ខេត្តកំពង់ឆ្នាំង ៖ ប្រជាពលរដ្ឋរស់នៅភូមិដំបូកកកោះ ឃុំស្វាយជ្រុំ ស្រុករលាប្អៀរ ចំនួន៣០គ្រួសារនៅព្រឹកថ្ងៃទី២០ ខែធ្នូ ឆ្នាំ២០១៨នេះបានលើកគ្នាទៅតវ៉ានៅលើដីទំនាស់របស់ពួកគាត់ ចំនួន៣ហិកតាដែលពួកគាត់លក់តែអាចម៍ដីទៅអោយក្រុមហ៊ុនម៉ូហិបាកាយយកដីគ្រួសបាយក្រៀម ទៅធ្វើផ្លូវជាតិលេខ៥ ។
ប៉ុន្តែក្រោយពេលក្រុមហ៊ុនធ្វើផ្លូវរួច ក្រុមហ៊ុនបានប្រគល់ដីអោយពួកគាត់វិញ តែបែរជាលោកមេភូមិដំបូកកោះ និងលោកមេឃុំស្វាយជ្រុំ មិនព្រមប្រគល់អោយពួកគាត់វិញទេ និងបានយកដីនោះមួយចំនួនទៅលក់អោយអ្នកដ៏ទៃទៀតផង ។
ប្រជាពលរដ្ឋបានលើកឡើងថា ពួកគាត់ចំនួន៣០គ្រួសារបានកាន់កាប់ដីនោះតាំងពីឆ្នាំ១៩៨០ រហូតដល់ឆ្នាំ២០០៣ ពួកគាត់បានលក់អាចម៍ដី (មិនមែនលក់ដីទេ) ទៅឱ្យក្រុមហ៊ុនខាងលើ ដែលបានសុំទិញយកអាចម៍ដីគ្រួសបាយក្រៀមយកទៅធ្វើផ្លូវជាតិលេខ៥ ។ ក្រោយមកនៅឆ្នាំ ២០០៨ ពេលធ្វើផ្លូវហើយក្រុមហ៊ុនបានប្រគល់ដីទាំងនោះឲ្យពួកគាត់កាប់កាប់វិញ ។
រឿងដីនេះមុនពេលបោះឆ្នោតមេឃុំឆ្នាំ២០១៨ ប្រជាពលរដ្ឋតវ៉ាសុំយកដីខាងលើនេះវិញពេលនោះ ដើម្បីសន្លឹកឆ្នោត លោក ហ៊ុន ចន្ថា មេភូមិដំបូកកោះ និងលោក យី ភួន មេឃុំស្វាយជ្រុំបានប្រាប់ថា នឹងអោយប្រជាពលរដ្ឋកាន់កាប់ដីខាងលើនេះវិញចុះ ។ ប៉ុន្តែនៅពេលបោះឆ្នោតរួច លោកមេភូមិ និងលោកមេឃុំបែរជាប្រាប់ថា អាជ្ញាធរភូមិឃុំត្រូវដកហូតដីទាំងអស់ខាងលើនេះមកទុកជាទ្រព្យសម្បត្តិរួមរបស់ភូមិឃុំវិញមិនប្រគល់អោយពួកគាត់វិញឡើយ ។
មិនតែប៉ុណ្ណោះលោកមេភូមិ និងលោកមេឃុំបានលក់ដីនោះមួយចំនួនទៅអោយក្រុមហ៊ុនផ្សេងដែលសព្វថ្ងៃនេះ គេកំពុងតែជីកកកាយដឹកដីគ្រួសនោះលក់អោយគេរាល់ថ្ងៃទៀតផង។ ទាក់ទងនឹងការចោទប្រកាន់ខាងលើនេះលោក ហ៊ុន ចន្ថា មេភូមិដំបូកកកោះនៅរសៀលថ្ងៃទី ២០ ខែធ្នូនេះបានបញ្ជាក់អោយដឹងថា ដី៣ហិកតានេះ គឺប្រជាពលរដ្ឋបានលក់ទៅឱ្យក្រុមហ៊ុនម៉ូហិបាពិតប្រាកដមែន នៅក្នុងឆ្នាំ២០០៣ គឺលក់ដីទាំងអស់មិនមែនលក់តែអាចម៍ដីនោះទេ ដោយក្រុមហ៊ុនគេបានធ្វើលិខិតលក់ទិញត្រឹមត្រូវតម្កល់ទុកឯកសារគុបពីអាជ្ញាធរភូមិ-ឃុំ និងឯកសារហ្សីនទុកនៅក្រុមហ៊ុនរបស់គេ ។ ហេតុនេះហើយទើបមកដល់ពេលនេះអាជ្ញាធរភូមិ-ឃុំ មិនហ៊ានប្រគល់ដីនោះទៅអោយឱ្យប្រជាពលរដ្ឋវិញឡើយ ។ ព្រោះថា ប្រសិនបើក្រុមហ៊ុនគេទារយកដីទាំងអស់នោះវិញ តើអាជ្ញាធរភូមិឃុំមានដីឯណាអោយគេ។
ទាក់ទងនឹងការបញ្ជាក់របស់លោកមេភូមិដំបូកកកោះខាងលើនេះ ប្រជាពលរដ្ឋបានលើកឡើងថា បើក្រុមហ៊ុនម៉ូហិបាគេយកដីនេះវិញពួកគាត់ក៏មិនតវ៉ាទេ ប៉ុន្តែបើលោកមេភូមិ មេឃុំលក់ដីនេះទៅអោយអ្នកផ្សេង ពួកគាត់ប្រឆាំងដាច់ខាត ហើយដោយសុំអោយលោកអភិបាលស្រុក និងលោកអភិបាលខេត្តជួយដោះស្រាយយកដីទាំង៣ហិកតាមកអោយពួកគាត់កាប់កាប់វិញ។
សូមបញ្ជាក់ថា ក្រោយពីប្រជាពលរដ្ឋនាំគ្នាតវ៉ានៅលើដីទំនាស់រួចមកប្រជាពលរដ្ឋក៏បាននាំគ្នាទៅកាន់សាលាឃុំស្វាយជ្រុំ ដើម្បីសុំអោយលោកមេឃុំជួយដោះស្រាយ ប៉ុន្តែពេលទៅដល់សាលាឃុំ លោកមេឃុំបានសុំច្បាប់ឈប់សម្រាកមិនមកធ្វើការទេ ដោយបានទូរសព្ទ័ប្រាប់ប្រជាពលរដ្ឋថា នៅថ្ងៃព្រឹកថ្ងៃទី២២ ខែធ្នូ ខាងមុខនេះលោកនឹងជួបជាមួយប្រជាពលរដ្ឋទាំង៣០គ្រួសារ ដើម្បីធ្វើការដោះស្រាយ ៕
ចែករំលែកព័តមាននេះ