រាជធានីភ្នំពេញ ៖ សំណាងធ្លាប់តែដើរលេងជាមួយក្រុមក្មេង ដែលប្រព្រឹត្តអំពើមិនល្អនៅក្នុងសង្គម ។ ប៉ុន្តែនៅពេលដែលយុវជនរូបនេះចាប់ផ្តើមមានចំណូលចិត្តលេងកីឡាបាល់ទាត់គេក៏បានដកខ្លួនចេញសកម្មភាពនានាដែលសង្គមមិនផ្តល់តម្លៃ ។
ឡុក សំណាង អាយុ១៩ឆ្នាំ ដែលរស់នៅក្នុងភូមិឬស្សី សង្កាត់ស្ទឹងមានជ័យ២ ខណ្ឌមានជ័យ បាននិយាយថា កាលពីពេលកន្លងទៅរូបគេជាក្មេងដែលចូលចិត្តគេចសាលារៀន និងយកពេលវេលាផ្ទាល់ខ្លួនទៅលេងនូវហ្គេមអ៊ីនធឺនេត រួមទាំងធ្លាប់ដើរចូលក្នុងក្រុមខិលខូច ដែលសង្គមស្អប់ខ្ពើមផងដែរ ដែលកាលគ្រានោះមនុស្សម្នាទូទៅពិសេសមិត្តភក្តិល្អៗត្រឹមត្រូវជាច្រើនតែងរើសអើង និងមិនចូលចិត្តរាប់អានទំនាក់ទំនងជាមួយរូបគេឡើយ ។
ក្រោយមកដោយសារតែឃើញវិស័យកីឡាបាល់ទាត់ហាក់មានការស្ទុះឡើង ពិសេសនោះគឺមជ្ឈដ្ឋានទូទៅទទួលស្គាល់ និងគាំទ្រយ៉ាងខ្លាំងផងនោះធ្វើអោយរូបគេបង្វែរអារម្មណ៍មកលេងកីឡាបាត់ទាត់នេះតែម្តង គឺនៅពាក់កណ្តាល ឆ្នាំ២០១៧កន្លងទៅ ។ យុវជនរូបនេះ បញ្ជាក់ថា ខ្លួនចង់ក្លាយជាកីឡាករបាត់ទាត់ដ៏ឆ្នើមមួយរូបដូចទៅហ្នឹងកីឡាករបាត់ទាត់ល្បីៗមួយចំនួនរបស់កម្ពុជាដែលកំពុងទទួលបានការគាំទ្រជាខ្លាំងពីសំណាក់មជ្ឈដ្ឋានក្នុងស្រុក និងក្រៅប្រទេសផងដែរ ដូចជាលោកកែវ សុផេង ឬលោកចាន់ វឌ្ឍនាកា ជាដើម ។
ចំណែកយុវជន ហាក់ ពៅ មានវ័យ២០ឆ្នាំ រស់នៅភូមិទ្រា៤ សង្កាត់ស្ទឹងមានជ័យទី១ ខណ្ឌមានជ័យ ក៏ធ្លាប់មានប្រវត្តិដូចឡុក សំណាងដែរ ។ យុវជនរូបនេះបាននិយាយស្រដៀងគ្នាដែរថា កន្លងមកខ្ញុំអត់ចូលចិត្តវិស័យកីឡានោះទេមិនថា ជាកីឡាបាល់ទាត់ ឬបាល់ទះឡើយ ពោល គឺមិនចូលចិត្តលេងកីឡាតែម្តង ។ លុះប៉ុន្មានឆ្នាំក្រោយមកនេះវិស័យកីឡាបាល់ទាត់នៅកម្ពុជាហាក់មានសន្ទុះស្ទុះឡើងជាលំដាប់ ពិសេសនោះមានការគាំទ្រជាខ្លាំងពីសំណាក់ស្រទាប់មិត្តៗយុវវ័យទូទៅទើបខ្ញុំចាប់ផ្តើមមានចំណង់ចិត្តចង់លេងកីឡាបាល់ទាត់ដោយសារខ្ញុំចង់ក្លាយជាបុគ្គលម្នាក់មានមនុស្សម្នាគាំទ្រខ្លួនយ៉ាងច្រើនដូចទៅហ្នឹងកីឡាករឆ្នើមៗជាច្រើននាក់របស់កម្ពុជាដែលមានសមត្ថភាពខ្ពស់ និងមានឈ្មោះបោះសម្លេងជាខ្លាំងផងនោះ ។
យុវជនរូបនេះបញ្ចាក់ថា បើទោះបីជាថ្ងៃអនាគតខ្លួនមិនអាចមានសមត្ថភាពគ្រប់គ្រាន់ ដើម្បីក្លាយខ្លួនជាកីឡាករឆ្នើមក៏ដោយក៏រូបគេសប្បាយចិត្តជាមួយវិស័យកីឡាមួយនេះដែរព្រោះវាជាផ្នែកមួយសំខាន់សម្រាប់សុខភាពរាង្គកាយរបស់រូបគេជាជាងការយកពេលវេលាទៅសេពគប់មិត្តភក្តិមិនល្អ ឬប្រព្រឹត្តិនូវអំពើអប្បាយមុខផ្សេងៗ ដែលសង្គមជាតិស្អប់ខ្ពើមផងដែរ ។
ហាក់ ពៅ និយាយថា «កីឡាធ្វើអោយខ្ញុំផ្លាស់ប្តូរច្រើន ។ វាធ្វើអោយខ្ញុំសប្បាយចិត្តមានមិត្តភក្តិច្រើនមានសុខភាពល្អ និងភ្លេចអស់ពីសកម្មភាពខិលខូ» ។ អ្នកជំនាញនិយាយថា ជាការពិតណាស់ កីឡាមានសារសំខាន់សម្រាប់ភាពរឹងមាំនៃរាងកាយសុខភាព និងប្រាជ្ញារបស់មនុស្ស ។ មិនតែប៉ុណ្ណោះវាក៏អាចជួយយុវជន និងយុវតីមិនអោយធ្លាក់ខ្លួននៅក្នុងការសប្បាយ ភ្លើតភ្លើនដូចជា ការលេងគ្រឿងញៀន ឬក៏ប្រព្រឹត្តអំពើមិនល្អណាមួយក្នុងសង្គម ។ ដូច្នេះសាលារៀននានាគួរគប្បីពង្រឹងសកម្មភាពកីឡាអោយបានខ្លាំងក្លា ដើម្បីអនាគតរបស់យុវជន និងយុវតីកម្ពុជា ។
គួរបញ្ជាក់ថា ប៉ុន្មានឆ្នាំក្រោយមកនេះ វិស័យកីឡាពិសេសកីឡាបាល់ទាត់នៅកម្ពុជាត្រូវបានរាជរដ្ឋាភិបាលបានយកចិត្តទុកដាក់ខ្ពស់បំផុត ដោយតែងរៀបចំនូវការប្រកួតធំៗជាច្រើនរវាងកម្ពុជាជាមួយកម្ពុជា និងការប្រកួតរវាងកម្ពុជាជាប្រទេសដទៃជិតខាងផងដែរដោយកន្លងទៅគេតែងសង្កេតឃើញមានប្រជាពលរដ្ឋជាច្រើនម៉ឺននាក់នាំគ្នាទៅទស្សនាយ៉ាងកុះករមិនដាច់ រាល់ពេលមានការប្រកួតចាប់ផ្តើមម្តងៗ ។
លើសពីនេះរាជរដ្ឋាភិបាលកម្ពុជាតែងរៀបចំជាការផ្តល់នូវពានរង្វាន់រួមជាមួយការឧបត្ថម្ភផ្សេងៗជាច្រើនសម្រាប់ក្រុមកីឡាករដែលទទួលជ័យជំនះក្នុងការប្រកួត ដើម្បីជាការលើកទឹកចិត្ត ៕
ចែករំលែកព័តមាននេះ