ខេត្តបន្ទាយមានជ័យ ៖ កាលពីព្រឹកថ្ងៃទី២១ ខែធ្នូ ឆ្នាំ២០១៨ នៅក្រុងប៉ោយប៉ែត មន្ត្រីគយនិងរដ្ឋាករបានចាប់ឃាត់រថយន្តចង្កូតស្តាំ ស៊េរីទំនើបមួយគ្រឿង ម៉ាកនីស្សាន់ ស៊េរីឆ្នាំ២០១៦ គ្មានពន្ធ ពាក់ស្លាកលេខក្លែងបន្លំ ។
លោក សាំង ណន អនុប្រធានស្នាក់ការគយនិងរដ្ឋាករច្រកទ្វារអន្តរជាតិប៉ោយប៉ែតបានឱ្យដឹងថា ដោយមានការណែនាំពីអគ្គនាយកដ្ឋានគយ និងរដ្ឋាករ ក៏ដូចជាដាក់វិធានការពីលោក ឆែរ សុធា ប្រធានសាខាគយនិងរដ្ឋាករខេត្តបន្ទាយមានជ័យ ដើម្បីទប់ស្កាត់ស្កាត់រថយន្តចង្កូតស្តាំដែលឈ្មួញលួចនាំចូលគេចពន្ធពីប្រទេសជិតខាងដោយល្មើសច្បាប់។
លោកបានបញ្ជាក់ថា ក្រោយដាក់វិធាន លោកបានដឹកនាំមន្ត្រីគយនិងរដ្ឋាករបានធ្វើការស្រាវជ្រាវនិងកំណត់មុខសញ្ញាឃាត់រថយន្តម៉ាកនីស្សាន់ប្រភេទ១បាំងកន្លះ ពណ៌ស ស៊េរីឆ្នាំ២០១៦ ដែលពាក់ស្លាកលេខ ចង្កូតស្តាំ KPC-2431 គឺជាស្លាកលេខក្លែងបន្លំ ដែលជាស្លាកលេខរបស់រថយន្តម៉ាកនីស្សាន់ពណ៌ប្រផេះ ស៊េរីឆ្នាំ២០០៥ ដែលជាប្រភេទរថយន្តដឹកទំនិញធុនតូច ដែលមានលេខម៉ាស៊ីន YDD25DDT លេខសាក់ស៊ី MNTNCGD40Z0600077 កំលាំង 21HP។
លោក សាំង ណន បានបញ្ជាក់ថា ក្រោយពេលឃាត់រថយន្ត១គ្រឿង ម៉ាកនីស្សាន់ ស៊េរីឆ្នាំ២០១៦ គឺពាក់ស្លាក់លេខក្លែងបន្លំខុសច្បាប់ដែលជារថយន្តចង្កូតស្តាំគេចពន្ធត្រូវបានកសាងសំណុំរឿងបញ្ជូនទៅសាខាគយនិងរដ្ឋាករខេត្តបន្ទាយមានជ័យចាត់ការតាមច្បាប់។
ម្ចាស់រថយន្តបានបញ្ជាក់នៅមុខសមត្ថកិច្ចថា រថយន្តនេះគឺគាត់ទិញពីគេដែលមានស្លាក់លេខរថយន្តចង្កូតស្តាំ និងកាតគ្រីរថយន្ត ដើម្បីទុកប្រើប្រាស់ តែមិនបានដឹងថារថយន្តនេះខុសច្បាប់នោះទេ បើមន្ត្រីជំនាញឃាត់ហើយពិនិត្យឃើញថា រថយន្តខុសច្បាប់ ក៏លោកមិនប្រកែកដែរ ព្រោះរថយន្តនេះលោកបានទិញក្នុងស្រុកពីឈ្មួញ មិនបានទិញតាមព្រំដែននោះទេ។
គួររំលឹកថា រយៈពេល១សប្តាហ៍នេះ លោក សាំង ណន អនុប្រធានស្នាក់ការគយនិងរដ្ឋាករច្រកទ្វារអន្តរជាតិប៉ោយប៉ែត បានដឹកនាំមន្ត្រីជំនាញបង្ក្រាបរថយន្តចង្កូតស្តាំបានចំនួន២គ្រឿង ក្នុងនោះកាលពីថ្ងៃទី១៦ ខែធ្នូ ឆ្នាំ២០១៨កន្លងទៅ ឃាត់រថយន្តចង្កូតស្តាំមួយគ្រឿង ស៊េរីទំនើប ដែលពាក់ស្លាកលេខ (ន.ប 2.6088) នៅក្រុងប៉ោយប៉ែត និងថ្ងៃទី២១ ខែធ្នូ ឆ្នាំ២០១៨នេះ បានឃាត់រថយន្តម៉ាកនីស្សាន់ប្រភេទ១បាំងកន្លះ ពណ៌ស ស៊េរីឆ្នាំ២០១៦ ដែលពាក់ស្លាក់ ចង្កូតស្តាំ KPC-2431 ដែលជាស្លាកលេខក្លែងបន្លំ ត្រូវបានអនុវត្តតាមច្បាប់៕
ចែករំលែកព័តមាននេះ