្លៃថ្នូររបស់ខ្លួនទេ ធ្វើយ៉ាងណាឲ្យតែបានផលកម្រៃមកខ្លួន បើទោះជាតាមវិធីណាក៏ដោយ ។ ដូចករណីនេះដែលសមត្ថកិច្ចថតបាននិងបញ្ជាក់យ៉ាងច្បាស់ក្រឡែត គឺពួកគេកំពុងយកឈ្មោះអង្គភាពនិងថ្នាក់ដឹកនាំរបស់ខ្លួនទៅជាន់ឈ្លីដោយគ្មានការគិតពិចារណាសោះឡើយ។សកម្មភាពរបស់បុគ្គលដែលខ្វះសីលធម៌និងវិជ្ជាជីវៈនេះហើយ ដែលធ្វើឱ្យតម្លៃរបស់អ្នកសារព័ត៌មានធ្លាក់ចុះព្រោះតែការមិនឲ្យតម្លៃខ្លួនឯង ។
ដោយឡែក មន្ត្រីសាលាក្រុងច្បារមនមួយរូបផ្សេងទៀតក៏បានបង្ហើបដែរថា ក្រុមអ្នកដែលដឹកនាំប្រជាពលរដ្ឋទៅចាប់ដីនិងចែកដីគ្នានេះសុទ្ធតែជាមនុស្សនៅក្នុងខេត្តឃើញមុខរាល់ថ្ងៃមិនគួរណាធ្វើសកម្មភាពផ្ទុយពីច្បាប់បែបនេះសោះ និយាយរួមក្រុមនេះដើរធ្វើតែរបៀបហ្នឹងសឹងតែគ្រប់កន្លែងទូទាំងខេត្តទៅហើយ ។
ពាក់ព័ន្ធនឹងករណីនេះដែរ លោក វុីសំណាងអភិបាលខេត្ត បានប្រាប់ថា លោកកំពុងរវល់សន្និបាតមិនទាន់បានសួរនាំខាងក្រុងនៅឡើយទេ ។ ចំណែករថយន្តដែលម្ចាស់រត់ចោល កំពុងស្ថិតក្នុងការគ្រប់គ្រងរបស់សមត្ថកិច្ចនៅឡើយ មិនទាន់ប្រគល់ឱ្យម្ចាស់វិញទេ ៕
ចែករំលែកព័តមាននេះ