សហរដ្ឋអាមេរិក-ស៊ីរី ៖ ប្រធានាធិបតីអាមេរិក លោកដូណាល់ត្រាំ កាលពីថ្ងៃទី១៩ធ្នូបានចេញបញ្ជាឲ្យដកកងទ័ពអាមេរិកទាំងអស់ចេញពីស៊ីរី ដោយវាយតម្លៃថាពេលនេះបានច្បាំងឈ្នះក្រុមរដ្ឋអ៊ិស្លាមហើយ។ នោះជាការសម្រេចមួយនាំឲ្យមានការភ្ញាក់ផ្អើល។
ការប្រកាសនោះរបស់លោកត្រាំជាការកែប្រែយ៉ាងខ្លាំងនូវការប្រៀបធៀបកម្លាំងនៅសីុរី ដែលនៅទីនោះរុស្ស៊ីកាន់តែមានឥទ្ធិពលខ្លាំង។ វាក៏បង្កឲ្យមានភាពមិនច្បាស់មួយចំនួនដែលពង្រឹងមុខមាត់របស់ប្រធានាធិបតីដែលកាន់តែឯកោមួយរូប ចំពោះសំណុំរឿងនោះក្នុងផ្ទៃរដ្ឋបាលរបស់លោក។
ទាហានអាមេរិកប្រមាណជា២០០០នាក់ បច្ចុប្បន្នដាក់ពង្រាយនៅភាគខាងជើងស៊ីរី ពិសេសគឺកងកម្លាំងពិសេស ដើម្បីចូលរួមក្នុងការប្រយុទ្ធប្រឆាំងក្រុមរដ្ឋអ៊ិស្លាម និងជួយហ្វឹកហ្វឺនកងកម្លាំងមូលដ្ឋាន ក្នុងបណ្ដាតំបន់ដែលដណ្ដើមយកបានពីពួកជីហាដ។
រយៈពេលប៉ុន្មានខែចុងក្រោយនេះ បណ្ដាអ្នកទទួលខុសត្រូវយោធាជាន់ខ្ពស់អាមេរិក បានបង្កើនការព្រមាន ប្រឆាំងការដកដោយប្រញាប់ប្រញាល់កងទ័ពអាមេរិកនៅស៊ីរី ដែលនឹងអាចទុកផ្លូវម៉ាសេរីដល់បណ្ដាសម្ព័ន្ធមិត្តនៃរបបលោកបាចាអាល់អាសាដ ពិសេសរុស្ស៊ីនិងអីុរ៉ង់ធ្វើអ្វីបានតាមចិត្ត។
តាមTWITTERលោកត្រាំលើកឡើងថា យើងបានឈ្នះ ក្នុងការប្រយុទ្ធប្រឆាំងក្រុមរដ្ឋអ៊ិស្លាម រួចដល់ពេលយើងត្រូវដកទ័ពមកស្រុកវិញហើយ។ យុវជន យុវនារីនិងបុរសៗរបស់យើង ត្រូវវិលមកស្រុកវិញទាំងអស់នាពេលនេះ។ វាជាការដកកងទ័ពទាំងអស់ដែលត្រូវធ្វើដោយឆាប់រហ័ស តាមដែលអាចធ្វើទៅបាន។
នៅពុំទាន់មានព័ត៌មានណាមួយទាក់ទិននឹងផលប៉ះពាល់នៃការសម្រេចនោះ លើយុទ្ធនាការ វាយប្រហារតាមអាកាសរបស់ក្រុមចម្រុះនាំមុខដោយអាមេរិកនៅសីុរីចាប់តាំងពីដំណាច់ឆ្នាំ២០១៤មកនៅឡើយ។
ពិតណាស់ការប្រកាសនោះអាចបណ្ដាលឲ្យពួកជីវពលឃើតនៃក្រុមYPG ដែលប្រយុទ្ធជាមួយការជួយទ្រទ្រង់របស់អាមេរិក ប្រឆាំងក្រុមរដ្ឋអ៊ិស្លាម ជួបសភាពការណ៍ដ៏លំបាកបំផុត។
ប្រធានាធិបតីតួកគី លោករីស៊ីបតៃយីបអ័រដូហ្គាន កាលពីថ្ងៃទី១៧ធ្នូបានព្រមានជាថ្មី ពីការកម្ចាត់ក្រុមជីវពលនោះ ប្រសិនបើអ្នកជួយទ្រទ្រង់អាមេរិកមិនចាប់បង្ខំពួកគេឲ្យដកថយពីបណ្ដាតំបន់ជិតព្រំដែនតួកគីទេនោះ។ ពួកឃើតរស់នៅក្នុងទីក្រុងឃើតQAMISHLI ភាគពាយ័ព្យស៊ីរីនិយាយថា ការដកទ័ពរបស់អាមេរិកជាការក្បត់នឹងបណ្ដាគោលការណ៍មនុស្សធម៌។ វាជាការប្រព្រឹត្តផ្ទុយទាំងស្រុងជាមួយបណ្ដាការសន្យារបស់ក្រុងវ៉ាស៊ិនតោនដែលថា ការពារប្រជាជនឃើតដែលបានបូជាយ៉ាងច្រើនក្នុងការតស៊ូប្រឆាំងភេរវកម្ម៕
ចែករំលែកព័តមាននេះ