ខេត្តឧត្តរមានជ័យ ៖ ក្រោយពេលអាជ្ញាធរស្រុកអន្លង់វែង ដឹកនាំកម្លាំងនគរបាល អាវុធហត្ថ និងទាហានដែលស្ថិតនៅក្រោមបញ្ជាផ្ទាល់របស់គណៈបញ្ជាឯកភាពស្រុក កាលពីព្រឹកថ្ងៃទី១៩ ខែធ្នូ បានចុះទៅរុះរើលំនៅឋានរបស់ប្រជាពលរដ្ឋចំនួន៣៨គ្រួសារដោយចោទប្រកាន់ថា «រស់នៅលើដីរបស់រដ្ឋ»…
ខេត្តឧត្តរមានជ័យ ៖ ក្រោយពេលអាជ្ញាធរស្រុកអន្លង់វែង ដឹកនាំកម្លាំងនគរបាល អាវុធហត្ថ និងទាហានដែលស្ថិតនៅក្រោមបញ្ជាផ្ទាល់របស់គណៈបញ្ជាឯកភាពស្រុក កាលពីព្រឹកថ្ងៃទី១៩ ខែធ្នូ បានចុះទៅរុះរើលំនៅឋានរបស់ប្រជាពលរដ្ឋចំនួន៣៨គ្រួសារដោយចោទប្រកាន់ថា «រស់នៅលើដីរបស់រដ្ឋ» ។
ទោះជាយ៉ាងណា សកម្មភាពរបស់សមត្ថកិច្ចនេះ ធ្វើឲ្យប្រជាពលរដ្ឋផ្ទុះកំហឹងតវ៉ាភ្លាមៗផងដែរ ដោយនាំគ្នាយកគោយន្ត១៥គ្រឿង និងមានមនុស្សប្រមាណ១០០នាក់បិទផ្លូវជាតិលេខ៦៧Bបណ្តាលឱ្យកកស្ទះរថយន្តដែលធ្វើចរាចរណ៍រាប់រយគ្រឿងអស់រយៈពេលប្រមាណ៣ម៉ោង ទើបមានកងឯកភាពសាលាស្រុកអន្លង់វែងមកធ្វើអន្តរាគមន៍ឲ្យមានចរាចរណ៍ដូចធម្មតាឡើងវិញ ។
ហេតុការណ៍បិទផ្លូវ នេះបានកើតឡើងនៅភូមិជប់តាគួន ឃុំអន្លង់វែង ស្រុកអន្លង់វែង ។ពលរដ្ឋដែលអះអាងថារងគ្រោះដោយអាជ្ញាធរធ្វើការរុះរើលំនៅឋាននិយាយថា ពួកគាត់ទាំងអស់គ្នាចំនួន៣៨គ្រួសារ មានអ្នកខ្លះចូលមករស់នៅកាលពីអំឡុងឆ្នាំ២០០៨ រហូតមកដល់ឆ្នាំ២០១៨នេះ ស្រាប់តែអាជ្ញាធរស្រុកដែលមានលោក ងួន លីន រដ្ឋបាលសាលាស្រុកអន្លង់វែងដឹកនាំកងកម្លាំងស្រុកមករុះរើលំនៅឋានរបស់ពួកគាត់ ។ សកម្មភាពបែបនេះ ធ្វើឲ្យពួកគាត់ក្តៅក្រហាយទើបនាំគ្នាតវ៉ាបិទផ្លូវដោយយកគោយន្តកន្ត្រៃចំនួន១៥គ្រឿងរាំងកាត់ទទឹងផ្លូវនិងមានមនុស្សប្រមាណ១០០នាក់ចូលរួម ។
ពលរដ្ឋទាំងនេះនិយាយទៀតថា មិនមែនពួកគាត់មិនដឹងទេថា ការបិទផ្លូវតវ៉ានេះគឺខុសច្បាប់តែគ្មានជម្រើសឡើយដើម្បីស្វែងរកដំណោះស្រាយ ហើយក៏ត្រូវបានកងកម្លាំងប្រដាប់អាវុធមកបំបែក និងគំរាមកំហែងឲ្យពួកគាត់អ្នកតវ៉ាបំបែកហ្វូងគ្នានៅថ្ងៃដដែល ។
ទាក់ទិននឹងហេតុការណ៍នេះ អ្នកយកព័ត៌មានបានសុំការបំភ្លឺរាល់ឯកសារពាក់ព័ន្ធដែលអាជ្ញាធររុះរើលំនៅឋានពីលោក ងួន លីន រដ្ឋបាលសាលាស្រុកអន្លង់វែង និងលោក គង់ រតនា ព្រះរាជអាជ្ញារងអមសាលាដំបូងខេត្ត តែលោកទាំង២បានឆ្លើយរុញដាក់គ្នាទៅវិញទៅមកដូចអាយ៉ៃឆ្លើយឆ្លងទៅវិញ ធ្វើឱ្យការព្យាយាមសុំការបំភ្លឺមិនបានទទួលជោគជ័យ ។
នារសៀលថ្ងៃទី១៩ ខែធ្នូដដែល អ្នកយកព័ត៌មានបានទូរស័ព្ទជួបលោក ហោ ជិនវីរៈយុទ្ធអភិបាលស្រុកអន្លង់វែង និងលោក ប៉ែន កុសល្យអភិបាលខេត្ត ហើយលោកទាំង២បានឆ្លើយតបវិញថា លោកជាប់រវល់ប្រជុំធ្វើឱ្យការព្យាយាមស្វែងរកការបំភ្លឺពីសំណាក់ក្រុមមន្ត្រីក៏មិនទទួលជោគជ័យទៀត ។
ទោះបីជាបែបណា អ្នកយកព័តមានបានទូរស័ព្ទកាលពីរសៀលថ្ងៃទី១៩ ខែធ្នូ ជួបលោកកូយ កាន់យ៉ា ព្រះរាជអាជ្ញអមសាលាដំបូងខេត្តលោកបានឲ្យដឹងថា ការរុះរើលំនៅឋានរបស់ប្រជាពលរដ្ឋនេះ គឺយោងទៅតាមសំណើក្នុងលិខិតមួយចុះថ្ងៃទី២៥ ខែមករា ឆ្នាំ២០១៨ របស់លោក ជា ពិសិដ្ឋ នាយករដ្ឋបាលសាលាខេត្ត ស្នើសុំលោកព្រះរាជអាជ្ញារងម្នាក់ជួយសម្របសម្រួលនីតិវិធីជាមួយក្រុមអាជ្ញាធរស្រុក។ លោកមិនបានឱ្យដឹងលម្អិតជាងនេះទេថា តើការចុះរើលំនៅឋាននេះ ស្របទៅតាមច្បាប់ឬក៏បែបណាឡើយ ។
គួររំឭកថា កន្លងមកនៅតំបន់ជប់គគីរក៏ក្រុមក្រុមអាជ្ញាធរគ្រប់លំដាប់ថា្នក់ រួមទាំងក្រុមមន្ត្រីតុលាការផងចុះរុះរើលំនៅឋានប្រជាពលរដ្ឋដែរ ដោយសំអាងថាជាដីរបស់រដ្ឋ ។ តាមប្រភពក្រៅផ្លូវការថា លុះក្រោយ មកប្រែជានាំគ្នាយកដីនេះលក់យកលុយចែកគ្នាធ្វើមានធ្វើបានទៅវិញ ។តាមព័ត៌មានចុងក្រោយបានឱ្យដឹងថា បន្ទាប់ពីមានការតវ៉ាបិទផ្លូវរបស់ពលរដ្ឋ និងក្រោយមកមានការសម្របសម្រួលឱ្យពលរដ្ឋបើកផ្លូវវិញនោះ ក៏មានវត្តមានអភិបាលរងខេត្ត និងលោកស្នងការរងនគរបាលខេត្តចុះមកដល់តំបន់ដែលអាជ្ញាធរព្យាយាមរុះរើលំនៅឋានអស់ជាង១០ខ្នងមកហើយ ដោយបានសន្យាក្នុងរយៈពេលកន្លះដើម្បីធ្វើការដោះស្រាយ ។
ប៉ុន្តែទោះបីមានការសន្យារំលត់អធិករណ៍ដែលផ្ទុះឡើងនេះក្តី ក៏នៅតាមជើងសសរផ្ទះពលរដ្ឋ មានការបិទសេចក្តីជូនដំណឹងឱ្យម្ចាស់ផ្ទះត្រូវរុះរើផ្ទះដោយខ្លួនឯង ក្នុងរយៈពេល១សប្តាហ៍មុនពេលអាជ្ញាធរអនុវត្តវិធានការរុះរើជាថ្មី ។ ដោយសារតែក្រុមមន្ត្រីព្យាយាមមិនបកស្រាយបំភ្លឺភ្លាមៗជុំវិញបាតុភាពនេះ ទើបមិនអាចដឹងបានឡើយថា តើអាជ្ញាធរមានសំអាងបែបណាទើបឈានដល់ការរុះរើនេះ ។អ្នកតាមដានវិវាទរឿងចាប់ដីធ្វើផ្ទះនេះនិយាយថា បើជាដីរបស់រដ្ឋហេតុអ្វីដេញពលរដ្ឋឱ្យចេញធ្វើអ្វី តើឱ្យពួកគាត់ទៅនៅឯណា ?
ចែករំលែកព័តមាននេះ