រាជធានីភ្នំពេញ ៖ រថយន្តតាក់ស៊ីមួយគ្រឿងដឹកជនជាតិចិនម្នាក់តៃកុងបើកលឿនមិនបានប្រយ័ត្ន មិនបានមើលឃើញគោឆ្លងផ្លូវ រថយន្តជាន់ហ្វ្រាំងមិនជាប់ក៏បានបុកពេញទំហឹង បណ្តាលឲ្យមេគោបាក់ជើងទាំងពីរ ។ ចំណែកឯរថយន្តរងការខូចខាតយ៉ាងធ្ងន់ធ្ងរបង្កអោយមានការភ្ញាក់ផ្អើល កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី២០ ខែធ្នូ ឆ្នាំ២០១៨ នៅតាមបណ្ដោយផ្លូវជាតិលេខ៤ ដែលស្ថិតនៅសង្កាត់ កន្ទោក ខណ្ឌពោធិ៍សែនជ័យ ។
រថយន្តខាងលើម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2AU- 3484 បើកបរដោយបុរសម្នាក់ដឹកជនជាតិចិនម្នាក់ បើកក្នុងទិសដៅពីកើតទៅលិច ។
តាមប្រភពព័ត៌មានពីម្ចាស់រថយន្តបាននិយាយថា នៅមុនពេលកើតហេតុរូបគាត់បានបើកបរពីព្រលានយន្តហោះដឹកអ្នកដំណើរជនជាតិចិនម្នាក់ចេញពីព្រលានយន្តហោះអន្តរជាតិភ្នំពេញ ទៅខេត្តកំពង់សោមក្នុងតម្លៃ៥០ដុល្លារ លុះបើកមកដល់ចំណុចកើតហេតុ ស្រាប់តែឃើញគោដែលដើរតាមចិញ្ចើមផ្លូវចំនួនមួយហ្វូងបានដើរឆ្លងផ្លូវពីជើងទៅត្បូងធ្វើឲ្យគាត់ជាន់ហ្វ្រាំងមិនជាប់បានបុកមេគោខាងលើពេញទំហឹង បណ្តាលឲ្យប៉ើងគោទៅម្ខាង រីឯរថយន្តបានរ៉េចង្កូតទៅម្ខាងផ្សេងគ្នា ។
ចំណែកមេគោខាងលើបានបាក់ជើងខាងក្រោយទាំងពីរដួលនៅកណ្តាលផ្លវ ហើយរថយន្តរបស់គាត់រងការខូចខាតយ៉ាងធ្ងន់ធ្ងរ ។
ក្រោយពេលកើតហេតុជនជាតិចិនខាងលើត្រូវបានម្ចាស់រថយន្ត ហៅរថយន្តផ្សេងផ្ទេរ ភ្លាមៗផងដែរ ហើយម្ចាស់រថយន្តខាងលើបានប្តឹងទៅសមត្ថកិច្ចអោយជួយដោះស្រាយបញ្ហាខូចខាតរថយន្តរបស់គាត់ បន្ទាប់មកសមត្ថកិច្ចហៅ រ៉ឺម៉កមកដឹកយកទៅសង្កាត់ ប៉ុន្តែជនរងគ្រោះនឹងសមត្ថកិច្ចលើកគោមិនរួច ដោយទុកនៅកន្លែងកើតហេតុវិញ ដើម្បីរង់ចាំម្ចាស់មកដោះស្រាយ ៕
ចែករំលែកព័តមាននេះ