ខ្លោចចិត្ត! យុវជនវ័យក្មេង២នាក់ខណៈ…ឮសូរសម្លេងឈីវយ៉ាងខ្លាំង
- ព្រះសីហនុ
ខេត្តព្រះសីហនុ ៖ គួរឲ្យរន្ធត់ និងតក់ស្លុតក្នុងចិត្ត ខណៈដែលបានឃើញយុវជនវ័យក្មេងចំនួនពីរនាក់ជាកម្មករក្រុមហ៊ុនឯកជនឡើងតបណ្តាញខ្សែរភ្លើងនៅលើបង្គោលចូលសណ្ឋាគារជនជាតិចិន ហើយត្រូវចរន្តភ្លើងឆក់ដាច់ផ្ងារស្លាប់ជាប់នៅលើបង្គោលខ្សែរភ្លើងម្នាក់ និងម្នាក់ទៀតធ្លាក់មកពីលើបង្គោលដែលមានកម្ពស់ប្រមាណជាងដប់ម៉ែត្ររងរបួសធ្ងន់ បានរថយន្តក្រុមហ៊ុនតបណ្តាញភ្លើងដឹកយកទៅសង្គ្រោះនៅឯមន្ទីពេទ្យ ។ ជនរងគ្រោះខាងលើមានទី១-ឈ្មោះ…
ជនរងគ្រោះខាងលើមានទី១-ឈ្មោះ អុល ថារិន អាយុ២៦ឆ្នាំស្រុកកំណើតខេត្តកំពងចាម និងទី២-ឈ្មោះ ធូក សាមិក អាយុ២៧ឆ្នាំ នៅខេត្តព្រៃវែង ជាបុគ្គលិកតបណ្តាញរបស់អគ្គិសនីខេត្តព្រះសីហនុ (ក្រៅក្របខណ្ឌ) នេះបើយោងតាមប្រភពក្រៅផ្លូវការនៅកន្លែងកើតហេតុ ។
ប្រភពផ្តល់ព័ត៌មាននៅកន្លែងកើតហេតុបានឲ្យដឹងថា ហេតុការណ៍ខាងលើបានកើតឡើងនៅវេលាម៉ោង០៣និង៤០នាទីរសៀលថ្ងៃទី២០ ខែធ្នូ ឆ្នាំ២០១៨ នៅតាមបណ្តោយវិថី០២ធ្នូ ត្រង់ចំណុចទល់មុខសណ្ឋាគារស៊ីហ៊ូរីសត ស្ថិងក្នុងភូមិ០១ សង្កាត់ លេខ០៣ ក្រុង-ខេត្តព្រះសីហនុ ។
ប្រភពខាងលើបានបន្តឲ្យដឹងទៀតថា មុនពេលកើតហេតុគេឃើញយុវជនវ័យក្មេងជាជនរងគ្រោះទាំងពីរនាក់ឡើងតបណ្តាញខ្សែរភ្លើងចូលសណ្ឋាគារចិន ដែលកំពុងសាងសង់បានប្រមាណជា៥០ភាគរយតាំងពីព្រឹកមកម្ល៉េះ មិនមានហេតុការណ៍អ្វីកើតឡើងទេ ។ លុះដល់ពេលកើតហេតុក្រុមកម្មករសំណង់ដែលនៅក្បែរនោះឮសូរសម្លេងឈីវយ៉ាងខ្លាំង ស្រាប់តែឃើញជនរងគ្រោះដែលកំពុងតខ្សែរភ្លើងម្នាក់ធ្លាក់ចុះមកដី រីឯម្នាក់ទៀតដាច់ផ្ងារខ្លួនទៅគងលើខ្សែរភ្លើង ទើបបង្កឲ្យមានការភ្ញាក់ផ្អើលចោមរោមមើលជនរងគ្រោះដែលត្រូវខ្សែភ្លើងឆក់ ។
បន្ទាប់មកអាជ្ញាធរមូលដ្ឋានបានរាយការណ៍ទៅអង្គភាពអគ្គិសនីខេត្តព្រះសីហនុយករថយន្តដងយោងកន្ត្រកដាក់ជនរងគ្រោះចេញពីលើបង្គោលភ្លើង ដើម្បីជួយសង្គ្រោះតែជាអកុសល្យដោយសារតែមានការយឺតយ៉ាវជនរងគ្រោះបានស្លាប់បាត់ទៅហើយ ។
មន្ត្រីអង្គភាពអគ្គិសនីខេត្តព្រះសីហនុបានបញ្ជាក់ឲ្យដឹងថា ជនរងគ្រោះទាំងពីរនាក់ជាបុគ្គលិកតបណ្តាញភ្លើងក្រុមហ៊ុនឯកជនដែលចិនជួលមកតបណ្តាញភ្លើងចូលសណ្ឋាគារពួកគេ ។ គាត់បានបន្តឲ្យដឹងទៀតថា ជនរងគ្រោះគាត់មានការធ្វេសប្រហែសក្នុងពេលបំពេញការងារបើទោះជាខ្សែរដែលអង្គភាពអគ្គិសនីខេត្តបានផ្តាច់ចរន្តក៏ដោយ តែនៅមានខ្សែរភ្លើងឯកជនរបស់សណ្ឋាគារដែលមានស្រាប់ពេលដែលភ្លើងររដ្ឋដាច់បានម៉ាស៊ីនឯកជនដំណើរការជំនួស ។
ក្រោយកើតហេតុជនរងគ្រោះទាំងពីរបានស្លាប់បាត់បង់ជីវិត សមត្ថកិច្ច និងអាជ្ញាធរមូលដ្ឋានកំពុងស្វែងរកអត្តសញ្ញាណ និងក្រុមគ្រួសារ ដើម្បីមកទទួលយកទៅធ្វើបុណ្យទៅតាមប្រពៃណី ៕
ចែករំលែកព័តមាននេះ