រាជធានីភ្នំពេញ ៖ ពស់ថ្លាន់ធំមួយក្បាល ដែលមានទម្ងន់ប្រមាណជាជាង១៥គីឡូក្រាម និង មានប្រវែងរហូតទៅដល់ជាង២ម៉ែត្រនោះ ត្រូវគេប្រទះឃើញរុំខ្លួននៅជាប់នឹងមែកស្វាយមួយដើម ខណៈស្ត្រីជាអ្នកអនាម័យម្នាក់មកធ្វើការ ហើយងើយរកមើលផ្លែស្វាយ ស្រាប់តែប្រទះឃើញធ្វើឱ្យរូបគាត់ភិតភ័យយ៉ាងខ្លាំងស្ទើរលោះព្រលឹង…
រាជធានីភ្នំពេញ ៖ ពស់ថ្លាន់ធំមួយក្បាល ដែលមានទម្ងន់ប្រមាណជាជាង១៥គីឡូក្រាម និង មានប្រវែងរហូតទៅដល់ជាង២ម៉ែត្រនោះ ត្រូវគេប្រទះឃើញរុំខ្លួននៅជាប់នឹងមែកស្វាយមួយដើម ខណៈស្ត្រីជាអ្នកអនាម័យម្នាក់មកធ្វើការ ហើយងើយរកមើលផ្លែស្វាយ ស្រាប់តែប្រទះឃើញធ្វើឱ្យរូបគាត់ភិតភ័យយ៉ាងខ្លាំងស្ទើរលោះព្រលឹង កាលពីម៉ោង១០និង១៥នាទីព្រឹក ថ្ងៃទី ២១ ខែធ្នូ ឆ្នាំ២០១៨ នៅចំណុចស្ថានីយ៍ប្រេងឥន្ធនៈខាងលើ (PTT) ផ្លូវព្រះមុនីវង្ស ស្ថិតក្នុងសង្កាត់ទន្លេបាសាក់ ខណ្ឌចំការមន។
តាមប្រភពពីស្ត្រីវ័យជាង៤០ឆ្នាំម្នាក់បានប្រាប់ឱ្យដឹងថា មុនកើតហេតុ រូបគាត់ធ្វើការដើរបោសសំអាតនៅជុំវិញបរិវេណស្ថានីយប្រេងឥន្ធនៈខាងលើដូចសព្វមួយដង លុះមកដល់ចំណុចខាងក្រោមដើមស្វាយនៅចំហៀងរបងស្ថានីយ៍ប្រេង រូបគាត់ក៏ឈប់ និងងើយរកមើលផ្លែស្វាយនោះ ស្រាប់តែប្រទះឃើញសត្វពស់មួយក្បាលយ៉ាងធំនៅរុំខ្លួនជាប់នឹងមែកស្វាយខាងលើ ។
តាមប្រភពដដែលប្រាប់បន្តថា ពេលដែលរូបគាត់ប្រទះឃើញសត្វពស់មួយក្បាលនៅលើដើមស្វាយភ្លាមនោះ ធ្វើឱ្យរូបគាត់ភ្ញាក់ខ្លួនព្រឺត និងភិតភ័យខ្លាចយ៉ាងខ្លាំងស្ទើរលស់ព្រលឹងទៅហើយ និងស្រែកប្រាប់គេឯងឱ្យមកមើល ទើបបង្កឱ្យមានការភ្ញាក់ផ្អើលតែម្តង។ ក្រោយមកក៏ មានសមត្ថកិច្ចមូលដ្ឋានចុះមកដល់ និងរាយការណ៍ទៅប្រាប់ខាងមន្ត្រីអភិរក្សសត្វឱ្យចុះមកមើលទើបដឹងថា «ពស់នោះវាជាពស់ថ្លាន់» និងនាំគ្នាឡើងទៅចាប់យកមក។
ប្រភពដដែលបន្តទៀតថា ពេលដែលកម្លាំងមន្ត្រីអភិរក្សសត្វព្រៃបាននាំគ្នាឡើងទៅចាប់ពស់ថ្លាន់មួយក្បាលខាងលើយកមកខាងក្រោមរួចហើយ ក៏បានយកទៅដាក់ថ្លឹងមើលឃើញថា វាមានទម្ងន់ប្រមាណជាជាង១៥គីឡូ និងមានប្រវែងរហូតទៅដល់ជាង២ម៉ែត្រឯណោះ ក្រោយមកក៏ដឹកយកទៅរក្សាទុកផងដែរ។
ចែករំលែកព័តមាននេះ