ខេត្តកំពង់ស្ពឺ ៖ យ៉ាងហោចណាស់ មានកម្មករដែលបម្រើការងារក្នុងទីតាំងឡសម្ងួតស្រូវដែលផ្ទុះស្លាប់ចំនួន២នាក់ និងរបួសធ្ងន់ចំនួន៤នាក់ ត្រូវបានដឹកបញ្ជូនយកទៅសង្គ្រោះភ្លាមៗ ។ ការរងគ្រោះនេះ ដោយសារតែហេតុការណ៍ផ្ទុះបានកើតឡើងក្នុងពេលបំពេញការងារ កាលពីវេលាម៉ោង៣…
ខេត្តកំពង់ស្ពឺ ៖ យ៉ាងហោចណាស់ មានកម្មករដែលបម្រើការងារក្នុងទីតាំងឡសម្ងួតស្រូវដែលផ្ទុះស្លាប់ចំនួន២នាក់ និងរបួសធ្ងន់ចំនួន៤នាក់ ត្រូវបានដឹកបញ្ជូនយកទៅសង្គ្រោះភ្លាមៗ ។ ការរងគ្រោះនេះ ដោយសារតែហេតុការណ៍ផ្ទុះបានកើតឡើងក្នុងពេលបំពេញការងារ កាលពីវេលាម៉ោង៣ និង៤០នាទីរសៀលថ្ងៃទី១៩ ខែធ្នូ នៅចំណុចក្រុមហ៊ុនហ្គោលដេនរ៉ាយ ដែលមានទីតាំងស្ថិតនៅតាមផ្លូវជាតិលេខ៥១ ក្នុងភូមិត្រពាំងក្រសាំង ឃុំក្សេមក្សាន្ត ស្រុកឧដុង្គ ។
បើតាមលោកឧត្តមសេនីយ៍ទោ សម សាមួន ស្នងការនគរបាលខេត្តបានឲ្យដឹងតាមទូរស័ព្ទថា ការផ្ទុះឡ
សម្ងួតស្រូវនេះ បណ្តាលឱ្យស្លាប់កម្មករ២នាក់ និងរងរបួសចំនួន៤នាក់ ។
លោកស្នងការបន្តថា នៅមុនពេលកើតហេតុនោះ គឺក្រុមកម្មករមកបំពេញការងារដូចសព្វមួយដង ស្រាប់តែផ្ទុះឡបណ្តាលឲ្យកម្មករស្លាប់ និងរបួសយ៉ាងអាណោចអាធ័ម ហើយកម្លាំងសមត្ថកិច្ចស្រុកឧដុង្គ បានទៅពិនិត្យនៅកន្លែងកើតហេតុក្នុងក្រុមហ៊ុនខាងលើថា តើការផ្ទុះនេះ បណ្តាលមកពីមូលហេតុអ្វី ?
ចំពោះកម្មករដែលស្លាប់ ម្នាក់ឈ្មោះ អេងចន្ធី ភេទប្រុស អាយុ៣១ឆ្នាំ រស់នៅភូមិក្រោលខៀវ ឃុំភ្នំបាត ស្រុកពញាឮ ខេត្តកណ្តាល និងម្នាក់ទៀតឈ្មោះ យឿ យ៉ាត ភេទប្រុស អាយុ៤៥ឆ្នាំ រស់នៅភូមិប្រកិល ឃុំព្រះស្រែ ស្រុកឧដុង្គ ។
ចំណែកអ្នករងរបួសធ្ងន់មាន ៖ ១-ឈ្មោះ ងួន ប្រុស ភេទប្រុស អាយុ២៥ឆ្នាំ រស់នៅភូមិធម្មស្រះ ឃុំភ្នំបាត ស្រុកពញាឮ ខេត្តកណ្តាល ។ ២-ឈ្មោះ ឌី រ៉ាច់ ភេទប្រុស អាយុ៣០ឆ្នាំ រស់នៅភូមិស្ពានទន្លាប់ ឃុំទំនប់ធំ ស្រុកពញាឮ ។ ៣-ឈ្មោះ ស៊ុន សុវណ្ណារ៉ា ភេទប្រុស អាយុ៣២ឆ្នាំ និង៤-ឈ្មោះ សូ ខៀវ ភេទប្រុស អាយុ៣២ឆ្នាំ ទាំង២នាក់ក្រោយនេះ រស់នៅក្នុងភូមិប្រកិល ឃុំព្រះស្រែ ។
អ្នករងរបួសធ្ងន់ទាំង៤នាក់ ត្រូវបានបញ្ជូនយកទៅព្យាបាលអស់ហើយ តាមប្រភពព័ត៌មានក្នុងហេតុការណ៍នេះ រថយន្តស្ទូចចំណុះ៧តោន១គ្រឿង ក៏ត្រូវឆេះផងដែរ ៕
ចែករំលែកព័តមាននេះ