ខេត្តតាកែវ ៖ សេចក្តីរាយការណ៍ឱ្យដឹងថា មនុស្សជាច្រើននាក់បានរត់ចែកជើងគ្នាហុយដីសំពោង ខណៈកំពុងតែលេងល្បែងបញ្ជល់មាន់ ស្រាប់តែលេខចេញមានកម្លាំងសមត្ថកិច្ចចុះទៅបង្ក្រាបភ្លាមៗនោះ ។
ការបង្ក្រាបធ្វើឡើង កាលពីវេលាម៉ោង០៣ និង១០នាទីរសៀលថ្ងៃទី២១ ធ្នូ ស្ថិតនៅក្នុងភូមិត្រពាំងវែង ឃុំព្រៃស្លឹក ស្រុកទ្រាំង ខេត្តតាកែវ។
សេចក្តីរាយការណ៍បន្តថា ការបង្ក្រាបបានដកហូតវត្ថុតាងមាន ម៉ូតូ១៨គ្រឿង, រថយន្តពាក់ស្លាកលេខខ.ម ១គ្រឿង, មាន់១០ក្បាល, កន្ត្រកដាក់មាន់១៧, ជញ្ជីងថ្លឹងមាន់២, កៅអីជ័រ១៨, ចានអាប៉ោង១ឈុត, តុ២ និងរ៉ឺម៉កម៉ូតូចំនួន១ផងដែរ ។ ហើយវត្ថុតាងទាំងអស់ ត្រូវបានយកមករក្សាទុកនៅអធិការដ្ឋាននគរបាលស្រុកទ្រាំង ដើម្បីរង់ចាំម្ចាស់ចូលខ្លួនមកដោះស្រាយតាមនីតិវិធី ។
គួរបញ្ជាក់ថា នៅក្នុងប្រតិបត្តិការបង្ក្រាបទីតាំងល្បែងបញ្ជល់មាន់ខាងលើ គឺដឹកនាំដោយលោក ឈួន ផាន់នី អភិបាលស្រុកទ្រាំង សហការជាមួយលោក សៅ ស៊ិន អធិការរង និងកម្លាំងអធិការនគរបាលស្រុកទ្រាំងជាច្រើនរូប រួមជាមួយប្រជាការពារភូមិផងដែរ ។
ចែករំលែកព័តមាននេះ