ខេត្តកំពង់ចាម ៖ ស្ត្រីអ្នកកំពូលបោកលុយតាមទូរស័ព្ទឈ្មោះ ប៉ោ សម្បត្តិ អាយុ៤៣ឆ្នាំ នៅភូមិស្វាយក្រោម ឃុំស្វាយសាច់ភ្នំ ស្រុកស្រីសន្ធរ ដោយបានឆបោកលុយបានរហូតដល់ទៅ៦៥០០០ដុល្លារពីអាជីវករលក់គ្រឿងទេសម្នាក់នៅឃុំព្រែកដំបូក ស្រុកជាមួយគ្នា ពេលនេះត្រូវបានអស់លក្ខណ៏ដោយត្រូវបានកម្លាំងសមត្ថកិច្ចតាមប្រមាញ់ចាប់ខ្លួនបានរួមនឹងប្តីក្នុងពេលដែលបានចេញទៅដកលុយផ្ទះវីង ។
លោកវរសេនីយ៏ឯក សុខ យ៉េន អធិការនគរបាលស្រុកស្រីសន្ធរប្រាប់ឲ្យដឹងនៅព្រឹកថ្ងៃទី២០ ខែធ្នូ ឆ្នាំ២០១៨ ថាបុរសរងគ្រោះឈ្មោះ ជី ហ៊ាង អាយុ៥២ឆ្នាំ រស់នៅឃុំព្រែកដំបូក ស្រុកស្រីសន្ធរ បានមកដាក់ពាក្យបណ្តឹងនៅអធិការដ្ឋាននគរបាលស្រុកថ្ងៃទី១៨ ធ្នូ ដើម្បីឲ្យកម្លាំងសមត្ថកិច្ចជួយអន្តរាគមន៏តាមចាប់ស្ត្រីឆបោកខាងលើ ។ ក្រោយពីបានទទួលបណ្តឹងរូបលោកបានសុំគោលការណ៏ពីលោកឧត្តមសេនីយ៏ទោ ឯម កុសល ស្នងការនគរបាលខេត្ត ។
អធិការនគរបាលស្រុកស្រីសន្ធរប្រាប់បន្តថា លោកឧត្តមសេនីយ៏ត្រី ហេង វុទ្ធី ស្នងការរងនគរបាលខេត្តបានដឹកនាំសហការីដោយបានសហការជាមួយនឹងកម្លាំងអធិការដ្ឋាននគរបាលស្រុកស្រីសន្ធរ ។
នៅព្រឹកថ្ងៃទី១៩ ធ្នូ ស្របពេលដែលបុរសរងគ្រោះឈ្មោះ ហ៊ាង បានដាក់លុយចំនួន៣៣០០ដុល្លារវេរទៅស្ត្រីខាងលើនោះ ស្របពេលដែលបានជិះម៉ូតូមកជាមួយនឹងប្តីឈ្មោះ សឿ សុធី អាយុ៤១ឆ្នាំ មកដកលុយនៅកន្លែងវីងមួយកន្លែងនៅស្វាយសាច់ភ្នំត្រូវបានចាប់ខ្លួនតែម្តងដោយដកហូតបានម៉ូតូ០១គ្រឿងជាមធ្យោបាយ ។
សូមរំលឹកថា កាលពីឆ្នាំ២០១៦ ស្ត្រីឈ្មោះ សម្បត្តិ បានប្រើប្រាស់លេខទូរស័ព្ទ ០៨៩ ២៣៩ ៥៥៧ បានចុចមកចូលបុរសឈ្មោះ ហ៊ាង ដោយចៃដន្យដូចជាមាននិស្ស័យក៏បានស្គាល់គ្នារាប់អានគ្នាទៅវិញទៅមក ។
ក្រោយមកទៀតខាងស្រីបានខលមកនឹងបានអួតថា រូបគេមានដីមួយកន្លែងទំហំ៥០ម៉ែត្រគុណ៣០០ម៉ែត្រនៅក្រវាញ ក្នុងខេត្តពោធិ៍សាត់ បើលក់វិញបាន២លានដុល្លារក្នុងពេលជួបតាមទូរស័ព្ទខាងស្រីបានត្អូញត្អែរពីនេះពីនោះត្រូវបានខាងប្រុសបានវេរលុយឲ្យបន្តបន្ទាប់ព្រោះសង្ឃឹមថា បានដីសូម្បីតែមុខក៏មិនដែលបានជួបគ្នាដែរ ។
រហូតមកដល់ថ្ងៃចុងក្រោយថ្ងៃទី១៧ ខែធ្នូ ឆ្នាំ២០១៨ ខាងស្រីបានឲ្យវេលុយចំនួន៣៣០០ដុល្លារថាយកទៅសម្រាប់ឲ្យកំនល់គ្រូដែលបានមករូបគេ(ប៉ោ សម្បត្តិ) ជាពីត្រូវអំពើគេ ។ ខាងរងគ្រោះមានការសង្ស័យក៏បានរត់មកប្តឹងឲ្យសមត្ថកិច្ចជួយអន្តរាគមន៏ ។
លោកវរសេនីយ៏ឯក សុខ យ៉េន អធិការនគរបាលស្រុកស្រីសន្ធរបញ្ជាក់ថា ខាងរងគ្រោះបានសួររកប្លង់ដីតែខាងស្រីជើងឆបោកបានឆ្លើយពង្វាងដូចមិនចង់ឲ្យថា នៅខេត្តកំពង់ធំ ហើយគ្រាន់តែលុយរបស់អ្នករងគ្រោះដែលបានផ្ញើតាមវីងសរុបចំនួន៦៥០០០ដុល្លារ ។
ហើយនៅព្រឹកថ្ងៃទី១៩ ខែធ្នូ ឆ្នាំ២០១៨ សមត្ថកិច្ចបានសហការជាមួយនឹងអ្នករងគ្រោះស្របពេលដែលខាងប្រុសបានវេលុយឲ្យទៅស្ត្រីឆបោកនោះស្របពេលដែលនាំគ្នាជិះម៉ូតូមកដកលុយវីងនៅឃុំស្វាយសាច់ភ្នំ ស្រុកស្រីសន្ធរ ក៏ត្រូវបានចាប់ខ្លួនតែម្តង ។
ជាមួយនោះភាគីខាងរងគ្រោះបានរកមេធាវីម្នាក់ឲ្យជួយការពារក្តីរឿងនេះដើម្បីទាមទារលុយដែលបានបាត់បង់មកវិញហើយខាងស្ត្រីឆបោកក៏មិនបានចាំថា លុយទាំងអស់មានចំនួនប៉ុន្មាន និងបានភ្លេចក្នុងឆ្នាំ២០១៦ និង២០១៧បាត់ហើយ ៕
ចែករំលែកព័តមាននេះ