ខេត្តព្រះវិហារ ៖ មន្ទីរកសិកម្មរុក្ខាប្រមាញ់ និងនេសាទខេត្តព្រះវិហារបានអះអាងថា នៅឆ្នាំ២០១៩ខាងមុខនេះជំនាញកសិកម្មសហការជាមួយគម្រោងបច្ចេកទេសថ្មី ដែលធន់នឹងការប្រែប្រួលអាកាសធាតុ ហៅកាត់ (ASPIRE) នឹងបង្កើនការចងក្រងបណ្តុំកសិករក្នុងការផលិតបន្លែ និងចិញ្ចឹមបន្ថែមទៀតជួយដល់កសិករ ដើម្បីនាំកសិករទាំងនោះឆ្ពោះទៅរកទីផ្សារ និងជួយឲ្យជីវភាពកសិករប្រសើរឡើង ។
លោក ពឹង ទ្រីដា ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារក្រោយបញ្ចប់សិក្ខាសាលាស្តីពីលទ្ធផលសម្រេចបានក្នុងការអនុវត្តកម្មវិធីផ្សព្វផ្សាយបច្ចេកទេសថ្មីនៅថ្ងៃទី២០ ខែធ្នូ ឆ្នាំ២០១៨នេះបានមានប្រសាសន៍ថា គោលដៅដែលមន្ទីរជំនាញសហការជាមួយគម្រោងបច្ចេកទេសថ្មីដែលធន់នឹងការប្រែប្រួលអាកាសធាតុបានចងក្រងក្រុមផលិតដំណាំកសិកម្មក៏ដូចជា ចិញ្ចឹមសត្វនេះ ក្នុងគោលបំណងសំខាន់ណែនាំដល់កសិករទាំងអស់ដាំដុះដំណាំកសិកម្ម និងចិញ្ចឹមសត្វប្រកបដោយបច្ចេកទេសត្រឹមត្រូវ ហើយផ្សារភ្ជាប់ពួកគាត់ទៅកាន់ទីផ្សារកាន់តែប្រសើរឡើង ។
ម្យ៉ាងវិញទៀត ដើម្បីឲ្យបណ្តុំកសិករទាំងនោះឈានទៅរកការចុះកិច្ចសន្យាផលិតលក់ជូនអាជីវករតាមទីផ្សារ និងហាងលក់ទំនិញនានា និងបានកំណត់នូវតម្លៃច្បាស់លាស់ ។ មិនត្រឹមតែប៉ុណ្ណោះនៅពេល អនុវត្តដាំដុះដំណាំ និងចិញ្ចឹមសត្វមន្ទីរជំនាញ និងគម្រោងអាសប៉ាយនឹងផ្តល់ទុនដល់កសិករទាំងអស់នោះដូចជា បច្ចេកទេសកសិកម្ម សម្ភារៈគាំទ្រផលិតកម្មកសិកម្មផ្សេងៗតាមតម្រូវការរបស់កសិករ ។
លោកថា ការចងក្រងកសិករជាបណ្តុំក្នុងការផលិតបន្លែចិញ្ចឹមសត្វនេះពិតជាបានធ្វើឲ្យកសិករទាំងអស់អាចទទួលបាននូវបទពិសោធបច្ចេកទេសកសិកម្មត្រឹមត្រូវ និងទទួលបានប្រាក់ចំណូលច្រើនគួរសមសម្រាប់ដោះស្រាយជីវភាពរបស់ពួកគាត់ ។
យោងតាមរបាយការណ៍របស់មន្ទីរកសិកម្មរុក្ខាប្រមាញ់ និងនេសាទខេត្តព្រះវិហារក្នុងឆ្នាំ២០១៨នេះបង្ហាញថា ការអនុវត្តគម្រោងអាសប៉ាយបច្ចេកទេសថ្មីដែលធន់នឹងការប្រែប្រួលអាកាសធាតុបានបង្កើតបណ្តុំកសិករផលិតកម្មដំណាំបន្លែចំនួន៦បណ្តុំ មាន១៥៨គ្រួសារ បង្កើតបណ្តុំកសិករចិញ្ចឹមមាន់ ចំនួន៦បណ្តុំ មាន១៧៥គ្រួសារ រៀបចំគ្រួសារចិញ្ចឹមត្រីចំនួន៦ស្រុក មាន៩៩គ្រួសារ និងបានគាំទ្រ កសិករឆ្នាំទី២ លើផលិតកម្មដំណាំបន្លែបានចំនួន៧០ក្រុម ៕
ចែករំលែកព័តមាននេះ