រាជធានីភ្នំពេញ ៖ អាជ្ញាធររាជធានីភ្នំពេញ និងអគ្គិសនីកម្ពុជាប្តេជ្ញាយ៉ាងមុតមាំថា ថ្ងៃទី៣១ ខែមករា ឆ្នាំ២០១៩ ខាងមុខនេះតម្លៃភ្លើងតាមបារែមថ្មីរបស់រដ្ឋាភិបាលនឹងធ្លាក់សល់ត្រឹមតម្លៃ៧៤០រៀលក្នុងមួយគីឡូវ៉ាតនឹងដំណើរការនៅតាមផ្សារនានា ពិសេសផ្សារនៅក្នុងរាជធានីភ្នំពេញដើម្បីសម្រួលដល់ការលំបាករបស់ប្រជាពលរដ្ឋទៅតាមអនុសាសន៍សម្តេចតេជោដែលបានដាក់ចេញអោយចុះតម្លៃអគ្គិសនីបន្ថែមនៅថ្ងៃទី០១ ខែមករា ឆ្នាំ២០១៩ ។
នេះជាការបញ្ជាក់របស់អាជ្ញាធររាជធានីភ្នំពេញ និងអគ្គិសនីកម្ពុជាបានធ្វើឡើងកាលពីព្រឹកថ្ងៃទី២១ ខែធ្នូ ឆ្នាំ២០១៨ ក្នុងកិច្ចប្រជុំត្រួតពិនិត្យតម្លៃទឹកអគ្គិសនីក្នុងផ្សាររដ្ឋ ផ្សារវិនិយោគ និងផ្សារឯកជនទាំងអស់នៅក្នុងរាជធានីនៅសាលារាជធានីភ្នំពេញក្រោមអធិបតីភាពលោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកអគ្គិសនីកម្ពុជា និងលោក ឃួង ស្រេង អភិបាលរាជធានីភ្នំពេញ ។
លោក កែវ រតនៈ បានលើកឡើងថា អគ្គិសនីកម្ពុជាមានបញ្ហាប្រឈមច្រើនលើបញ្ហានៃការផ្តល់សេវាអគ្គិសនីជូនប្រជាពលរដ្ឋពិសេសប្រជាពលរដ្ឋដែលរកស៊ីនៅក្នុងផ្សារ និងប្រជាពលរដ្ឋរស់នៅក្នុងខុនដូ ។
សម្រាប់ខុនដូ ភ្លើងដែលផ្គត់ផ្គង់ដោយឯកជនចែកចាយបន្តមានតម្លៃចាប់១៥០០ទៅ២០០០រៀល ហើយបញ្ហានេះយើងបាននឹងកំពុងប្រជុំដើម្បីធ្វើការដោះស្រាយដោយសារតែអគ្គិសនីកម្ពុជាជាអ្នកលក់ដូរភ្លើងជាអ្នកផ្តល់សិទ្ធិចែកចាយជាអ្នកមានសិទ្ធិចែកចាយ និងកំណត់តម្លៃភ្លើងអគ្គិសនី ។
ពាក់ព័ន្ធនឹងបញ្ហានេះលោកស្នើសុំអោយអាជ្ញាធរខណ្ឌ សង្កាត់សហការ ជាមួយអាជ្ញាធរអគ្គិសនីកម្ពុជាក្នុងការធ្វើបញ្ជីតូប និងវិក្ក័យប័ត្រភ្លើងនៅក្នុងផ្សារដើម្បីយើងធ្វើសំណើរមកក្រុងក៏ដូចជាទៅខុទ្ទកាល័យសម្តេចតេជោ និងក្រសួងពាក់ព័ន្ធ ។ នៅពេលសំណើរនេះចុះមកវិញយើងអនុវត្តតែម្តងដើម្បីរអនុវត្តតម្លៃភ្លើងទាបជាងមុនទៅតាមអនុសាសន៍សម្តេចតេជោដែលអោយចុះតម្លៃបន្ថែមនៅថ្ងៃទី០១ ខែមករា ឆ្នាំ២០១៩ ៕
ចែករំលែកព័តមាននេះ