ខេត្តព្រះសីហនុ ៖ ក្រុមការងាររបស់រដ្ឋបាលខេត្តនារសៀលថ្ងៃទី២០ ខែធ្នូ ឆ្នាំ២០១៨ បានសហការណ៏ជាមួយស្ថាប័នពាក់ព័ន្ធជុំវិញខេត្តចុះធ្វើការណែនាំដល់បណ្តាគ្រប់ការដ្ឋានសាងសង់ទាំងអស់ជាលើកចុងក្រោយ បន្ទាប់ពីរដ្ឋបាលខេត្តបានចេញសេចក្តីជូនដំណឹងស្តីពីការរៀបចំទុកដាក់សម្ភារសំណង់ និងការហុំព័ទ្ធការដ្ឋានសំណង់នានាដើម្បីរក្សាបាននូវសណ្តាប់ធ្នាប់របៀបរៀបរយ និងមានសុវត្តិភាពការងារ ។
លោក លី ចិត្តនិយម មន្ត្រីសាលាខេត្តព្រះសីហនុ និងជាប្រធានក្រុមការងារបានបញ្ចាក់អោយដឹងថា ការចុះណែនាំដល់បណ្តាគ្រប់ការដ្ឋានសាងសង់ទាំងអស់នេះជាលើកចុងក្រោយហើយបន្ទាប់ពីរដ្ឋបាលខេត្តបានចុះណែនាំជាបន្តបន្ទាប់រួមជាមួយការចេញសេចក្តីជូនដំណឹងដែលមានរយៈពេល១៣ថ្ងៃកន្លងមកហើយដោយបញ្ចប់ត្រឹមថ្ងៃទី២០ ធ្នូ ជាកំហិត ប្រសិនបើមិនគោរពតាមការណែនាំរបស់រដ្ឋបាលខេត្តទេរដ្ឋបាលខេត្តនឹងចាត់ការទៅតាមនីតិវិធីច្បាប់ ដោយពុំមានការលើកលែងទៀតឡើយ ។
លោក លី ចិត្តនិយមបានសង្កត់ផងដែរ ចំពោះគោលបំណងនៃសេចក្តីជូនដំណឹងខាងលើនេះ គឺ -តម្រូវអោយគ្រប់ការដ្ឋានសំណង់ទាំងអស់ត្រូវទុកដាក់សម្ភារសំណង់នានារួមមាន ខ្សាច់ ថ្ម ឥដ្ឋ ដែក ស៊ីម៉ងត៍ និងគ្រឿងបង្គំផ្សេងៗនៅក្នុងការដ្ឋានអោយបានត្រឹមត្រូវ ។
ហាមយកចិញ្ចើមផ្លូវទីសាធារណៈសម្រាប់ធ្វើជាកន្លែងកម្មករបំពេញការងារ ហើយចំពោះការចាក់ដីចូលការដ្ឋាន ឬដឹកដីចេញពីការដ្ឋាន មិនត្រូវធ្វេសប្រហែសដោយគ្រប និងលាងរថយន្តឲ្យបានស្អាត ដើម្បីកុំឲ្យដី ថ្ម ខ្សាច់ ជ្រុះហុយ ប្រឡាក់ផ្លូវសាធារណៈ និងប៉ះពាល់សុវត្ថិភាពអ្នកដ៏ទៃ ។ ត្រូវហុំព័ទ្ធការដ្ឋានសំណង់តាមលក្ខណៈបច្ចេកទេសដើម្បីការពារសុវត្ថិភាពចៀសវាងការបង្កគ្រោះថ្នាក់ដោយយថាហេតុ ៕
ចែករំលែកព័តមាននេះ