ខេត្តបាត់ដំបង ៖ ភិក្ខុមួយអង្គដែលល្បីថាចេះមន្តអាគមនិងចេះព្យាបាលជំងឺពូកែស័ក្តិសិទ្ធផង បានត្រូវកម្លាំងនគរបាល សហការជាមួយមន្ត្រីធម្មការស្រុកឃាត់ខ្លួន បន្ទាប់ពីឆែកឆេររកឃើញលាក់ទុកអាវុធនិងវត្ថុតាងល្មើសច្បាប់ជាច្រើនទៀត កាលពីវេលាម៉ោង១១ថ្ងៃត្រង់ថ្ងៃទី១៨ ខែធ្នូ នៅក្នុងអាស្រមមួយកន្លែងនៅចង្កេះភ្នំ៨២ ស្ថិតក្នុងភូមិចាំចាប ឃុំបឹងរាំង ស្រុកកំរៀង ។
យោងតាមរបាយការណ៍របស់សមត្ថកិច្ចបានឲ្យដឹងថា ភិក្ខុដែលត្រូវបានឃាត់ខ្លួននេះឈ្មោះ ហ៊ុន អង អាយុ៣៧ឆ្នាំ បួសជាសង្ឃតែពុំសូវស្នាក់នៅក្នុងវត្តអារាមណាមួយទេ គឺសម្ងំស្នាក់នៅតែក្នុងអាស្រមមួយអង្គឯងនៅចង្កេះភ្នំខាងលើ ។បើតាមសមត្ថកិច្ចប្រាប់ថា ភិក្ខុអង្គនេះចេះមន្តអាគម និងចេះព្យាបាលជំងឺដល់អ្នក ស្រុកទៀតផង ។ ក្រោយពីលេចឮថាភិក្ខុអង្គនេះមានលាក់ទុកអាវុធនិងសម្ភារនានាដែលពាក់ព័ន្ធនឹងបទ
ល្មើសផង ទើបនគរបាលសុំសហការជាមួយព្រះអនុគណ និងមន្ត្រីធម្មការស្រុកកំរៀង ចុះត្រួតពិនិត្យឆែក ឆេរ និងរកឃើញវត្ថុតាងជាច្រើននៅក្នុងអាស្រមនោះ ហើយក៏បានដកហូតភ្លាមៗដែរ ។
តាមរបាយការណ៍បានឲ្យដឹងថា វត្ថុតាងដែលដកហូតរួមមាន កាំភ្លើងម៉ាកប៉េអាកុលកែច្នៃ១ដើម កាំភ្លើងច្នៃបាញ់គ្រាប់កង់១ដើម គ្រាប់កាំភ្លើងខ្លីធុនកា៥៩ចំនួន១គ្រាប់ គ្រាបកា៥៤ ចំនួន៣គ្រាប់ គ្រាប់ប៉េអាកុល៤គ្រាប់ គ្រាប់រូឡូ៧គ្រាប់ ខ្នោះដៃ១គូ ដាវសាមូរ៉ៃ១ កាំបិតចំពុះទុង១ មួកនគរបាល១ និងវិទ្យុទាក់ទង១គ្រឿង ថែមទាំងមានថ្នាំញៀននិងឧបករណ៍សម្រាប់ប្រើប្រាស់ថ្នាំញៀនទៀតផង ។
លោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្តមានប្រសាសន៍ថា វត្ថុតាងខាងលើនេះត្រូវបានសមត្ថកិច្ចឆែកឆេររកឃើញនៅក្នុងអាស្រមរបស់ភិក្ខុខាងលើ ហើយក៏ដកហូតតែម្ដង ។ លោកស្នងការរងប្រាប់ថា ក្រោយពីរកឃើញនិងដកហូតបាននូវវត្ថុតាងល្មើសច្បាប់ទាំងនេះ ព្រះអនុគណនិងមន្ត្រីធម្មការស្រុក បានសម្រេចផ្សឹកភិក្ខុអង្គនេះ រួចប្រគល់ឲ្យសមត្ថកិច្ចចាត់ការតាមនីតិវិធី ។ លោកស្នងការរង ជេត វណ្ណនី បញ្ជាក់ថាជននេះអាចជាប់សង្ស័យពីបទ«កាន់កាប់និងរក្សាទុកអាវុធដោយខុសច្បាប់» និងត្រូវបានកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ