រាជធានីភ្នំពេញ ៖ បុរសវ័យចំណាស់ម្នាក់លោតពីលើស្ពានជ្រោយចង្វារ ចូលទៅក្នុងទឹកទន្លេរួចស្រែក«ជួយផងៗ» សំណាងល្អប្រជានេសាទចេញទូកទៅជួយស្រង់ទាន់ តែមិនដឹងថា គាត់ មានវិបត្តិអ្វី បានធ្វើដំណើរមកលោតទឹកធ្វើអត្តឃាតពីលើស្ពានបែបនេះ តែទំនងជាចេះហែលទឹកបានអណ្តែតមកខាងលើហើយស្រែកឱ្យគេជួយ ។
ហេតុការណ៍នេះដែរបានបង្កឱ្យមានការភ្ញាក់ផ្អើលកើតឡើង កាលពីវេលាម៉ោង៥និង១៥នាទីល្ងាច ថ្ងៃទី២០ ខែធ្នូ ឆ្នាំ២០១៨ នៅចំណុចគល់ស្ពានជ្រោយចង្វារចាស់ ក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីសម្ថកិច្ចបានប្រាប់ឱ្យដឹងថា បុរសរងគ្រោះមិនមានអ្នកណាម្នាក់បានស្គាល់ និងដឹងអំពីអត្តសញ្ញណឡើយដោយមានអាយុប្រមាណជាង៥០ឆ្នាំ ពាក់អាវពណ៌ទឹកប៊ិច និងស្លៀកខោខ្លី ពណ៌ខ្មៅ ជើងត្រឹមជង្គង់ ។
មុនពេលកើតហេតុគេបានឃើញរូបគាត់ដើរឡើងទៅលើស្ពានជ្រោយចង្វារចាស់ ដែលកំពុងតែធ្វើការជួសជុលនោះក្នុងទិសដៅពីលិចទៅកើត ។ ភ្លាមនោះក៏បានឭទៅដល់ប្រជានេសាទជនជាតិខ្មែរឥស្លាមដែលនៅក្បែរនោះ និងបានប្រទះឃើញបុរសម្នាក់កំពុងតែស្រវ៉េស្រវ៉ាហែលនៅលើផ្ទៃទឹកទន្លេ ហើយក៏បាននាំគ្នាចេញទូកទៅជួយស្រង់យកមកដាក់លើមាត់ច្រាំងទន្លេ ក្បែរគល់ស្ពានខាងលិចនេះតែម្តង ។
តាមប្រភពដដែលបានប្រាប់បន្តទៀតថា លុះរូបគាត់ធ្វើដំណើរឡើងទៅដល់ពាក់កណ្តាលស្ពាន រួចហើយក៏ស្រាប់តែឡើងទៅលើបង្កាន់ស្ពាន និងលោតចូលទៅក្នុងទឹកទន្លេខាងក្រោមតែម្តង ហើយក៏បានស្រែក«ជួយផងៗ» អោយគេឯងជួយ ។
ទំនងជារូបគាត់ចេះហែលទឹកទើបអណ្តែតមកខាងលើហែលស្រែកអោយគេឯងជួយស្រង់ទាន់ពេលវេលា មិនស្លាប់បាត់បង់ជីវិត និងគ្រាន់តែរងរបួសបន្តិចបន្ទួចប៉ុណ្ណោះ ។ ពាក់ព័ន្ធទៅនឹងករណីបុរសវ័យចំណាស់ម្នាក់ដែលមកលោតទឹកធ្វើអត្តឃាតសម្លាប់ខ្លួនពីលើស្ពានជ្រោយចង្វារម្នាក់ខាងលើនេះដែរ មិនមានអ្នកណាម្នាក់បានដឹងថា រូបគាត់មិនវិបត្តិអ្វីឡើយ ហើយក៏មិនបានស្គាល់ពីអត្តសញ្ញាណរបស់គាត់ដែរ ដោយសារតែគេសួរនាំរូបគាត់មិននិយាយស្តីអ្វីមួយម៉ាត់នោះ ។
ក្រោយពេលកើតហេតុ បុរសវ័យចំណាស់រងគ្រោះខាងលើត្រូវបានគរស្រង់ដាក់លើគោក ហើយកម្លាំងមានសម្ថកិច្ចមូលដ្ឋានហៅរថយន្តសាមុយមកដឹកយកទៅសង្គ្រោះនៅឯមន្ទីរពេទ្យកាល់ម៉ែត្រ និងកំពុងតែធ្វើការស្រាវជ្រាវរកក្រុមគ្រួសាររបស់គាត់អោយមកទទួលយកទៅផ្ទះវិញផងដែរ ៕
ចែករំលែកព័តមាននេះ