រាជធានីភ្នំពេញ ៖ បុរសវ័យចំណាស់ម្នាក់មិនដឹងថា មានវិបត្តិអ្វីទេ បានធ្វើដំណើរមកលោតសម្លាប់ខ្លួនពីស្ពានជ្រោយចង្វាចាស់ចូលទៅក្នុងទន្លេ តែទំនងជាចេះហែលទឹកខ្លះៗក៏បានអណ្តែត ហើយស្រែកឱ្យគេឯងជួយផងៗ ។ ភ្លាមៗ ត្រូវអ្នកនេសាទនៅក្បែរៗនោះបានចេញទូកទៅជួយស្រង់ពីក្នុងទឹកយកមកដាក់លើច្រាំងវិញ ទាន់ពេលវេលា កុំអីលង់ទឹកស្លាប់បាត់ទៅហើយ ។
ហេតុការណ៍នេះ បានបង្កឱ្យមានការភ្ញាក់ផ្អើលកាលពីវេលាម៉ោង៥និង១៥នាទីល្ងាចថ្ងៃទី២១ ខែធ្នូ នៅគល់ស្ពានជ្រោយចង្វាចាស់ ក្នុងសង្កាត់ស្រះចក ខណ្ឌដូនពេញ ។តាមប្រភពព័ត៌មានពីសមត្ថកិច្ចថា បុរសចំណាស់រូបនេះមិនមានអ្នកណាម្នាក់បានស្គាល់និងដឹងពីអត្តសញ្ញណឡើយ មានអាយុប្រមាណជាង៥០ឆ្នាំ ពាក់អាវពណ៌ទឹកប៊ិក ស្លៀកខោខ្លី ពណ៌ខ្មៅ ជើងត្រឹមជង្គង់ ។ មុនពេលកើតហេតុ គេឃើញគាត់ដើរឡើងទៅលើស្ពានជ្រោយចង្វាចាស ដែលកំពុងធ្វើការជួសជុលនោះ ក្នុងទិសដៅពីខាងលិចទៅខាងកើត ។
ប្រភពដដែលបន្តថា លុះដើរទៅដល់ពាក់កណ្តាលស្ពាន ស្រាប់តែឡើងទៅលើបង្កាន់ដៃ និងលោតចូលទៅក្នុងទឹកទន្លេតែម្តង តែបន្ទាប់មកក៏បានស្រែកឱ្យគេឯងជួយ ។ ភ្លាមនោះ បានឮទៅដល់អ្នកនេសាទខ្មែរអ៊ិស្លាមដែលនៅក្បែរនោះ ប្រទះឃើញកំពុងប្រវេប្រវាហែលនៅក្នុងទន្លេ ក៏នាំគ្នាចេញទូកទៅជួយស្រង់យកមកដាក់នៅមាត់ច្រាំងក្បែរគល់ស្ពានខាងលិច ។
ពាក់ព័ន្ធទៅនឹងករណីបុរសវ័យចំណាស់ម្នាក់មកលោតទឹកធ្វើអត្តឃាតពីលើស្ពានជ្រោយចង្វានេះដែរ មិនមានអ្នកណាម្នាក់បានដឹងថា រូបគាត់មានវិបត្តិអ្វីឡើយ ហើយក៏មិនបានស្គាល់ពីអត្តសញ្ញាណដែរ ដោយសារការសួរនាំគាត់មិន និយាយស្តីអ្វីមួយម៉ាត់សោះ ។
ក្រោយពេលកើតហេតុ បុរសវ័យចំណាស់រូបនេះត្រូវបានគេស្រង់ដាក់លើគោក ហើយសមត្ថកិច្ចមូលដ្ឋានបានហៅរថយន្តសាមុយមកដឹកយកទៅមន្ទីរពេទ្យកាល់ម៉ែត និងធ្វើការស្រាវជ្រាវរកក្រុមគ្រួសារឱ្យមកទទួលយកទៅផ្ទះវិញ ៕
ចែករំលែកព័តមាននេះ