រាជធានីភ្នំពេញ ៖ លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា រដ្ឋបាលរាជធានីភ្នំពេញ បានចាប់ផ្តើមបើកយុទ្ធនាការជួសជុលជង្ហុក…
រាជធានីភ្នំពេញ ៖ លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា រដ្ឋបាលរាជធានីភ្នំពេញ បានចាប់ផ្តើមបើកយុទ្ធនាការជួសជុលជង្ហុក (គ្រលុកសម្បុកមាន់) តាមដងផ្លូវសាធារណៈ ដើម្បីសម្រួលដល់ការធ្វើដំណើររបស់ប្រជាពលរដ្ឋ ។
លោកបន្តថា យោងតាមការណែនាំរបស់ លោក ឃួង ស្រេង អភិបាលរាជធានីភ្នំពេញ នាពេលកន្លងមកនេះ ការជួសជុលផ្លូវមានជង្ហុកសម្បុកមាន់ក្នុងខណ្ឌចំនួន៤ ក្នុងក្រុង (ខណ្ឌចំការមន ៧មករា ទួលគោក ដូនពេញ) គិតត្រឹមពេលនេះ សម្រេចបាន៩០%រួចហើយ នៅសល់គ្រលុកតិចតួចប៉ុណ្ណោះ ដែលយើងកំពុងជួសជុលចំនួន៦ក្រុម និងក៏មានក្រុមអ៊ុតកៅស៊ូថ្នល់ចំនួន ២៣ខ្សែក៏កំពុងចាប់ផ្តើម ។
លោក សាំ ពិសិដ្ឋ បានឲ្យដឹងទៀតថា ចំណែកខណ្ឌជាយក្រុង មានក្រុមការងារជួសជុលផ្លូវបេតុង ១ក្រុម ដែលរដ្ឋបាលរាជធានីភ្នំពេញនឹងបង្កើនអោយដល់៤ក្រុមនាពេលឆាប់ៗនេះ ។
ជាក់ស្តែង នៅពេលនេះ ក្រុមការងារបាននិងកំពុងជួសជុលលុបជង្ហុកសំបុកមាន់នៅផ្លូវលេខ៥៥២ ផ្លូវលេខ២៧១ និងផ្លូវលេខ២៧៣ ចុះទៅម្តុំទួលសង្កែ និងបន្តចុះជួសជុល និងអ៊ុតកៅស៊ូផ្លូវលេខ ១៣៨ ២០៤ ៣០៦ ៤០០ ១៨០០ ផ្លូវជាតិលេខ៥ ផ្លូវជាតិលេខ៦ ផ្លូវបេតុងអង្គតាមិញ ផ្លូវតំបន់វត្តភ្នំ និងជួសជុលលុបសំបុកមាន់តាមផ្លូវជាបន្តបន្ទាប់ទៀត ។
លោក សាំ ពិសិដ្ឋ បានអំពាវនាវឲ្យប្រជាពលរដ្ឋចូលរួមផ្តល់ព័ត៌មានអំពីផ្លូវមានជង្ហុក ដោយភ្ជាប់មកជាមួយនូវរូបភាពបញ្ជាក់ទីតាំងភូមិសាស្ត្រ ផ្លូវ សង្កាត់ និងខណ្ឌឱ្យបានច្បាស់លាស់ ដើម្បីក្រុមការងារងាយស្រួលចុះទៅជួសជុលជាបន្ទាន់ ៕
ចែករំលែកព័តមាននេះ